[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua tali atu ai le tamaititi o Lisati i lona tina, e aua le popole e le’i sau e vaai Lasela na sau e asi le ma’i a lona tama, ae se’i i ai se taimi ona latou talanoa lea e faatatau ia Lasela.]

Na te’i le faalogo a le fafine i le tali a lana tama, ona nofo ai lava lea e le’i toe pisa i luga e faatatau ia Lasela. E vaiaso atoa talu ona taunuu Lisati i lona aiga ae fai loa le ripoti a le foma’i e te’a ai lona tama i tua i lo latou aiga ua malosi, ae ua lata i le 3 masina o taoto le tamaloa i le falema’i i lona ma’i tigaina e le i maua lava le mafuaaga. Ua logo tala le nuu i le tamaititi o Lisati lea ua toe fo’i i lona aiga e asi lona tama, ma ua toatele fo’i tagata ua fiafia i le suiga ua i ai lea aiga i le nuu, aua o lea ua vavala mai le tulaga aoga o le tamaititi i nai ona matua.

“Sole Sati, malo le malaga manuia, o le mea sili ua e toe fo’i mai i le ma’i o si ou tama,” o ni isi ia o tala faamalosi ma upu faamalo a isi tupulaga a Lisati i le taimi latou fetaui ai i evaga i totonu o le nuu i afiafi o aso ta’itasi. O le alii o Maturo, o le uo mamae lava lea a Lisati i aso a la aooga i le aoga tulaga muamua a le nuu, so o se mea fai i totonu o le nuu, e vaaia ai lava Lisati ma Maturo o feofeoa’i to’alua, e o faatasi i le lotu, e o faatasi i volipolo pe taaalo lakapi i afiafi, a o o fo’i i aso To’ona’i e o faatasi fo’i i le Talaloa e fai to’ona’i o le aso Sa, ma o uiga uma nei na mafai ona toe fafagu ina ua toe maua le feiloaiga a Maturo ma Lisati i le afiafi ina ua toe fetaui le au alii i le malae lakapi.

O isi ua talanoa i le tulaga mataina lea ua i ai le lakapi a Lisati i Niu Sila, e o o fo’i i ripoti ua taua ai le tulaga mataina o le taalo lakapi a le tamaititi, ma e ono avea o ia ma sui o le au fili a tamaiti aoga laiti i totonu o Niu Sila pe afai e tumau pea le lelei o lana taalo lea ua i ai. O nei mau tala uma na mafai ona faasoa ai Lisati ma isi sui o lana tupulaga i afiafi uma latou te tafafao ai. O le vaiaso mulimuli o le tamaititi i lona aiga e atoa ai le 2 vaiaso o lana malologa mai le aoga, na faatoa taia ai loa lana faalogo i tala mata’utia e faatatau i lana manamea o Lasela.

Na te’i Lisati a’o tu i luma o le faleoloa a Kalala e fai le latou fa’atau, ae eu lona tauau e le fafine o Losi, ma geno atu ia te ia e alu atu i tua o le Fale Fuapopo a le faleoloa la te talanoa ai. “O le a le mea e ke fia kalagoa ai o lea ou ke pisi i le afiafi,?” o le tala ata atu lea a Lisati ia Kalala ma savali atu lava i le mea o lo o alu atu i ai le fafine. “Ga e maua se kala e faakakau i lau keige o Lasela, ua i’u lava iga gogofo ma le leoleo po le gifoa o le Falemeli i Makafele, aua lava ge’i koe ma’imau iga sou kaimi eke kalagoa i ai pe afai e koe kaumafai e faafekaui aku oe.”