Ads by Google Ads by Google

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea fai ai atu ai Lineta i lona tina, e tuu mai lo la aiga ma lona toalua sei o la toe talatalanoa i ai.]

E ui o lea ua taoto le talosaga a Lineta i ona matua e tuu mai le la aiga ma Pegi sei la toe talatalanoa i ai, peitai o le fatu lea ua toto i le loto o le fafine, ua sau lona musu ma ua sisii foi ona lima ona o uiga o lo o faaali e lona toalua i lona aiga. O se aso ese lea le faigata i le mafaufau o Lineta, e le gata ua vaai tino lava ae faaali uiga tufanua a lona toalua i si ona tina ma’i, ae o upu na tautala i ai ua atagia mai ai le faasausili, ae o le fesili o lo o tulai mai pea i lona mafaufau, na mafua aisea ona oo mai Pegi i lona aiga.?

Ua amata ona faalogoina le tausagi mai o manu i luga o laau, ua faasifo le la i lona nofoaga ae ua fotua’i mai le pogisa e faailoa mai ai ua maea galuega o le aso. “Aisea ea ua ou pologa ai faapea, amuia se fafine e pei o a’u o lo o maua lona fiafia i lo la va ma lona toalua, ae paga a’u nei e moe i loimata ae aluga i le pologa ma le atuatuvale,” o mafaufauga faito’atasi ia o Lineta ao faalagolago lava i le puipui o le latou fale, ae na te’i ina ua saofa’i atu se tagata i ona tafatafa, ma ia iloa ai, o Pegi lona toalua.

“Aisea ua e mafaufau loloto ai faapena, se aua ete tagi ae ta o i totonu o le fale ta te talatalanoa ai, ua sau fo’i le po latou ia ao lenei lava e vevesi lo tatou aiga,” o tala ia a le tamaloa na atagia mai ai e le o popole i le mea o lo o tupu. “Ua mafua oga vevesi soo le makou aiga oga o oe ma lou le ava i o’u makua e, ua le fai kasi ua le failua, a ua fai soo kele lau amio alii Pegi, ua ou le lava fo’i ogosa’i, e sili ai loa pe a alu le kagaka i le mea e loko i ai,” e fai lava tala ia a Lineta ma tu i luga ma savali i totonu o le fale, a’o mulimuli atu ai lona toalua i ona tua.

Na uma faigalotu o le afiafi, sosoo ai ma taumafataga o le po ma faasolo atu ai ina momoe le nuu ae o lo o fai lava le talanoaga to’alua a Lineta ma Pegi i totonu o le la fale. O le alofa o le fafine i ona matua atoa ai ma le va ma le nuu, na i’u ai loa lana filifiliga o le a faamuta le la ulugalii ma Pegi, faatasi ai ma lana talosaga mulimuli, “Pegi, ua ou iloa lou le alofa ia te a’u ma lo’u aiga, ae ui i le mafatia ai o lo’u loto, o le a ou inu pea i ai leaga o oe na filifilia e o’u matua, ae le o so’u loto, pau la’u tala, o le aso ua muta ai lo ta aiga.” Talu mai le aso lea e lei toe fevaaia’i Pegi ma Lineta ae ua maua ai foi ma le fiafia i totonu o le aiga o le teine ma nai ona matua ina ua mafai ona fai e Lineta le faaiuga e uiga ia Pegi lona toalua. O le faaiuga foi lena o le tatou tala faasolo, manuia le faaiuga o le vaiaso.