[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai ina ua taunuu i le fale o Pusa taulele’a sa latou sailia Pegi, ma latou fasi loa le tamaloa ina ua latou maua atu i le fale e aunoa ma nisi upu na toe talanoa i ai .]

Na avea le faateia o Pusa i le gaioiga a taulele’a lea ua fai ma itu na pei e gugu ai le alii ma sioa a’o pe’ape’a lima o le au alii ia i le fasiga o Pegi. “Sole, faakali, faakali,” o le oso atu lea a Pusa ma taumafai e vaovao taulele’a a’o Pegi i le taimi nei, sa na o le tafiti solo i luga o pulu ia na nofo ai ma ufiufi ona foliga i ona ogalima lautetele e aunoa ma se upu na tautala i ai. “O ikuaiga fai’ava gei se’i loga e kao i le umu faakoa sagakogu le mafaufau,” o le tala lea a le alii o Meki, o se tasi o taule’ale’a o lo o i ai i le fasiga o Pegi.

O Meki, o le atalii o le uso laititi o Gogolo le tama o Lineta, o ia ma lona uso matua sa taulamua i le tau sailiina o Pegi poo fea ua sola i ai.

Sei o tatou liliu atu lava i le fono a le nuu lea ua lamalama faaiu. Na ona maea lava o le taumafaga sa fai mo le fono a le nuu, saunoa faafetai loa toeaiina matutua agai i le toeaina o Gogolo e tusa ai o le faalavelave, ae taotaotua atu ai fautuaga ina ia faamagalo se sese o le toalua a lona afafine, atonu o le ‘ona na mafua ai ona laulau vavale le tamaloa i le po na tupu ai le faalavelave. E lei tali le tamaloa i se tala sei vagana ai le ata ma luelue ulu atu i fautuaga a isi toeaiina o le nuu, ma lulu lima ai loa ma faatofa le nuu ina ua oo i le afiafi.

“Faafekai aku ia ke oe si o’u afafine ma oukou uma sa gafa ma le kaumafakaga a le guu i legei aso, o le vavave o kou gaioi ga mafua ai ona kafa le faaiuga a le guu, a’o le mea mogi lava ia o le a faasagasaga mai kulafale e lafo mai le ululu o le laau i le kakou aiga, kalu ai lava lou ko’alua ua ova le le mafaufau,” o le talatalanoa atu lea a le toeaina o Gogolo i si ona afafine o Lineta a’o la savavali to’alua i luga o le auala e aga’i i lo latou fale. E tiga ona lagona e le teine le le talafeagai o tala a lona tama, ae sa faigata ona tali atu i ai leaga o lona tama, ae o le mea moni lava ia, o ona matua na mafua ai ona la nonofo ma le tamaloa lea ua la nonofo nei, ina ua la talia le taimi na alu atu ai Pegi e faamalamalama atu i le latou aiga, a’o avea Pegi ma A’oa’o Malua. E fetaui lava le taunuu atu o le savaliga a Lineta ma lona tama i le magatolu lea e afe ai le auala i uta i fanua galue a le nuu, ae o la vaaia se tagata o lo o tamo’e mai i uta i le talaloa ae o loo tuliloa mai e taulele’a o le nuu, ma le te’i o Lineta ina ua manino lana vaai, o Pegi lea o lo o tamo’e mai ae o loo tuli mai e taulele’a o le nuu.