Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na te’i valevale a’e ai i luga le tama’ita’i o Lasela i lana miti sa fai, fai mai ua ia vaaia Lisati ua oso mai i fafo ma le va’alele, ae o lo o tofu ona lima ma le tamaititi o lo o ta’ita’i mai.]

 

Na avea le miti sa fai a Lasela ma itu na te’i valevale a’e ai i le tuneva o le po, ona nofonofo ai lava lea i luga o lona moega ma mafaufau i aso e tele o le la mafutaga ma Lisati. Sa tau lona mafaufau i le tele o taimi na ia alofa atu i le tamaititi ma fesoasoani ia te ia ma lona aiga i soo se saoga mea e fai a le aoga, ua tau lona mafaufau i le tele o afiafi la te uu lima ma savavali toalua ai i luma o le nuu a’o tumu evaga a tama ma teine o le nuu, ona tagi lea o le tama’ita’i ma lulu lona ulu ona o lona le talitonu i le tulaga lea ua ia vaaia i le la mafutaga ma lana manamea.

 

“Ae aisea fo’i na maua ai lenei avanoa sikolasipi e malaga atu ai i Niu Sila Lisati e aoga ai, lea ua mafua ai ona pologa faapenei lo’u mafaufau i lo’u alofa ... “ Na motu faafuase’i mafaufauga o le tama’ita’i ina ua tatagi leotele lana telefoni, ona aapa atu lea i luga o le laulau o lo o taatia ai le telefoni ua aumai ma tali, ae na te’i ina ua faalogo atu o lana toeaina leoleopo lea ua vili atu. “Atonu ua ou faalavelave atu i lau afioga o lo o fai sau malologa o le po, ae ua le mafai lava lo’u fia talanoa atu e siaki oe po o a mai lou loto mafatia o lo o i ai ..” o le tala lea a le leoleopo.

 

“Sole Meki, ua fai lava si ou le mafaufau ma lou vili mai i le leva o le po ..” o le tala lea a Lasela ma ata i le telefoni. “Ae le afaiga, e fekaugi lava lou kelefogi mai o lea ou ke gofogofo i luga o lo’u moega ma kau faako’ako’a loka mafaufau i le mafakia kele oga o le ma mafukaga ma la’u uo ua kau faalekogu mai ...” Na umi se taimi o talanoa le tama’ita’i ma le toeaina leoleopo, ma fai ai loa le tonu, o le ta tonu o le 12:00 i le aoauli o le aso lea la te fetaui ai i Mulinuu i lalo o Pulu tetele o lo o faafesaga’i ma le Ofisa o Faamasinoga o Fanua ma Suafa, la te talanoa ma avatu ai se isi fautuaga mo ia.

 

E te’a ane lava le 12:00 i le aoauli o lo o tau faatali se pasi a le tama’ita’i e alu ai i Mulinuu, ae na te’i ina ua taunuu atu ua leva ona nofonofo mai le toeaina leoleopo i lalo o Pulu, ma lana pikiapu malepe o lo o paka mai i le isi itu, ma ipu meaai e lua na alu atu ma ia. “Ailoga ga lelei sau moe i lou vave sau iigei, a ea?” o le tala ata lea a le tama’ita’i i le toeaina ae na tali le toeaina leoleopo, “A faafefea ea le mamafa i lo’u mafaufau o le ta tuugatala mo se feiloaiga i lenei aso.” E pisi ane lava evaga a tagata faigaluega a le malo aemaise ai foi tupulaga tama ma teine i Mulinuu, ae o lo o punonou lava Lasela ma le leoleopo i le faato’ato’aina o ipu kale mamoe ma le alaisa na faatau atu i le fale’aiga o Pinati i Saleufi, ma ua galo atu ai lava lagona faanoanoa na aafia ai le loto o le tama’ita’i o Lasela.