Ads by Google Ads by Google

FAGOGO: O LE TAMA O LE CIA

Ua ese le tulaga fiafia lea ua i ai Eteuati ina ua maua faasoloatoa lona avanoa i totonu o le lotoa, aemaise ai o lea ua amata ona pei lava o ia o le isi tagata o le aiga i le vaaiga a le au leoleopo, e oo foi i totonu o le faalapotopotoga a le Banking Cooperation, ua avea ai nei o ia ma se tasi o pule i le vaega e ao mai ai nonogatupe e faaaogaina ai auala faaonaponei, ma ua atili ai lava le alofa o le tamaitai o Sera i le tama o Eteuati i lona faamaoni toe faatuatuaina i le taulimaina o tupu, o ia foi o se tagata e faigaluega lelei i le vaavaai a sui matutua o le faalapotopotoga. O se alii e le tau faatonuina i lana galuega, ae tasi lava lana vaai ona iloa le auala e faatino ai lea galuega.

E le'i iloa e Eteuati ua si'i lona tulaga i totonu o le Banking Cooperation, na te'i lava i le sau o le feau o loo mana'omia o ia i totonu o le potu fono, ae alu i totonu o loo nonofo mai toeai'ina uma e toalima, o i latou ia o lo'o i ai i le komiti latou te faia fa'aiuga, lea e ta'ita'i ai le toeaina o Selefuti. "Talofa, o a'u lea o loo fa'auluulu i ai le komiti faafoe o le Banking Cooperation, ua matou iloa nei lou agava'a ma lou fa'amaoni, o le mea lea ua si'itia oe i le vaega lea o le Broker Division, o oe o le e vaaia le vaega uma lena, ma o oe e maua mai ai fa'aiuga i totonu a'o le'i aumaia i fono i aso Gafua uma. Ma o le a si'i fo'i lou totogi, o oe o le a aofia i totogi o Pule uma o vaega ta'itasi i le ta'i $200,000 i le tausaga." Na te'i Eteuati i le la'asaga tele lea ua o'o nei i ai lana faigaluega i le vaai a le Banking Cooperation, ae maise le vaega lea latou puleina le faalapotopotoga.

O le Banking Cooperation o se Kamupani na amata mai i le 1825 i totonu i Italia, e le tuaa o le tuaa a le toeaina o Selefuti, ma isi tuaa a le isi toafa lea e i ai e totonu o Komiti fa'afoe, o le 13% o sea a le kamupani e alu i le 'au vaega lena, ae o Selefuti e 30% ae o le isi 8% e ave i isi tagata faipisini. E o'o mai i le taimi nei, o penefiti uma a le kamupani ma latou aseti (assest) e tusa lea ma le $25 piliona, o le latou polofiti i le tausaga e $120 miliona, ma a latou tupe e fa'aalu i suega tupe (charity) i tausaga ta'itasi, ae maise ai le suega tupe e fesoasoani ai i le togafitiina o gasegase e pe i o le kanesa, aveina o tamaiti i atunu'u vaivai pei o Filipino, Initia, atunu'u Aferika, ma atunu'u o le atu Asia, e tusa lena e toe alu i ai le isi $35 miliona i le tausaga.

E fai lava le si'itiaga lea a le tama o Eteuati, a'o la e nofonofo lelei lava le teine o Sera e tusitusia uma mea mo le isi fono pe a fa'atasi uma le komiti fa'afoe. Na ona ta lava o le 12:00 i le aoauli o loa le le tama o Eteuati ma Sera i le la faleaiga masani i totonu o le taulaga, o le tasi fo'i lea faleaiga a le teine o Sera ma aai ai i le aoauli.  Na su'esu'e atu e le vaega ina ua tolu masina talu ai, ua fa'aletonu mai lava le sau i totonu o o le totogiina o tupe o loan a isi kamupani tetele. "sa tau fa'aletonu lava la'u fa'alogo ina ua talanoa le komiti fa'afoe, ma tau mai ai ma lou igoa i le toatolu lea o le faia i ai le filifiliga mo se taitai fou o le vaega e vaaia nonogatupe toe totogi mai a kamupani tetele." a le tala fiafia lea a Sera ia Eteuati ao alo i le la taligasua o le aoauli.

"Ae ete iloa alii Sera, ai o le mea tonu lea sa fai lava a'u galuega ou te le'i manatu mamafa i le fono a le komiti, ae naou te'i ina ua telefoni atu toeaiina fai mai ou te alu atu i totonu o le potu fono, ma ua ou tau popole ai ona ua manatu nisi, atonu ua faaituau le filifiliga a le komiti ona o taua lea e feoa'i, a ea?" o le talatalanoa atu lea a Eteuati ia Sera i totonu o le faleaiga.