Fa’atalofa atu i le mamalu o le atunu’u, i lou alafa’i mai i le manuia i lenei taeao fou, o se taeao toto’a, taeao manino i le alofa ma le agalelei o lo’o tatou Tapa’au i le lagi. E ao ai ona o tatou fa’apea ifo, “Le Atua mamana e, o ai ea o le a o matou o i ai, o lo’o i a te Oe upu o le ola, fa’amanuia ia i matou uma i lenei aso, ona o Lou Suafa Iesu Keriso, Amene.”

Ua fa’aauau pea le galuega ua feagai ma Fitafita o le Ami a le Malo Tele, i le tapeina lea o manuki o lo’o i totonu o le nofoaga o le kamupani a le Hazelton Washington i totonu o Reston. O lea galuega, o lo’o ta’ita’ia e Jerry Jaxx ma le ali’i foma’i o Eugene Johnson. O se galuega fita ua feagai nei ma i latou, ona e fai o le vevela atoa o le fale, ae ia fa’aitete lava, ina ne i i ai se fa’alavelave e ono tupu mai. Ua uma fo’i ona fai le fa’atonuga a Jaxx, o Johnson fa’apea ma Haines, ia galulue fa’atasi, ma siaki e le tasi le isi i taimi uma o lo’o faia ai le galuega.

Ua i ai uma nei i totonu o potu, ma e fai lava ma va’ai toto’a le ali’i foma’i o Jerry Jaxx i ana tagata o lo’o galulue. O le isi itu, e fai lava ma malolo mo le ‘afa itula, ona o lona manatu, ia lava se malologa a Fitafita mo le isi la’asaga o le galuega.

Fai mai e le i umi lava ona toe amata le galuega, ae fa’alogo atu loa Jaxx ua vala’au mai se tama’ita’i Fitafita, ua uma le ma’a e ola ai le ea o lo’o sau i totonu o lona suti. Na lagona le popole i lea taimi, ona afai ae moni ua le ola o lona uiga, e tatau loa ona alu ‘ese mai totonu o le fale. E le i umi fo’i, ae fa’apena fo’i le tulaga ua o’o i ai le isi tama’ita’i, ua uma le malosi o le ma’a e fa’aaoga mo suti puipuia o lo’o latou fa’aaoga nei.

Na fa’atopetope nei ona vala’au Jaxx i le ali’i foma’i o Gene Johnson ma logo i ai le mea ua tupu, na sau le tali a Johnson, e le taumate pe ua sese le fa’amauina o le ma’a, ae alu atu le tali a Jaxx o le a o i fafo i la’ua nei. E le i uma mai le isi tala a Johnson, ae ‘ava’avau ane i ai Jaxx, o lea o le a o i fafo Fitafita nei, e le ai lava se isi mea e tatau ona fai. Ua fa’apea lava ona fai, ua o nei i fafo Fitafita tama’ita’i nei.

E taunu’u ane i le isi potu e sui ai o la ofu, o lo’o fa’atalitali atu ai le ali’i foma’i o Eugene Johnson ma ona foliga ua le gatusa. “O le a la’u fa’atonuga na fai atu ia outou, ia outou mata’ala ma fa’aitete, a’o lea ou te va’ai atu, e foliga mai o lo’o outou ta’aalo i o outou ola, a ea, o ane e sui vave lua ofu, na o mea lava e oso ai le tiga o lo’u ulu.”

A’o i ai le vaega a Jerry Jaxx i totonu o le fale, o le taimi lea, o lo’o tu lelei lava Gene Johnson ma uati le pakana a ta’avale, ina ne i te’i lava ua alu atu se ta’avale a le fale T.V. po’o se Nusipepa fa’asalalau ona le aoga loa lea o mea uma.

E liliu mai Gene Johnson o le a toe tilotilo mai i fafo, ae fetaui tonu lava ma le paka a le ta’avale a le fale televise ua tu tonu lava i luma o le faitoto’a o le fale lea o lo’o fai ai le galuega a le Ami. Fai mai, ua palauvale solo nei le ali’i foma’i i lea taimi, ae ua na o le tilotilo ane i ai o tama’ita’i Fitafita, la te le iloa le mafua’aga ua lau vavale ai le ali’i foma’i.

“Oi ta fe fe, o le televise o le CBS- 60 Minutes, ua le iloga le mea e pisi solo ai  Gene Johnson i lea taimi, ua na o le savali solo ma lulu lona ulu ma fa’apea lana tomumu, “Se o tagata nei se, o le au faitatala, ua le o e su’e nisi tala e fa’amatala i luga o le T.V. ae o mai e su’esu’e mea uma, ia o lalo lava o le isu, leaga lava tagata e faitatala tele ma fia iloa.”

E fai la o le le malie o Johnson i tama’ita’i Fitafita nei ua o mai i fafo mai le fale, ae o lea fo’i ua toe alia’e lenei fa’afitauli. Fai mai na musumusu ane i ai le isi tama’ita’i Fitafita, “Tama, onosa’i lou loto.”

E faia pea…

Fa’aliliu: Akenese Ilalio Zec