[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea ua taunuu ai Lasela i le fale o Lisati ma le taga pepa o lo o afisi atu i lona lima.]

“Mama, vaai ofu ia o Lisaki e fafao i se kulimagu o laga ako ga e ave, o oga mikiafu ma ie e sui ai oga ofu i le aoga,” o le musumusu tau le lagona atu lea a Lasela i le tina o Lisati lea o lo o nofo faaseuapa i le pou tulimanu o le latou fale apa. E lei popole le fafine i le tatalo o le lotu lea o lo o fai e le toeaina, ae ua tu i luga ma savali aga’i i fafo o le fale sei la talanoa ma Lasela, e le mana’o e faalavelave la tala taumusumusu i le tatalo o le lotu o lo o fai, ae na avea lona taumafai e tu i luga ma itu na solo atu ai ma isi maa o le faavae maa o le latou faleapa, ma pao leotele ai a’o fai le tatalo.

“Suga, o le a lea kagapepa ua e koe sau ma oe, popole mai fua o lea lava ua uma oga kapega le malaga a Lisaki mo gagei, faafekai lava le magaku mai, ae saugi mai kakou o i le malae vaalele pe a ka le 9 gagei,” o le talanoa fiafia atu lea a le tina o Lisati i le tamaitai o Lasela, ao la talanoa musumusu i tua atu o le fale, ae la faalogoina loa le pese mai o le pese faaiulotu ua uma le tatalo sa fai.

“O ai ea lea ga pao ao fai le kakalo alii,” o le fesili fia iloa lea a le tama o Lisati ina ua faatoa maea lava upu faaiu o le pese. E lei tali se isi o le fanau, ae na lava le le nofo mai o le olomatua i totonu o le fale ma itu na iloa ai e le toeaina, o le olomatua lea na pao, ai foi na tu i luga ma savali i fafo i se feau. E uma atu loa le fesili a le toeaina ae ona faalogoina loa ua faatofa leotele le olomatua ma vaaia ai le toe savali mai i totonu o le fale. “O le a ea le mea eke pisi ai o lea sa fai le loku,?” o le fesili lea a le toeaina ma faaloloa ona vae, “Se, o si keige o Lasela ga sau e aumai ofu o Lisaki mo laga malaga, la ua ou fai i ai e alu sau ai kakou o gagei i le faaeega o si a’u kama,” o le tala lea a le olomatua na ata ai le toeaina ma faapea lana tala, “Vaai poo gi ofu o le koeaiga lega ua sola mai ma lega kama’ikaiga e alu ma le kama siaula.”

E sauni loa le aiga o le a faaee le taavale e o ai i le malae vaalele, ae vaaia loa Lasela ua laalaa atu. O teuga a le tamaitai i lea po na atili faamautuina ai le mafaufau o Lisate mo lana uo, afai ae uma lana aoga, e toe foi mai lava i Samoa e faamautu le la aiga ma Lasela e pei ona la tuu tala ai. Na matua tumu le malae vaalele i uo ma aiga o tamaiti aoga ua sauni e malaga atu i Niu Sila mo a latou aoaoga, o le toatele o le taimi muamua lea faatoa malaga ai i le aoga, ae o isi o lea ua toe foi e faauma a latou aoaoga mo le tausaga mulimuli. E amata loa ona gasolo le pasese a le vaalele i totonu, ae faalogoina loa i luga o le sipika tele lava o lo o i totonu o le malae vaalele, ua usu mai ai le pese a le Aufaipese o le Maa Tulua fai mai, “Ae ete le’i tuua o a’u, o’u toe manatu e fia momoli atu, tausaga o i luma ma ni mea e tutupu ai .....”