Ads by Google Ads by Google

FAGOGO: O OE NA FILIFILIA E O’U MATUA

[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea ua talia ai e matua a Lineta le savali a le alii a’oa’o ia Pegi, e fia faaipoipo i le la tama teine.]

Na ona maea lava o faiga lauga a le toeaina ma le tulafale na o atu ma le a’oa’o, faamavae loa o le a toe fo’i, ae na te’i Lineta ina ua iigi e lona tina lona vae ma musumusu atu i ai, “Ku i luga e faamavae i le a’oa’o o lea o le a koe fo’i.” E le’i usita’i le teineititi i le faatonuga a lona tina, ae na ona tu lava i luga savali loa i fafo o le fale ma taamilo ane ai i le faitoto’a pito i luma ma ona gutu ua faauu e le fia ata i se isi, ae o le taimi foi lea na savali atu ma le alii aoao ua tu i luma o le teine ona faapea atu lea i ai, “Ou te iloa o lea ua talia ma le agaga faafetai e ou matua lo’u o’o mai i lenei aso, ona o le faanaunauga e fia avea oe ma soa mo a’u i le galuega a le Ali’i, ae ou te faamoemoe o se taimi o i luma ona maua lea o se isi ta talanoaga, ae o le a ma toe savavali leaga e mamao foi le pito nuu ma te o mai ai,” o le talatalanoa atu lea a le alii a’oa’o o Pegi i le tamaitai o Lineta e ui e aunoa ma se sagisagi fiafia ane i ai o le teine i lana talanoa atu, sei vagana ai lona faapea atu i ai, “Ua lelei Pegi, fai lena tonu.”

“Siaula Lineta, ua ese lava la’u vaai ia te oe i lenei vaitaimi ua e mata faanoanoa lava, ou te le iloa pe i ai se isi auala e mafai ona ou toe faia ina ia toe faafoi mai ai foliga fiafia sa e masani ai, ae o lea lava foi ou te faatali i le mea lea sa e mana’o ete fia talanoa mai ai ia te a’u, o i ai se mea o tupu ia te oe ae se’i fai pe mafai ona ou fesoasoani atu i ai,?” o le fesili naunau atu lea a Amako ia Lineta ina ua la fetaui i luma o le fale ai a le aoga i le taeao o le aso Gafua. E lei tali Lineta i se upu sei vagana ai le toe suia o ona foliga faauu i le mata ataata ina ua ia toe vaaia le tagata o loo faananau i ai lona loto, o se uo mamae foi ia te ia. “Ga ua ke’i a ua e le kali mai ae ga o lou akaaka mai eh,” o le toe oso atu lea a Amako ma tago atu lona lima ua uu mai le lima o le tamaitai ma la savavali toalua lea i lalo o le Pulu lea o loo nofonofo mai ai isi tama ma teine aoga ma ai a latou meaai o le taeao, e faatali ai le taimi e ta mai ai le logo amata o le aoga.

Na ona saofafa’i ifo lava i lalo o Amako ma Lineta, tatala loa e le tama lana ato aoga ae aumai i fafo le pepa panikeke sa ia faatauina mai i le maketi ma la aai ai loa. “Pei lava ou te ai fasipovi masina ma se umu luau ina ua ou toe vaai atu ia te oe i lenei taeao, pei lava e lua tausaga lea na ta valavala ai mai le faaiuga o le vaiaso, a ea?” o fika ia a Amako ae na o le ata o Lineta ma tago atu ua po le lima o le tama ona fai atu lea i ai, “Ou te misia lava oe i au tala malie na e masani ona fai mai, o le mafuaaga foi lena ou te sagisagi mai ai lava ou te fia oo mai i le aoga, ona ou te fia vaai pea lava ia te oe, ae vaai oe Amako, aua ete ita pe afai ou te faasoa atu le tala lenei ia te oe, aua foi ete manatu ua ou agaleaga ia te oe,” o le tala lea Lineta na uma faafuasei ai le aiga o le panikeke a le tama ae ua nofo sa’o a’e nei i luga ma fai atu i le teine, “talanoa mai, o le a lena tala?”