Ads by Google Ads by Google

FAGOGO: O OE NA FILIFILIA E O’U MATUA

Vaega #10

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea na toe fetaui ai le tama o Amako ma le fafine o Lineta i le taulaga, ina ua usu atu Amako i lana galuega.]

O le puupuu o le taimi lea ua fetaui ai Amako ma Lineta, na vave momotu ai loa e le tama le la talanoaga ina ua ia vaai atu i le uati, ua toe 10 minute ta le 8:00 e amata ai lana galuega. “Faletua, manaia le ta talanoaga i lenei taeao, ae fai foi o le naunau atu, ae paga lea ua lata mai le taimi e amata ai le galuega, ae talosia ae toe maua se isi feiloaiga ma oe i se taimi, ona toe faaauau lea o talanoaga ma toe faamanatu tala o aso la, ae a maua se avanoa ta te fai ‘aiga ai ma oe i se faleaiga, o le ula lena o faigamea o le aso,” o le tala lea a Amako na fai atu ia Lineta, lea foi na talia e le fafine ma la lulu lima loa ma faatofa.

Ua ese le vaai a le nuu ma le tupulaga ia Pegi i le taimi na toe fo’i atu ai i lona aiga, e le gata ua faifaiupu i ai le tupulaga, ae ua pei lava o se tagata ua aveese mai ai se mamalu na nofo ma ia. “Sole Pegi, a e gofo mai ea ae le alu e su’e sau galuega e k ausi ai le ka aiga, e le mafai oga ka gogofo faapegei i lou aiga e leai se lumagai lelei e maua mai ai, aua afai o le faiga lea, e sili ai oga ou koe fo’i a’u ia i lo’u aiga, e saili se galuega e kausi ai o’u makua ua makukua foi laua,” o le tomumu atu lea a le fafine o Lineta i lona to’alua, peitai o Pegi i le mea lea ua i ai, ua le ese ma se tagata ua leai sona faamoemoe, ma ua manatu ua sili ai lava le olaga lea ua ola ai atonu e maua ai se isi fiafia mo ia.

E le’i iloa e le nuu le mafuaaga ua toe fo’i atu ai Pegi ma lona to’alua mai le aoga faa faifeau, na pau le manatu o tagata, ua le pasi le ali’i a’oa’o i lona tausaga mulimuli, atonu o le pogai lea o lona toe fo’i atu i lona aiga. “Mea lea e maua i le kaisi ma le moa, lea la ua oo i kaimi o suega faai’u a le vaega faau’u, ae o lea ua oki mai ai le kakou kama o Pegi alii, loga uiga ua maualuluga kele aoaoga a le aoga faa faifeau ae vaivai le mafaufau o le kakou kama, a ea alii,?” o le talatalanoa toalua lea a le alii o Meki ma Oli, o uo mamae lava ia a Pegi i lana tupulaga. Ua le iloga se vaipanoa e alu solo i ai talanoaga a le tupulaga e uiga ia Pegi, o isi ua talanoa i le aoga ae o isi ua talanoa i le auala na mafua ai ona nonofo ma Lineta, ina ua fai e matua o le teine le faaiuga e faaipoipo le la tama i le a’oa’o, a’o lenei ua tua leaga le laau sa la fafauina. Ae ui i le tele o manatu ma tala a tagata o le nuu, ae mo Lineta lava ia, e leai nisi tagata na te tuuaia, sei vagana ai lava ona matua, o i laua ia na filifilia Pegi e avea ma ona to’alua, ina ua la iloa o ia o se a’oa’o, peitai lea la ua matafi ese atu le upu a’oa’o sa ufiufi ai Pegi, ae ua aliali moni mai ai loa ma le ituaiga tagata tonu lava e i ai o ia. Pau le iuga lea ua fai e Lineta, o ia o le a toe fo’i i lona aiga i Amouta.