Ads by Google Ads by Google

Fagogo: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea na talatalanoa atu ai le olomatua ia Lineta, e sili atu lona  manuia i le a’oa’o nai lo Amako lea e fiafia ai i le tele o aso.]

Na avea upu ia a le olomatua ma lu’i i le mafaufau o le teineititi, ona e foliga mai e faananau lava ona matua ia nofo ma faaipoipo atu i se alii a’oa’o. Na umi se taimi o taotooto toatasi Lineta i lona moega ma faasolo ona mafaufauga i tala ma upu sa ote atu ai lona tina, ona toe faasolo lea o isi ona mafaufauga i uiga o Amako i totonu o le nuu ma le aoga, aemaise ai o lona loto alofa ma le tausaafia i totonu o le nuu, ma ua avea ai ia uiga o se itu ua faafelufesasi ai le manatu o Lineta i se faaiuga e tatau ona fai. Ua avea le faananau o loto o alii a’oa’o i tamaitai o le aulotu ma le nuu ma itu ua le utuva ai le fai ma asiasi ane i le aulotu a Lineta ona o le faanaunau lava ia faamautu ni mafutaga ma tamaitai lalelei ua ia faanaunau i ai o laua loto. O le tuanai ai o le lua masina talu ona asiasi atu alii a’oa’o ia i le aulotu lea, na la manatu ai loa ua tatau ona faatino mafaufauga o loo i o la loto ina ne’i tuai ona avea lea ma lape o i laua. O le maea ai la o le toona’i i le isi aso Sa na sosoo ai, na musumusu atu ai loa le faletua o le faifeau i le tina o Lineta e faailoa i ai le manao o le alii a’oa’o o Pegi, e fia o’o atu e faamalamalama i lana tama teine o Lineta, ma e lei uma lelei atu le musumusu a le faletua ae tali sapaia mai e le olomatua ma fai atu i ai, “Oi, e le afaiga oe le falekua, afai e figagalo i ai le susuga i le alii a’oa’o ona susu aku lea i se afiafi makou ke alala, lea foi o le a ma faakali mai.”

O le vaiaso lava lea na alu ai le a’oa’o ma le isi matai o lona aiga e faamalamalama i matua o Lineta ma talia foi e le ulugalii, ona o le la faanaunauga, afai e avea le la tama ma faletua o se faifeau, o lona manuia lena, e faamamaluina foi o ia ma faaeaina i soo se mea e alu i ai. O le vaiaso lea na vaaia ai e Amako ua sui lava foliga o Lineta i le aoga ae le masani ai, o le fia iloa e le tamaititi o le mea o loo tupu na mafua ai ona ia alu ma faafetaui le tamaitai i le isi taeao ina ua usu atu i le aoga ona ia fesili lea i ai pe i ai se mea ua tupu ua mata faanoanoa ai, e le’i tali Lineta i se upu sei vagana ai ona loimata na momoli atu ai ia Amako le feau, e tele le faanoanoaga lea o loo nofo ma le tamaitai.

“Amako, ou te manao ia e iloa o lo’u loto atoa o oe, e le toe faaluaina fo’i oe i lo’u mafaufau, ae se’i o’u sauni lelei ou te talanoa atu ia te ia ona ou faailoa atu loa lea ia te oe le taimi ma le aso ta te talanoa ai, ona ou faasoa atu loa lea ia te oe o le mea lea e mamafa i lo’u mafaufau, ae afai lava o le a se tulaga e oo i ai le ta faigauo, ia e iloa ou te alofa lava mo oe.”