Ads by Google Ads by Google

Fagogo: O le Sone Vevela

Vaega: 17

 

Fa’amalo le soifua, fa’afetaia pea le alofa ma le agalelei o le Atua ina ua alafa’i mai i le manuia i lenei taeao fou, a’o maualuga pea Lona alofa mo i tatou. E i ai pea le fa’amoemoe, o lo’o manuia pea fuafuaga ma galuega o lo’o feagai ai ma le atunu’u i lenei aso. Ae alo maia, o le a toe fa’aauau atu la tatou tala fa’asolo “O le Sone Vevela”.

 

 O lenei tala o se tala moni lava ma ua o tatou iloa ai le mata’utia o le fa’ama’i o le AIDS ae maise o virusi mata’utia sa maua ma ua maliliu ai tagata. O le tusi sa tusia e le ali’i tusi tala o Richard Preston ma ua ou taumafai e fa’aliliuina aua le malamalama’aga a le atunu’u i le pogai ma le faigata o lenei fa’ama’i o le AIDS.

 

O le ali’i foma’i o David Silverstein e nofo i Nairobi i Aferika, ae e i ai lona fale e tu lata i Uosinitone i Amerika. I le tau mafanafana o le tausaga lava lea, sa maua ai le avanoa e feiloa’i ai ma le tusi tala i a Richard Preston. O le tala lenei a le ali’i tusi tala e tusa ai ma le la feiloa’iga ma le ali’i foma’i na va’aia le ali’i foma’i talavou o Dr. Shem Musoke.

 

Ina ua feiloa’i le ali’i foma’i o Dr. David Silverstein ma le tusi tala o Richard Preston sa fa’amatala ane i ai e le foma’i le tulaga na o’o i ai le ma’i o Tiali Moneti, (Charlie Monet) fa’apea ma le ali’i foma’i o Dr. Shem Musoke. O Dr. Silverstein ua fasefulu (40), tausaga o lona soifua, o se Sitisen o le Malo o Amerika, e fa’asasa’o lona faitino, e i ai lana ‘ava, fa’apea ma lona la’uulu se’ea.

 

O se ali’i e lalelei i le va’ai ona o lona faitino ma ona foliga e iloa ai o se tagata e foliga mai sa sau i ata tifaga. O se tagata fo’i e uli va’alele, ma e pailate lava e ia ana va’alele pe a malaga i isi atunu’u. E tele isi falema’i i totonu o le itu i Matu o Aferika, e pulea e le ali’I foma’i o Silverstein. O se tagata ua lauiloa i totonu o Aferika. O le ali’i foma’i lenei o ia o le foma’i fa’apitoa a le ali’i Peresitene o Daniel Arap Moi, o Kenya, ma e malaga fa’atasi lava ma le Peresitene pe a alu se malaga a le Peresitene i isi atunu’u. O tagata maualuluga, o le au fai polokiki le mafaufau, o tagata fai ata tifaga ma le tele o isi tagata ta’uta’ua, o Silverstein na te va’aia, pe a fa’apea e fa’agasegasea.

 

Na fa’amatala nei e le ali’i foma’i o Silverstein i le ali’i tusi tala o Richard Preston e fa’apea, o ia lava sa va’aia le ali’i foma’i o Shem Musoke ma sa ia taumafai pea  ina ia fafaga Musoke i mea’ai e maua ai le vaitaimi C, vaitaimi A ma le B. Sa ia taumafai fo’i e fo’ia le fiva taifoi lea na maua ai le ali’i foma’i o Musoke.

 

I le ta tonu o le itula e lua i le vaveao, na tatagi ai le telefoni i le fale o le ali’i foma’i o Silverstein i Nairobi. O le na vala’au ane, o se ali’i foma’i su’esu’e mai Amerika ae o lo’o nofo i totonu o Kenya. Sa fa’ailoa ane e lenei ali’i i a Silverstein e fa’apea, ua maua e ali’i foma’i su’esu’e i Aferika i Saute se mea uiga ‘ese i le toto na avatu mai le ali’i foma’i o Shem Musoke.

 

Na toe fa’apea ane le ali’i su’esu’e lenei i le foma’i o Silverstein, ua mautinoa ua maua Shem Musoke i le virusi o le Marburg. O se rivusi ua sili ona mata’utia ma latou te le o iloa lelei le mafua’aga o lea ituaiga virusi o le Marburg.

 

E le i fa’alogo lava le ali’i foma’i o David Silverstein i lea ituaiga virusi, ma e le o malamalama fo’i le ali’i foma’i pe o le a le mafua’aga o lea virusi. Ina ua uma ona talanoa le ali’i foma’i ma le ali’i su’esu’e mai Aferika i Saute, ua lagona le popole o le ali’i foma’i o Silverstein e le gata i lea, ae ua lagona lona alofa i le ali’i foma’i o Shem Musoke.

 

E faia pea…

 

Fa’aliliu: Akenese Ilalio Zec