[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea na fa’ateia ai taulele’a o le nu’u ina ua latou fetaui ma le tamaititi o Lami ua fo’i mai ma lana amoga popo ae lei taitai le taeao.]

“A fa’afefea ea ali’i, e le kaikai maga’o le fafige o Sei e malama age se kaeao o oka moe pea lava i loka moega, e maga’o lava le fafige ia ou faia uma feau o le aiga ae ga o le gofo lava ma fa’akogu laga mea e fai, amuia oukou e sa’oloko lava i kaimi uma, ae kou ke le iloa mai le olaga o lo o oka ola ai, e savali lava i fa’akoguga i kaimi uma, ka le lava ola pologa se”, o upu fa’amomoi loto ia a le tamaititi o Lami sa faia i taulele’a o le nu’u na latou fetaui i le taeao, ae ua a o le tutu o ali’i ma pupula to’a i lenei tamaititi laititi ma le olaga pologa lea ola ai. “A o fea ga e faipopo ai”?, o le fesili atu lea a le ali’i o Kepi ma savali atu lava ua uu le avega a Lami o lo o i luga o lona ua ae fa’ata’atia i tafatafa o le auala, “sa ou faipopo i le fagua o si fafige o Tara, ua laki si fafige ma lona uso ua ou vave fo’i mai ai, ae se magu e fa’apegei lava ou ke le’i kaikai mai”. O le to’atele o taulele’a ia e talanoa ma Lami, e lata mai uma a latou fanua faipopo, o le mafua’aga fo’i lea o le tuai ona usu i uta, aua e le umi lava ona savali ae taunu’u i le toga niu faipopo, se’i vagana ai fanua fai ma’umaga e fai si mamao i uta i le talaloa.

Na ona taape lava o le talanoaga pu’upu’u a Lami ma taulele’a o le nu’u, toe aapa atu loa ma le tamaitiiti o le a toe si’i i luga lana amoga i lona ua, ae na te’i ina ua savali atu le ali’i o Kepi ma si’i i luga lana amoga ma tu’u atu i lona tauau ma lana upu sa fai atu ia te ia, “Sole Lami, a oo gagei i le kaimi e vela ai lau meaai, oga e alu aku lea i le vai kaele a le gu’u ka fekaui ai iiga, ae sau loa iga alu ge’i ke’i ua fiu le kou fale e kakali mai oe”, o le tala lea a Kepi ma tago ua tu’u atu le amoga i luga o le ua o Lami, ona alu loa lea o le tamaitiiti ae ua faliu Kepi ma savali aga’i i lona fanua faipopo ae o lona mafaufau ua le alu ese ma upu uma sa tautala atu ai le tamaititi ia te i latou ma isi taulele’a o le nu’u.

“Oka!, makua vave ali’i lau faiga popo, o le fagua o ai ga e gaioi ai fua i le vave o lau faiga popo a o lea fa’akoa e alu aku gei lava ua ao”?, o le fesili lea a le fafine o Sei i le tamaititi o Lami, ae le’i tali le tamaititi i se upu sei vagana ai le savali sa’o i tua o le umukukua ma palasi ai lana amoga popo, ona fa’asaga ane loa lea ua amata ona sali popo e fafaga ai pua’a. “Sole Lami, e i ai sou guku, o lea ua selau a’u fesili ae leai ma sau kali ah, o le fagua a ai lea ga e gaoi mai ai, eke iloa ea kalu oga ou gofokage mai i le aiga lenei ma le gu’u, e le’i kauvalea lava lo’u igoa, ae foliga mai fa’akoa ka’uvalea lava lea o le ma aiga iga ua e kiagi mai ma gofo iigei”.