Fagogo: O le Sone Vevela

Vaega: 22

 

Fa’afetaia pea le alofa ma le agalelei o lo tatou Tapa’au i le lagi, ona o Lona alofa ma lona agalelei, lea o lo’o tatou ‘oa’oa ai pea i faleseu ma o tatou sa’a ai i ma’a o malie i Ana fa’amanuiaga, ae maise o Lana tausiga alofa mo i tatou i aso uma o lo tatou ola. Tatou fa’afo’i le vi’iga ma le agaga fa’afetai, ona e le o mavae lava Lana tausiga mo i tatou. Ae ia manuia lava le alo faiva o le atunu’u i feau ma galuega o lenei aso.

 

Na muta mai la tatou tala ina ua feiloa’i nei le ali’i tusi tala o Richard Preston ma le ali’i o Jones. O Jones sa su’esu’eina manuki nei a’o le i auina atu i Siamani. O lea la ua fa’amatala nei e Jones i le ali’i tusi tala le mafua’aga o lo’o i ai lona manatu ua a’afia ai tagata i totonu o Siamani i le virusi o le Marburg. 

 

Na toe fa’aauau le fa’amatalaga a Jones e fa’apea, “O la’u galuega, o le su’esu’e lea ma va’ai pe i ai ni manuki ua mama’i, afai e mama’i ona ave’ese lea, afai o lo’o ola lelei, ona ave lea i le ‘oka lea o lo’o mo’omia mai i Siamani. A maua la manuki ua mama’i, ona ave ‘ese lea ma fa’atama’ia, a’o manuki lelei, o manuki ia e ave i le ‘oka”.

 

Ae ina ua amata ona a’afia tagata i Siamani ona o manuki lea na auina atu mai Uganda, na amata loa ona lagona le popole ma le fefe o Jones. Sa toe fa’apea ane Jones i a Prestone, “Ua ou lagona le popole ma le mata’u, ona o a’u na sainia le pepa e mafai ai ona auina atu le ‘oka o manuki i Siamani.”

 

Sa ia toe fa’apea ane ia Preston, “Ua ou iloa, o a’u le mafua’aga ua maliliu ai tagata i Siamani, ona ua ou fa’atamala i la’u galuega, ua ou fa’atalale i o’u tiute, ma ua i o’u lima le toto o tagata nei, ae sa ou le iloa lenei virusi, ou te le iloa fo’i ua a’afia manuki i lenei virusi.”

 

Na fa’apea manatu o le ali’i tusi tala, e sa’o lava le ali’i o Jones, aua o le taimi lea, e leai se tasi na iloa lenei virusi o le Marburg, ma e o’o fo’i i ali’i foma’i ma le au su’esu’e, e leai se tasi na iloaina.

 

Na fa’aauau pea le fa’amatalaga a le ali’i o Jones i a Preston, “O manuki mama’i e tatau ona fa’atama’ia, o lo’u lea manatu, ae fa’atoa ou iloa ane mulimuli, e le i ta peina manuki nei, pe fa’atama’ia fo’i.”

 

Fai mai Jones, o manuki mama’i nei, na tu’u e le ali’i pule o le Kamupani i totonu o atigi pusa, ma ave i se nu’u i talane o le vai o Victoria, (Lake Victoria), ma fa’asao ai. O manuki la nei ua tata’a solo, ma ua pepesi ai le virusi i isi manuki o lo’o i totonu o le nu’u lenei, ma ua avea ai ma nofoaga ua nofo ai nei le virusi o le Marburg. Fai mai le fa’amatalaga, afai e le atoa le ‘oka o manuki e ave i  le Atu Europa, ona pu’e mai lea e le ali’i pule o le Kamupani ia manuki ia ma ave e fa’aatoa ai le ‘oka mo Europa.

 

O talane o le vaituloto o Victoria, o lo’o i ai se nu’u e igoa o Kasensero, ma e talane o le motu tu’ufua e igoa o Seses Island. O tagata e nonofo i totonu o Kasensero, o ni tagata fai faiva. E mafai la ona fa’aaoga e i latou nei ia va’a e o ai i le nu’u lea na tu’u i ai manuki mama’i ma au mai ai manuki ma fa’atau atu i le kamupani lea e auina atu manuki i le Atu Europa. O lona uiga, afai ae le lava le ‘oka o manuki e ave i fafo, o tagata nei e fa’atau mai ai e le ali’i fai pisinisi ia manuki ua a’afia i le fa’ama’i ma auina atu i Europa.

 

E Faia Pea…

 

Fa’aliliu: Akenese Ilalio Zec

Comment Here