Ads by Google Ads by Google

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea na toe fai ai foi le ote  a le olomatua le tina o Lineta ia Pegi, ae na o le faasagasaga lava o le tamaloa i fafo o le fale, pei e le kea i le olomatua.]

“Vaai oulua makua, o lo o kele le avagoa e mafai ai oga koe sui le lua faaiuga i le ma aiga ma Ligeka, ua ou le lava faalogo aku i gei mau kala ua sooga lafo mai, ae ou ke le’i sau i se pogisa ia ke oulua, ga ou sau i le malamalama, lea foi ga oulua kaliaiga a’u i le malamalama, ae aisea la ua lua koe feau mai ai mea sa kukupu i aso ua ke’a, afai o lea, ua lelei, vaai le kou Ligeka gale, ae o a’u o le a ou koe fo’i i lo’u aiga....” e lei uma lelei atu le gaogaosa a Pegi ae na pei o le a le toe oso mai o le olomatua ma lona ita tele, “Eh kaigoigo e, sei vaai i le fia kagaka o lea pua’a, e okegia aku ae oso i le fia faalii ae poo ai ga ia e kali mai ia ia ke a’u, eke iloa la alii Pegi, ua e vaavaai la i lou oki, sei loga e kao oe i le umu eh, isa, puaa,” o upu ia a le olomatua na lafo atu i le tamaloa ma tu lava i luga, ona tau sulu lea o lona ie ua tau pau ma savali agai i le fafo o le fale ma faaauau atu ai i le umukuka, ae o le toeaina o Gogolo i le taimi lea, ua le toe lagona sona leo, ae ua na o le nofo lava ma faataupupula ia Pegi ma le mea ua ia faia, ae o Lineta, e na o le tagi lava ma punou i lalo, ua le iloa e lona mafaufau faavasega mea nei ua tutupu i lona aiga.

O le alofa tele o le teine i lona tina, o lea na tu ai loa i luga ma savali atu i le umukuka e tuliloa le olomatua sei tau faatoa filemu lona mafaufau, ae ua atili ai le olomatua i lona ita tele.

“Se mama, onosa’i lou loto, taatia mai ia te a’u, faitalia a’u ma fai se tala i le tamaloa, ae onosa’i lou loto, aua nei avea lenei mea ma mea e te ma’i ai, alofa mai i o’u mata faapea ai si toeaina ua le tautala ona ua ofo lona loto i le mea ua tupu...” o le talatalanoa atu lea a Lineta isi ona tina ma la faauouo ai lava i le mea o lo o la tutu ai, ae o Pegi o lo o nofonofo lava i totonu o le fale ma faasagasaga i le toganiu o lo o siomia ai le fanua.

“...vaai oe mama, ua ou iloa ua lua mafatia ona o uiga o Pegi o lo o faaali i totonu o le aiga, ae tatau foi ona lua malamalama, o le tagata lenei na lua filifilia e fai ma o’u tofi, lea foi ua toe faasaga tau mai i le aiga, ae vaai oulua, e faigata foi ona toe sui sa’u faaiuga i le tamaloa, leaga o lo’u tofi na aumai e le Atua, ae taoto mai lou fanoga se’i o’u toe talanoa lelei i le tamaloa ma toe fai sa ma tala i le lumana’i o le ma aiga.”