Ads by Google Ads by Google

FAGOGO: O LE TAMA O LE CIA

Ua maua nei e le tama o Eteuati le mea e faigofie ai ona alu i lona fale ma toe sau i fafo, aua o le lotoa atoa e le mafai ona sao atu ai se isi i totonu ona o le tele o le pa lea e siosiomia ai.

E tasi lava le auala e mafai ona alu atu ai i totonu ma toe sau ai i fafo, ma o luma o le faitotoa, o lo'o i ai le 'au leoleopo i luma, e ta'i 20 minute ma siaki e le au leoleopo le fale ma le lotoa.

O le lelei ia o le vaaiga e le au leoleopo o totonu o le lotoa, e o'o i tagata faigaluega i totonu o le lotoa, e siaki uma o latou I.D card ma su'esu'e uma a latou ato o loo ave i totonu o le lotoa.

Ae o le mea tonu lava lena na talia ai e Eteuati ina ua fai atu i ai Sera e alu e nofo i le isi fale o loo i tua o le fale tele a lona matua, ina ia mafai ai ona ia vaaia uma tagata e agai atu i totonu o le lotoa faapea ai ma meaola.

O taavale uma lava e ulufale i le lotoa, e siaki uma ID o ave taavale atoa ai ma le suesue poo fea le kamupani e sau ai le taavale. E oo i taavale a kamupani kiliva faguvai, e siaki uma e leoleopo ina ia mautinoa e leai se mea faaletonu o tulai mai.

E oo foi i tagata faigaluega i le kamupani lea e galulue ai Sera ma Eteuati, e le mafai ona e faigaluega pe afai ua leiloa lou ID, lona uiga e te malolo i le vaiaso atoa sei vagana ua uma ona toe pu'e lou ID fou ona faatoa mafai lea ona e faigaluega, o auala uma ia sa faatulaga e le toeaina o Selefuti ma le olomatua o Tiana.

O tagata faigaluega uma lava, e tutusa uma le faiga e le ulugalii, na ona ta lava o le 12 i le aoauli, malolo loa i le fale o loo i tua, ona pule lava lea o le tagata pe moe pe matamata i le TV, pe faitau foi sau tusi, ao faatalitali ai le taimi e vela ai le meaai o loo pisi mai ai le au kuka.

O le olomatua o Tiana, e i ai lana faleoloa tele lava i le taulaga, ma o aso uma lava e alu ai e vaai lana aufaigaluega o loo galulue ai, e momoli e le limosine tele lava le olomatua i lona faleoloa, ae a afa loa le fa i le afiafi ona tapuni loa lea o le faleoloa, siaki uma tupe sa maua i faatauga o le aso ona avea lea i le ofisa o le olomatua e teu ai, a maea, ona teu loa lea i totonu o le sefe faapitoa lea e na o le olomatua lava na te iloaina le numera e mafai ai ona tatala, e faatali ai le taimi e ave ai e teu i le teugatupe a le kamupani e faaigoaina o le Sera-n-Fasion.

E faia pea.