FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na talanoa toalua ai Lisati ma le fafine o Losi i tua o le fale fuapopo e faatatau i le mafutaga a Lasela ma le leoleopo o le Falemeli i Matafele.]

 

Na faanunumi le muaulu o Lisati mo ni nai sekone ona fa’ataga te’i lea ma fesili atu ia Losi, “ua laki la oe ua ou iloa ai le mea o lo o kupu alii, ae kalu lava oga ou kauguu mai ou ke le’i fa’alogo lava i se kala,” e fai lava tala a Lisati ma toe savali aga’i i le faleoloa ae ua savali ese atu Losi i le isi itu o le nuu. E le iloa e Lisati pe ata pe faafefea fo’i i le malie o amioga a fafine o le nuu, e le talanoa i ni mea aoga e maua ai se meaai mo le aiga ae na o le fela’ula’ua’i tala solo toeititi su’e atu ni tala ia i latou. “O le a le mea ga lua mumumumu mai ai ma Losi i kua o le fale fuapopo, koeikiki su’e gi kala i lua guku,” o tala ata ia a le fafine o Agalosa ma aapa atu ua fusi mai Lisati. O Agalosa, o le uo mamae lava lea a le tina a Lasela le uo tama’ita’i a Lisati. “Se o kala kuai lava a Losi lea sa kau fai mai e faamalie ai le afiafi,” o le sisi’o atu lea a Lisati ma aapa atu fo’i ua fusi mai Agalosa ma sogi atu i ona alafau, ona nonofo to’alua ai lava lea i luma o le faleoloa ma talatalanoa.

 

Ua le masino se mea e fesili i ai Agalosa e faatatau ia Lisati, e le gata ua fesili po o a mai le aoga, ae ua fesili fo’i pe manaia Niu Sila i le nofo. Ua le iloga se mea e alu solo ai le CNN a Agalosa ae faai’u lava i lona fesiligia o le tamaititi pe na maua se la talanoaga ma Lasela, ae na tali atu i ai Lisati e leai, ua fiu fo’i e siaki le latou fale i le isi tulimanu o le nuu, ae o le tali na avane ia te ia, o Lasela ua fai lona to’alua.

 

“O ai ga faia ga kala pepelo faapega,?” o le oso vave atu lea a Agalosa ma taumafai e pupuni le mea o lo o tupu. “O Lasela o lo o gofo aoga i le uso o Lokegi i Moaka’a, fa’akoa sau lava pe a kuua aoga i le faaiuga o le kuata, ou ke ofo po o fea e maua mai ai e kagaka o le guu gei mau kala sese ua faalele solo, ai fo’i o le guku o le mea maka somoa ga le o Losi ga faakupua ga kala sese, a ea?” o le avaavau atu lea a Agalosa ia Lisati ae na o le ata lava o le tamaititi ma fai atu i ai, “Se aua e ke popole fua oe i kala a kagaka, o amioga kuai lava gei a kagaka o le kakou gu’u ua ou masagi,” o tala ia a Lisati na tuu atu i le fafine o Agalosa e tau faato’ato’a ai lona ma’ema’ea lea ua sasao fa’aafi atu i luma o le faleoloa. O le faaiuga o le talanoaga a le tamaititi ma le fafine o Agalosa, na tauanau ai loa e le fafine Lisati la te o se i la talanoa ma Lasela ina ia manino lelei ai le mataupu, ina ne’i toe vave fo’i i Niu Sila ae le i maua lava se la feiloaiga, ae na te’i le fafine ina ua tali atu le tamaititi, “Agalosa, fai ia Lasela e aua le popole i se mea e kasi, e kele i’a o le sami.”

\\

Comment Here