Ads by Google Ads by Google

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea na toe tali atu ai le tamaititi o Amako ia Lineta e ta’u atu le mea o loo fia talanoa atu ai ia te ia.]

“Aisea e te faatuai ai ae le ta’u maia lena tala se’i o’u faalogo atu i ai poo le a,?” O le fesili naunau atu lea a Amako ona toe tago atu lea o lona lima ma uu mai le isi panikeke mai totonu o le pepa o loo taatia i lo la va ma Lineta ma ai, ona vaavaai i le fegasoloa’i o tamaitai aoga i le malae ma latou meaai, o isi e savavali taitoa tolu, taitoa lua foi, ae o isi e feofeoai taitoa tasi lava. “Amako,” o Lineta lea ao faasaga atu i foliga o le tamaititi, ma ona lima uma e lua i le alofi lima lautele o le tama o loo pito atu ia te ia, “Ou te iloa e le mafai ona ou faia se mea e le tusa ai ma le mana’o o o’u matua, ma, o le vaiaso na te’a nei na talia ai e o’u matua le faamalamalamaga a le ali’i a’oa’o o Pegi na alu atu i le matou fale, ina ia avea a’u ma ona soa i le galuega a le Ali’i, e le o so’u loto ae o le mana’o o o’u matua, ua ou usita’i fo’i i ai...” o le tala faaumiumi lea a Lineta ao maligi faavai ifo loimata o le tamaititi o Amako i le ootia o lona loto, ona sa i ai lona manatu o lona lumana’i Lineta, ua tele foi tausaga o le la mafutaga, ua iloa uma fo’i e le to’atele o le latou nu’u e oo lava i ona matua.

O aso fiafia i le faaiuga o le tausaga lea na i’u manuia ai le aoga a le tamaititi o Amako ma ua maua lona avanoa e ulufale atu ai i le aoga faa faiaoga, ae o Lineta ua sauni lana faaipoipoga i le masina lea lava ma le alii a’oa’o o Pegi, o le na filifilia e ona matua, ma o uluai masina o le ulugalii a Pegi ma Lineta na amata ai ona toto i le loto o le teine uiga le alofa ma le leaga o le alii lenei ia te ia ma lona aiga, o se a’oa’o foi e ese lava le ituaiga olaga e ola ai, e le tutusa uma foi ma amio ma olaga a isi a’oa’o o le aoga faa faifeau.

Ua nonofo nei Lineta ma Pegi i fale o a’oa’o i totonu o le lotoa e faatali ai le tausaga mulimuli o Pegi i le aoga faa faifeau, peitai i le isi taeao ao sauni le ulugalii e agai atu i le aoga na tete’i ina ua tu’itu’i mai e se tagata le faitoto’a. “Susu mai i totonu,” o Lineta lea ina ua ia vaaia se tasi o alii a’oa’o o loo tu mai i fafo. “Lau susuga Pegi ma le faletua, na ou oo mai e momoli mai le tusi mai le alii pule aoga, o loo manaomia oe i le Ofisa i le taeao nei mo se mataupu e fia talanoa atu ai ia te oe,” o le faamatalaga lea a le alii a’oa’o, ona ia tuu atu lea o le tusi ia Lineta o loo pito atu ia te ia e tuu i lona toalua, ae ua tu i luga ma savali i fafo ma le potu. “O le a lena tusi ae o le a foi se mea o fia talanoa atu ai le pule aoga ia te oe alii Pegi,?” o le fesili fia iloa lea a Lineta, “Ou ke le iloa poo le a se mea o fia kalagoa mai ai le pule aoga ia ke a’u, ou ke le’i iloaiga foi pe sa i ai sa’u mea sese sa fai ua mafua ai legei poloa’i, ae faakali aku ae se’i