[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua alu atu ai Pegi e vaai le pule aoga.]

E fai lava tala a le alii a’oa’o o Pegi ma savali faanatinati atu lava i le Ofisa o le alii pule ae o Lineta i le taimi lea, ua saofa’i ifo nei i luga o le nofoa e faatali le toe fo’i ane o lona to’alua lea ua alu atu e vaai le ofisa o le pule aoga. “Susu mai totonu,” o le valaau ane lea a le pule aoga ia Pegi, ona ulufale lea o le alii a’oa’o ma faagasolo loa le la talanoaga o le taeao, ma o se itu na faateia ai Pegi ina ua manino le mata o le vai, o latou ma isi a’oa’o na aia inati a faifeau na maua mai i taligamalo a le pulega sa fai, ma ua maea ona faailoa e isi alii a’oa’o, o ia lava lea sa taulamua i le tonu atoa sa fai ma ua maea foi ona faia le faaiuga i alii a’oa’o e to’alua na muamua atu ia te ia.

“E leai lava se isi faaiuga ua ou tuuina atu, sei vagana ai le faamalolo o oe ma le aoga, e le toe maua se isi ou avanoa, e pei foi o le faaiuga lea ua ou tuuina atu i alii aoao e to’alua na muamua mai,” o le faatonuga lea a le alii pule aoga ma savali atu ua tatala le faitoto’a ae faasino lona lima i fafo. “Pe i ai lava se isi avanoa se tasi mo a’u lau susuga,” o le aunagi atu lea a Pegi peitai sa tumau lava le tali a le pule aoga, o lea na ia tu ai loa i luga ma savali loa i fafo ma le ofisa. “Makua vave foi le lua fogo ma le pule aoga, e i ai se mea ua kupu ua e maka faagoagoa mai ai,?” o le fesili fia iloa lea a Lineta i lona to’alua, ae o Pegi i le taimi lea, ua na o le nofo i luga o le nofoa ma ona foliga e pei o se tagata ua leai se faamoemoe, ma te’i ai lava ua maligi ona loimata, ua tagi, ma ua tagi leotele lava.

“Sole Pegi, e le mafai oga ou iloaiga le kulaga mafakia ua e oo i ai pe afai e ke le kalagoa mai, e i ai se mea ua kupu ua e kagi ai faapega, kalagoa mai.” o le augani atu lea a Lineta ma lona loto na te fia iloa le mafuaaga o le tagi o lona to’alua. Na umi se taimi o faatali le fafine i se tali a lona to’alua, ana le seki lava le mafaufau o le ali’i o Pegi e le talanoa i lona to’alua ma faailoa i ai le faaiuga ua oo ia te ia atoa ai ma isi a’oa’o e to’alua. “O a’u ua tuli ma le aoga, o lona uiga foi ua muta ai iinei ma le ta avanoa e avea ai i taua ma auauna a le Ali’i mo lana galuega,” o upu ia na tautala atu ai Pegi i lona to’alua, ona toe faaauau lea o lana tagi, ae o le fafine i le taimi lea, ua pogisa atoa lona mafaufau, ua le iloga se lagona e fetuleni atu ia te ia, e fai o lona mafaufau i le taimi na talia ai e ona matua le faamalamalamaga a le alii a’oa’o lea ua avea nei ma ona to’alua, ae o le la mafutaga ma lana uo o Amako i le aoga, peitai na faaselemutu ona o le tagata na filifilia e ona matua. “Afai o le taunuuga lea o lo’u olaga ona o le filifiliga sa faia e o’u matua, aisea ou te toe saga nofo ai ae ua ou le alu ese loa ma saili se isi o’u lumana’i,” o mafaufauga fai vavale ia na oso a’e i le loto o Lineta.