Ads by Google Ads by Google

FAGOGO: O LE TAMA O LE CIA

vaega #3

O le tausaga lea ua te'a na tusi ai le tama o Eteuati e fia faigaluega i totonu o le Banking Cooperation lea e i Italia, ma tepana ai loa e le CIA lana tusi apilai, le tusi lea na fai e le CIA, na tape uma ai lona igoa atoa ma le talaaga moni o lona olaga, ae ua sui lona igoa ma talaaga uma o lona olaga, o ia na fanau i Siamani, ae o le ologa aoga na aoga i Amerika. Na fa'au'u mai o ia i le Univesite o le Harvard University i Mass mo le fa tausaga, ma maua ai lana B.S kikeri (degree) i mea tau tupe.

Ua fai le maliliega a le Univerite ma le CIA, i luga o le fesoasonai a le Univesite e faia e le 'universal espionage. Ua atoa le tausaga ma le ono masina talu ona faigaluega le tama o Eteuati i lana galuega fou lea, o se tagata e lelei tele i le mea tau su'etusi, le mea tonu lena na tofi i ai o ia e le CIA e galue ai. O le mea muamua lava na fai e Eteuati, o le fai ia lelei ona uiga i totonu o lana galuega ma avea ai loa ma 'supervisor' i le itu tau nonogatupe e oo atu i le faitau miliona ma miliona le aofa'i.

O le isi mea sa maitauina e le tama ao i ai i lana galuega fou, e na o le tasi lava le teine e failautusi i se tasi o toeaiina o le board o ia lea o Sara, ae o isi uma failautusi o fafine ua tai 60 tausaga le matutua, ma ua silia i le tai 30 tausaga o galulue ai i galuega ia, ona taumafai loa lea o le tama e saili se auala la te fetaui ai ma le tamaitai o Sara ma oo ai loa i le isi aoauli i taimi o malologa, na faataga alu atu ai le tama o Eteuati i totonu o le faleaiga lea ua alu atu i ai Sara e faatau ai.

Sa faataga fai le telefoni a le tama ma savali sao atu i le itu lea e nofo mai ai Sara, ae o le taimi foi lena o loo fai ai le telefoni a le tamaitai, ma faataga lavea ai lona lima i le ipu kofe a le teine o loo uu, ma masaa uma ai i luga o lona ofu ma leaga ai. "Oi, malie lou loto, ua e afaina," o le tala lea a le tama ma tago atu lona lima i le lima o le tamaitai, ae o Sala ua oso faalii ma fai mai, "Vaai mai lava ou maka ...." Na motu faafuasei le tala a le teine ina ua ia iloa lelei atu o Eteuati lea na masaa ai lana ipu kofe. "Malie lou finagalo ou te lei iloaina mai oe, ua mua ona alu lou ulu i la'u telefoni ae galo ai oe lea ete tu i le itu lea," o le tala lea a le tama.

"E le afaina, aua ete popole e uma lava toe sui lo'u ofu,ma toe faatau mai se isi au kofe," ae toe oso atu le tama, "aumai ou te faatauina lau ipu kofe, e faasusu pe leai,?" ae toe tali atu le teine, "Se, e le afaina, faitalia a'u ma faatau mai." E fai atu lava tala a le teine ae valaau Eteuati i le teine faatau oloa, "aumai lava se isi ipu kofe faamolemole," o le valaau atu lea a le tama ona saofai ifo lea i lalo ma faapea atu i le teine, "O lo'u igoa Eteuati, ou te faigaluega i le Banking Cooperation lea e i tu i sisifo o le taulaga," na ata le teine ma tali atu, "Talofa Eteuati, o a'u o Sara, ou te faigaluega foi i le kamupani lena, o a'u o le failautusi  a Selefuti, e te iloaina le tagata lea ou te fai atu ai,?" o le fesili lea a le teine ia Eteuati.