[E toe faatalofa atu i uo ma paaga masani a  le tatou polokalame i lenei vaiaso, ae alo maia o le toe faaauauina lenei o le tatou polokalame mai le vaiaso na te’a nei, lea na gata mai i le taimi lea na toe augani atu ai le tama o Amako ia Lineta e faasoa atu i le taimi lava lea lagona o loo mafatia ai lona loto, ae aua le toe faatali i se isi taimi.]

“Lineta, aisea lava ete faatali ai se’i oo i se isi taimi ona e talanoa mai lea ia te a’u ae a lenei taimi, faasoa mai le mea lena e mamafa i lou mafaufau ina ia ou malamalama ma iloa le mea o loo tupu, aua afai ae e faasoa mai i le taimi nei, ona faa faigofie ai foi lea ona ou malamalama i le avega lena e te nofo ma oe,” o le naunau atu lea o le tamaititi o Amako i le tausala peitai sa tumau pea le manatu o Lineta se’i i ai se aso ona ia faasoa lea o le mea lea o loo mamafa i lona loto. Na taape le talanoaga a le toalua lea i le aso ma le mau fesili i le mafaufau o Amato, pe i ai se mea tuga o taumatai le tamaitai e faailoa atu ia te ia.

“Vaai suga Ligeka poo ai le la e uou ai maile te’i ua ai se kamaikiiki,” o le valaau atu lea a le toeaina i lona afafine, ae te’i i le faapea mai o le olomatua faataulaitu, le tina o Lineta, “Auoi, pei lava o le a’oa’o ma loga aiga lea ua o mai,” e fai lava tala a le olomatua ma tu atu i luga ua tapena toe faamatagofie mai le pito i luma o le latou fale, ona nanati atu lea o lana savali i le fale taele ma tu’itu’i le faitoto’a ona valaau atu lea, “Suga Ligeka, faakopekope lau kaele o lea ua o mai kagaka i le fale,” ae o le taimi lea e le’i lagona lava e le teineititi se tala leaga o lea e pao le paipa, ma le isi mea, o lea lava e tu le teineititi i le faata o le fale taele ma feliuliua’i ai ae o lona mafaufau atoa o Amako.

E le’i umi ona saofafa’i matua o le teineititi ma le alii a’oa’o o Pegi lea na o mai ma le isi matai tulafale a lona aiga, ae saofa’i atu loa i lalo ma le tamaitai o Lineta i tafatafa o lona tina, ma na pei e puni le manava a le alii a’oa’o ina ua ia vaaia le lalelei o le tamaitai i ana teuga o loo fai aemaise ai o lona lauulu sasa’o i lalo. Na umi se taimi o tau faailo e le tulafale le pogai o le la savali peitai i le faaiuga, na manino ai le mata o le vai, o le alii a’oa’o ua fia faauo i le tamaitai o Lineta e avea ma soa o le galuega a le Alii i le lumanai. “Ua lelei, o le iku kaua o lea ua mae’a oga faailo le auku o le lua savali, ma ua gofo ilo fo’i le aiga gei e kusa ai o le lua o’o mai, ae faapegei lau susuga i le alii a’oa’o, o lo ma aiga e ese fo’i loga faavae mai isi aiga uma o Samoa, e le faia se loko o mea gei o fagau, ae o le kulaga o le lua oo mai, ua ma kalia ma le olomakua lou fagoga alii Pegi, iga ia avea Ligeka e fai ma ou soa i le galuega a le Alii,” o upu faaumiumi lea o le lauga a le toeaina na nofo lelei i le loto o le alii a’oa’o, lea fo’i na toe lagolago atu i ai olomatua e faamausali ai i le mafaufau o le alii a’oa’o, ua la lagolagoina uma le mea e pei ona oo atu ai i lo la aiga, ae o Lineta i le taimi lea, sa na o le punou lava i lalo ma ona loimata ina ua ia iloa o lea ua faaleo e ona matua le filifiliga sa tatau ona ia faia mo lona lava lumanai manuia.