Ads by Google Ads by Google

Fagogo: O le Sone Vevela

Vaega: 89

 

Fa’atalofa atu i le mamalu o le atunu’u, i le alafa’i mai i le manuia i lenei taeao fou i le alofa ma le agalelei o le Atua Soifua. E ao ai ona o tatou fa’apea ifo, “Le Atua e, o Oe o le papa o lo matou olataga, o lo matou ‘olo maualuga matou te malu ai i faigata ma puapuaga o le soifuaga nei, fa’afetaia ma vi’ia pea Oe lo matou Atua e fa’avavau, fa’avavau lava, Amene.”

 

Ua amata nei ona feagai le Vaega ‘Au a le Ami i le tapenaina o le galuega o le a feagai nei ma i latou, ae o lo’o taumafai pea Colonel C.J Peters ia toe maua lava se avanoa e va’ai ai Nancy Jaxx i manuki nei ona fa’amautu ai lea o mea uma. O le taimi lava na uma ai le talanoaga a Dan Dalgard ma C.J. Peters, o le taimi lea na manatua ai loa e Dan, le ali’i pule o Bill Volt, lea o lo’o pulea le Kamupani ma le fale o lo’o i ai manuki i totonu o Reston.

 

Na toe manatu nei Dan Dalgard e fa’apea, afai o le mea lea ua tupu mai nei o le a i ai uma Matagaluega ma Vaega a le Malo Tele, o lona uiga e le o se mea la’ititi le mea lea ua tupu mai. Na lagona le popole o le ali’i o Dan, ona ua i ai nei lona manatu, afai o le Ebola e pei ona fa’ailoa ane ia te ia e C.J. Peters, o lona uiga e tele le a’afiaga o le fale o lo’o i ai manuki ae maise o le Kamupani lea o lo’o galue ai.

 

Na fai lava si fa’afeufeu o le mea, ona o lea o le a au ai Matagaluega a le Malo Tele, o le isi fo’i itu, o lea o le a i ai ma le C.D.C, ma o lenei mea ua tula’i mai o se tulaga e ao ona fa’afoefoe lelei i ona itu uma. Na vala’au nei Dan Dalgard i a Bill Volt lea e pulea le nofoaga lea ma fa’ailoa i ai le mea ua tupu e pei ona logo ane ai ia e C.J. Peters mai le USAMRIID. E le i uma atu tala a Dan ae ta’u ane loa e Bill Volt, ua i ai le tagata faigaluega i totonu o le kamupani ua ave i le falema’i, ona ua oso lona ma’i fatu, ma ua tigaina.

 

Ua atili ai ona ta ta vale le fatu o Dan Dalgard, ma ua ia iloa nei, o le virusi o le Ebola lea ua mafua ai ona ma’i le tagata faigaluega lea. O le ma’i fatu e mafua, ona ua poloka  ala toto e aga’i atu i le fatu o le tagata. Na tonu nei i le mafaufau o Dan, o le a tapunia uma galuega i totonu o le fale o lo’o i ai manuki, ae se i vagana ai i latou o lo’o gafa ma le fafagaina o manuki, e tatau ona faigaluega.

 

Na toe fa’ailoa ane e Dan i a Bill, e le taumate afai e iloa e fale fa’asalalau po’o uaealesi, o lona uiga o le a tele lava le a’afiaga o le a o’o i ai le kamupani. Na toe vala’au nei Dan i le falema’i o lo’o i ai le tagata faigaluega ma talanoa ma le foma’i o lo’o va’aia, ma na fa’ailoa i ai e Dan i le foma’i lea, afai ae i ai nisi tulaga e ono o’o i ai, ona logo lea o Colonel C.J. Peters i Fort Detrick. E leai lava se ta’ua o le upu Ebola, ona ua fa’aitete Dan, ina ne’i i ai se mea e tupu mai.

 

Ua taunu’u le malaga a C.J. Peters, o Nancy Jaxx ma Eugene Johnson i Virginia lea o lo’o i ai le fale o lo’o i ai manuki. Na fa’afeiloa’i e Dan Dalgard le malaga lenei ma alu loa le latou solo i totonu o le potu o lo’o tui ma teu ai toto.

 

Ua amata le galuega a Nancy Jaxx, e ala lea i lana su’esu’ega i a’ano o manuki. O se va’aiga mata’utia na iloa nei e Nancy i lea taimi, ona e foliga mai ua matua’i fa’atama’ia lava ma ma, o fatu ma sela (cells), o manuki. Na manatua nei e Nancy Jaxx, o le virusi o le Ebola e ‘ese’ese ona foliga va’aia, e pei o tama’i anufe, o se tulaga vae o le solofanua, o fulafula, ae e ‘ese lava le mea lea ua ia va’aia nei.

 

E faia pea…

 

Fa’aliliu: Akenese Ilalio Zec