Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua amata faamavae atu ai aiga o i latou o le a malaga atu i Niu Sila i le vaa o le Polenisia, ao ta ta malie mai le pese a le Maa Tulua e faatatau i mafutaga motusia i luga o le leitio.]

 

Na ese le vaaiga na vaaia i totonu o le malae vaalele i Faleolo i le afiafi lea, toeititi leai se tagata faaee pasese e le maligi ona loimata, ona o le motusia ai o mafutaga ma aiga oa le a malaga ese atu. O ni isi ua faamavae i aiga o le a toe fo’i, o ni isi o matua ma aiga o fanau aoga e aofia ai ma Lisati o lea ua sauni e malaga atu i aoaoga, ae o ni isi o le taimi muamua lea faatoa oo ai i le atunuu malulu o Niu Sila, le atunuu o lo o faamatalaina e ni isi fai mai e tafe ai le suasusu ma le meli. O ni isi o le au faaee pasese ua leai lava se ma i le tumu o tagata ae ua fuli lava le tagata ia e ee i luga ona o le motusia o mafutaga. A’o ta ta malie mai pea le pese i luga o le laau, o le taimi lea na vaaia ai e Lisati ona matua ua le to’a, ua leai ma se isi o lona aiga e le o tagi, e oo lava i nai ona tei laiti ua fetagisi uma, a’o Lasela o lo o tu mai i le isi itu o le fale e faaee ai pasese ma ona foliga faanoanoa e pei uma lava e i ai se mea o lo o mamafa i lona mafaufau.

 

Na ona uma lava ona O.K ai o pepa malaga a le tamaititi o Lisati mai le Ofisa o le vaalele, savali atu loa ma oso si ona tuafafine laititi o Malia lea sa mulimuli atu lava i ona tua i le taimi atoa na pisi ai i le faatumuina o ona pepa malaga. Ua le mafai e Lisati ona taofi le maligi faavai ifo o ona loimata ona o le alofa i lona aiga o le a latou valavala mo le 3 tausaga. “Lia, toaga i le aoga ma usita’i lelei ia Mama ma Papa, aua ete gutu oso i nai ou tei matutua, ua e iloa,?” o le musumusu atu lea a Lisati i le taliga o Malia ao ia opo mau o ia i lona fatafata. Ua faasolo le faamavae a le tamaititi i nai ona tei, ma oo atu ai i nai ona matua ia o lo o tutu mai ma loimata i le isi tulimanu o le fale.

 

“Mama, Papa, faafetai mo mea uma, faafetai mo la oulua tausiga mo a’u, o lea o le a ou alu e saili se lumana’i o si o tatou aiga e ala i le faalauteleina o le atamai i aoaoga, ia outou manatua a’u i talosaga e le aunoa, ma ia tatou fesootai pea i talosaga i le ao ma le po... “ o upu faamavae ia a le tama o Lisati i ona matua, ona aapa atu lea ma fusi mai lona tama, ae faaiu atu i lona tina, ma faatoa liliu atu ai loa i le isi itu lea o lo o tu mai ai lana manamea o Lasela. E lei toe mafai e le tama ona toe gagana i se isi upu ina ua oo atu i luma o le tamaitai o Lasela, sei vagana ai lava le maligi faavai ifo i lalo o ona loimata ao ia fusi mai lana manamea ma faaloto tele atu i ai ina ia faamalosi e tausi ona matua ma toaga i lana aoga e pei ona maua ai lona avanoa i le Iunivesite a Samoa i Malifa. “Lasela, ia e faatali atu mo a’u ....”