[E toe fa’atalofa atu i uo ma paaga masani a le tatou polokalame i le amataga o lenei vaiaso, malo le onosa’i i faiva ma tiute, ae alo ma loa, o le toe soso’oina lenei o le tatou polokalame fa’asolo o le Olaga Pologa, lea na gata mai i le vaiaso na te’a nei i le taimi lea ua toe to manatu ai le tamaititi o Lami i fa’atonuga masani a le fafine o Sei e fai atu soo lava ia te ia.]

Ua savalia nei le masina atoa talu ona nofo le tamaititi matua ofi o Lami i lona aiga fou, ua amata fo’i ona vavala i le vaai a le tamaititi le auala lea o lo o fai ai o ia e le to’alua a le tuagane o lona tina, le fafine o Sei, ae ua atili ai aua e leai se fanau a Sei ma lona to’alua, talu mai le 10 tausaga o le la fa’aipoipoga. “Lami! Lami! Sole Lami, o le a lega ikuaiga moe fa’apega, gofo i luga e alu e aumai gi popo a pua’a ua leai gi popo i le umukuka”, o le fa’atonuga lea a le fafie o Sei i le tamaititi o Lami, lea o lo o moe fa’agaulua i luga o le tama’i sofa fola laupapa o lo o fa’alava i le ogatotonu o le tama’i faleo’o lea ua avea nei ma fale o le tamaititi. Na tau pulapla mata o le tamaititi o Lami ma ia iloa ai e le’i malamalama lelei le taeao, o lo o i ai lava nai vaega o lo o pogisa, se’i vagana ai le vivini fa’alau soso’o o moa a le aiga o le latou tuaoi o lo o taia i lana fa’alogo.

E ui i le malulu o le vaveao, ae na tula’i lava le tamaititi o Lami ua gaugau lona ie afu, ua fa’apito i luga o lona aluga, ona taai fa’atasi lea i totonu o le papa laufala lea o lo o moe ai, ona tago atu lea ua sili i le fata laupapa o lo o i le tala o le faleo’o, ona savali telea’i lea i le umu kuka ua aumai le amo ma le sapelu, ma sosoo ai ma le pikiina mai o lona mitiafu faigaluega sa fa’agaulua i le puipui o le umukuka ma la’a loa i uta i le talaloa e aunoa ma ni se’evae, ma si ona ie solosolo na alu atu lava ma ie i le aiga o lona tina sa nofo ai mo vaiaso e lua ina ua fa’atoa mae’a le maliu o si ona tina. E ui i le lagona e le tino o le vaivai ma le le lava, peita’i na avea le taia o lona tino i le malu o le sau o le taeao ma itu na toe fa’aopoopo ai le malosi i le tino o le tamaititi a’o savali to’atasi na o ia i le talaloa mamao, lea e silia i le 2 itula le umi e savali mai ai i le aai fa’atoa tauunu’u i fanua faipopo.

“Sole Lami, o fea e a usu po i ai e le’i kaikai se kaeao, ua e le aoga”, o le fesili lea a le fafine o Tara i le tamaititi o Lami, “Ga kuli mai a’u e Sei e avaku gi popo a pua’a, e leai, ou ke le aoga, kalu lava oga ou gofo i le kuagage o lou kiga ma loga ko’alua ou ke le’i alu lava i se aoga”, o le tali lea a Lami ma uu ona pui manava e tau to ai lona sela i lana savaliga umi, ae o le fafine o Tara i le taimi lea, ua le gagana i se upu se’i vagana ai le ofo o lona mafaufau i le tali a lenei alualutoto. “Oka oka e ia Sei ma legei mea ua e faia, aisea lava ua kuli po mai ai oe i le kalaloa ae ua le fai i se kaule’ale’a o le gu’u e sau e avaku gi kou popo fa’akau e fafaga ai pua’a. Ia vaai oe, alu age loa i le fa’apukuga popo gale a Simeki ma laga fanau e aumai ai gi popo a au pua’a, ma sau loa ka koe fo’i i kai i le aai”,