Vaega: 9

Fa’atalofa atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ai ona o tatou fa’apea ifo, “Le Atua e, o Oe o le Alefa ma le Omega, o le Amataga ma le Gata’aga o mea uma lava, ia tumau atu pea le vi’iga ma le fa’amanu i Lau Afio, Amene.” Ae alo maia, o le a toe fa’aauau atu la tatou tala fa’asolo mo lenei aso.

Na muta mai la tatou tala ina ua lagona e Tiali ua tigaina ua le mautonu fo’i po’o le a lenei ma’i ua maua ai ia. O le taimi lea o lo’o alu pea lana malaga i luga o le va’alele e agai atu i le falema’i o Nairobi.

Ua tumu nei le taga sa fa’aaoga e Tiali i luga o le va’alele e fa’asuati i ai, o le lanu o ona pua’iga e lanu mumu uliuli, ma e foliga mai ua manogi e pei o se manogi o se fale o lo’o fasi ai manu ma ua manogi leaga le toto. O pua’iga lanu uliuli na sau mai le gutu o Tiali, o le lanu lea ua matua’i a’afia i le virusi.

O le ea ua manavaina nei e tagata i totonu o le va’alele o se ea ua matua’i manogi leaga lava. Ua lagona e Tiali ua le manuia le manogi ua ia manavaina, ma o le ala lea sa ia tapunia ai loa le taga ma tu’u atu i le tama’ita’i o lo’o ia va’ava’aia le pasese.

Afai ae tele le virusi ua a’afia ai le tino o le tagata, e mafai ona taofia i totonu o le tino ma feso’otai loa ma isi virusi o lo’o i totonu o le tino o le tagata, ona amata loa lea ona fa’aleaga e virusi totoga o le tagata. Fai mai foma’i atamamai, e a’afia loa le tino o le tagata i virusi nei, o lona uiga, ua mafai ona tatala atu le avanoa i isi virusi e ofi ai i totonu o le tino o le tagata soifua.

 I nisi fa’amatalaga, o le tagata ua ulufia i se isi ola, o lona uiga o lo’o taumafai le ola fou lea, ia suia le tagata atoa, ia foliga ia te ia. O le mea tonu lava lea ua tupu nei i a Tiali, ona ua ulufia o ia i le virusi, ma o le ala lea ua taumafai ai le virusi ia suia Tiali, ma o se suiga mata’utia ua o’o nei i lenei tama. O fa’aaliga tumau ua maua ai nei Tiali, ua fa’asuati mai ma ua uliuli atoa ona fatu tale.

Ua taumafai nei Tiali ina ia taofiofi pea, ona ua i ai lona manatu o se isi ana gaoioiga e fai, o le a matala mai ai le mea o lo’o nofo i totonu ia te ia. Ua amata ona punitia ona ala toto, ma ua a’afia ai itu uma o lona tino, o lona ate, o lona ma ma, o ona fatu ga’o, o ona lima, o vae ma lona ulu. Ua amata ona poloka ala toto o le pito i lalo o lona manava ma ua amata ai ona leaga maso o lona manava, ua tautau mai i lalo. Ua tau le mafai e Tiali ona tatali le tiga, ona ua poloka le ala toto e alu atu i lona fai’ai ma ua le toe o’o ai le toto i lona ulu.

O lona fa’asuati tele ua amata ai ona alu ‘ese ai uaua o lona isu ma ua amata ona tafe mai le toto ua le utufia, ua a’afia ai ma lona gutu ma ua le mafai ona taofiofia. Na tu’u ane nei i ai e le tama’ita’i o lo’o va’aia le pasese le pepa, ma sa fa’aaoga e Tiali e tau taofiofi ai le tafe ifo o le toto mai lona isu, peita’i, ua le mafai ona taofia, ma ua lanu mumu ai nei le pepa atoa.

Afai ae nofo se tagata e ma’i i ou talane i luga o le va’alele, e te le mana’o e fa’ama lea tagata e ala i lou fesili atu i ai. Atonu fo’i e te fa’apea ifo, ai e ma’i pe a alu i le va’alele, ona o le le masani. O le manatu lea na o’o i ai le pasese i le taimi na o latou iloa ane ai, o lo’o fa’asuati Tiali. Ae peita’i, o se tulaga pagatia ua o’o nei i ai Tiali, o se tulaga fa’amomoi loto, ona ua le mafai lava ona ia toe lagona se mea. O suiga fo’i ua o’o i ai lenei tama, o suiga ua ogaoga ma ua le mautonu ai lona mafaufau po’o le a lenei mea ua tupu i a te ia.

E faia pea

Fa’aliliu: Akenese Ilalio Zec