Fagogo: O le Sone Vevela

Vaega: 114

 

Tatou fa’afetaia pea le alofa ma le agalelei o lo tatou Matai oi le lagi, ona o lea ua alafa’i mai i le manuia si o tatou atunu’u i lenei taeao fou. E ao ai ona o tatou fa’apea ifo, “Le Tama e, e fo’i atu lava le vi’iga ma le fa’amanu i Lau Afio, ona o mea silisili e te faia pea mo o matou tagata, Amene.”

 

O lo’o tatou i ai pea i le fa’amatalaga a le ali’i foma’i manu o Dan Dalgard lea na fa’amatala i le tusi tala o Richard Preston i le taimi na oso ai le ma’i o le ali’i o Milton. Fai mai, a’o taumafai pea Milton e tau fa’ato’ato’a lona tale, ae o lo’o taumafai fo’i e tau fai ane lana tala ia te ia, e fa’ailoa ane ai le mafua’aga ua alu ai i fafo ma lona suti. Fai mai, na fai ane le tala a Milton, ina ua ulufale i totonu o le potu o lo’o i ai manuki, na te’i lava i le fa’alogo atu, ua amata ona tau oso mai lona fia fa’asuati, ma ua ‘ese fo’i lana fa’alogo i lona manava.

 

O le ala lea na alu fa’atopetope ai loa i fafo, e fa’asuati ai, ona e leai se ‘apa i totonu o le potu na te fa’aaogaina. Atonu o le manogi leaga o le potu ua mafua ai ona fa’apea Milton, atonu fo’i ua tau le masani le ali’i i le manogi ua o’o nei i ai le potu o lo’o i ai manuki. Na mana’o Dan Dalgard e siaki le tulaga ua i ai nei Milton. Na alu fa’atopetope le ta’avale a le ali’i pule o le kamupani o Bill Volt i le faleoloa e aumai se mea fua fiva e fua ai le fiva o le ali’i o Milton.

 

Ina ua fua e Dan Dalgard le fiva o Milton, na iloa ai ua o’o i luga i le selau ma le tasi le fiva o le ali’i faigaluega. Fai mai, ua amata ona oso le fefe ma le popole o le ali’i pule o Bill Volt, ina ua va’ai atu o mea masei mea ia ua o’o i a Milton, o le tulaga fo’i lea na o’o i ai le ali’i foma’i o Dan Dalgard, ua amata ona lagona le popole ma le atuatuvale. E ui lava ina o’o i la’ua nei i tulaga ia, ae sa va’aia lava le to’a o le ali’i o Milton, e foliga mai e leai se mea o tupu i a te ia.

 

Fai mai le fa’amatalaga a Dan Dalgard i a Richard Preston, o le ali’i lenei, o se tagata Kerisiano, ma e toaga i le lotu, atonu o le mafua’aga lea na va’aia ai ua i ai se suiga mai lona ma’i. Ua taoto’oto nei Milton i luga o le sofa, ae ua fai i ai le fa’atonuga a Dan, ia ‘aua lava ne i alu ‘ese mai le sofa lea, ma ia ‘aua fo’i ne i alu ‘ese mai le fale.

 

Na ona uma lava ona fai le fa’atonuga a Dan i a Milton, oso loa i totonu o le ta’avale ma alu fa’anatinati i le nofoaga o lo’o i ai Ofisa Tutotonu o le kamupani a le Hazelton Washington i Leesburg Pike. A’o aga’i atu le ta’avale a Dan Dalgard i le nofoaga o le kamupani, na tonu i lona loto ma lona mafaufau, ua tatau ona tapunia le nofoaga lea o lo’o i ai manuki.

 

E toa fa foma’i manu fa’apitoa o lo’o galulue i totonu o le nofoaga lea o lo’o i ai manuki, o lona uiga, ua totoe nei na o le to’alua, ona o le isi to’alua lea ua  fa’agasegasea. O le isi o lo’o fa’ata’otolia i le falema’i, ona o lona fatu, a’o le isi ua na o le fa’asuati ma tale ma ua maualuga le fiva. O le Ebola e pei ona iloa ai e le ali’i foma’i, o fa’ailoga fo’i e pei ona ia va’ai nei i ai i ana tagata faigaluega nei e to’alua, o fa’aaliga uma lava nei e pei ona fa’ailoa ane e ali’i foma’i fa’apito o lo’o i le nofoaga a le Ami, i Fort Detrick.

 

Ua toe manatu nei Dan e fa’apea, o lona uiga ua a’ai i falea’iga, ua o’o i fafo e fai a la fa’atauga i totonu o fale oloa tetele, atonu fo’i ua fai ni feusua’iga fa’aleulugali’i ma o la ta’ito’alua, ua le fia manatu i ai Dan Dalgard i ia tulaga uma.

 

Fai mai le fa’amatalaga a le ali’i tusi tala o Richard Preston, na toe fa’apea ane Dan Dalgard i a te ia, “Preston, ua tau pe lo’u fatu, ona a ou mafaufau atu i tulaga uma na aliali mai, ailoga e mafai ona talia e se tasi, ona ua ou iloa, e pau uma i luga o lo’u ulu mea uma nei ua tutupu mai. Ae sa fa’ato’ato’a pea lo’u loto ma lo’u mafaufau, fa’atasi ai ma lo’u mafaufau pea i si o’u to’alua ma si a’u fanau. Atonu, o le mea lea sa fa’amalosia’u i a te a’u i taimi uma.”

 

E faia pea…

 

Fa’aliliu: Akenese Ilalio Zec

Comment Here