FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na ua manaia ai lava le talanoaga a Lasela ma le toeaina leoleopo, ma ua oso a’e i manatu o le leoleopo, maimau pe ana faapea ua avea Lasela ma ana manamea.]

 

“Ae a pe a kuu ia ka kalagoaga se’i koe faauma i se isi aoauli ae ka o e momoli a’u i le makeki e fa’akali ai sa’u pasi i le fale,” o le augani atu lea a Lasela i le toeaina leoleopo, peitai na musu le toeaina e momoli le tama’ita’i i le maketi, ae sili pe a alu e momoli i lo latou fale. E fai lava tala a Lasela ma tu i luga, ua u u lana plate o lo o totoe ai lana meaai e le’i uma ona ai, ona u u lea o lana ato ma savali aga’i i le auala. “Siaula,! o le valaau lea a Meki, “Ga fo’i o le a faapega mai ou pa’uguku iga ua e maoga eh!, faakali mai ka o e momoli oe i le fale,” e fai lava tala a le toeaina o Meki ma aapa atu i lana toe meaai o lo o totoe ua u u ma savali ma ia i le ta’avale, ona oso lea i totonu o lana pikiapu ma faaola ma aga’i atu loa i le vaega lea ua o o atu i ai Lasela, ma piki ai le tama’ita’i ma la aga’i atu loa i le taulaga.

 

Na te’i Lasela ina ua oso i totonu o le ta’avale a le toeaina leoleopo, e fai o le manaia o le ea malulu, lelei le manogi toe seki ma le musika ma ua faigata ai ona toe oso i fafo ma le ta’avale. Na ki faalemu e Meki le leo o le musika i lalo  ona faapea atu lea i si ona leo malu ia Lasela, se siaula, ou ke le maga’o e ke alu i se pasi, ae o lea o le a ka o e momoli oe i le fale,” e fai lava tala a Meki ma faalemu le alu o lana taavale, ae na ata Lasela ma tali atu i ai, “Faafekai, kuu aku a’u i luma o le Flea Makeki e faakali ai sa’u pasi ae alu oe i uma le kesi o lau ka’avale ..” E latalata loa le taavale i tua o le Flea maketi i Savalalo ae tatagi loa ma le telefoni a Lasela, ma le vaai atu o le tama’ita’i, o le telefoni mai fafo lea ua alu atu, na faamisi e Lasela le telefoni e le i talia, ae ina ua tuana’i le isi 3 minute a’o faatali lana pasi, sa toe tatagi le telefoni ma ia vaaia ai o le numera lava lea e tasi ua toe vili atu, o lea na tago atu ai loa le tama’ita’i ua oomi le telefoni ma tali loa, ae te’i ina ua faalogo atu o le leo o Lisati lana uo.

 

Na umi se taimi o talanoa le tama’ita’i ma Lisati i luga o le telefoni, ma na faateia ai le tama’ita’i ina ua faalogo atu o lea ua sauni le tamaititi e toe fo’i mai i lona aiga ina ua maua tala ua ma’itigaina lona tama sa fai ma lima taumatau i lona tina ma si ana fanau. “E a lau tala, faafefea ona e toe fo’i mai ae faapefea lau aoga,?” o le faataga fesili lea a Lasela i le telefoni a’o lona loto ua tumu i le fiafia. “Lasela, ua i’u la’u faaiuga, ua lava le tausaga e tasi lea na ou aoga ai i Niu Sila nei, ma ua ou manatu ou te toe fo’i atu e tausi lo’u tama ua ma’i ma fesoasoani i lo’u tina i le tausiga o nai o’u teine, ae aua e te pisa i se isi, o le faaiuga o le masina nei pe a tuua le aoga ou te toe fo’i atu ai i Samoa.”

Comment Here