Ads by Google Ads by Google

Fagogo: O le Sone Vevela

Vaega: 88

 

Taeao manuia i le alafa’i mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai. Tatou fa’afetaia ai pea le alofa ma le agalelei o lo tatou Matai oi le lagi, ona o Lana tausiga alofa mo i tatou, lea o lo’o tatou maua ai pea le ola. Ae alo maia, o le a toe fa’aauau atu la tatou tala mo lenei aso, ae ia manuia lava feau ma galuega o le a feagai ai ma le atunu’u.

 

Ua maua le tonu, o le a alu ane le ali’i foma’i pule o le nofoaga o le C.D.C o Fred Murphy i Fort Detrick i le aso e soso’o ai. Ina ua latalata ina ma’ea le fonotaga a ta’ita’i o le nofoaga lenei a le Ami, na tofia ai loa C.J. Peters e avea ma ta’ita’i o le galuega lea o le a faia e le Ami. Na toe fesili Commander Russell po’o fea tonu o lo’o i ai le fale lea o lo’o i ai manuki, ae na tali C.J Peters, o lo’o i Fairfax County i Virginia.

 

Na fa’ateia Commander Russell i le tala lea, ona ua ia iloa, o se nofoaga e sili ona matagofie, ma manaia i le va’ai. E tele isi galuega o le a feagai ma le Ami, o le logoina lea o isi Matagaluega, e i ai le Matagaluega o Fa’atoaga a le Malo Tele, o lo’o i ai le latou malosiaga i manuki o lo’o auina mai i totonu o le Malo Tele. O le Matagaluega e puipuia le Si’osi’omaga, lea o lo’o i ai le malosiaga e puipuia ai tagata mai a’afiaga tau i kasa o’ona.

 

Ua manatu fo’i C.J Peters e vala’au le Sui Failautusi o le Puipuiga o le Saogalemu a le Malo Tele, ina ia fa’ailoa atu i le Pentagon, po’o le nofoaga autu o Vaega ‘Au a le Malo Tele le galuega o le a fa’atino e le Ami.

 

Ua amata ona alu vala’au e pei ona poloa’ia e Commander Russell, ma o lea ua ta’ita’ia e Colonel C.J. Peters, ma na tonu nei i le mafaufau o Peters ua tatau loa ona vala’au le ali’i foma’i manu o Dan Dalgard lea e galue i le nofoaga o lo’o i ai manuki i totonu o Reston.

 

Ua alu le vala’au a C.J Peters ma ua talanoa nei ma Dan Dalgard, “Dan, o a’u o Colonel C.J. Peters mai le USAMRIID, ua ou vala’au atu e logo atu oe, e le o le Malburg, ae o le Ebola.”

 

Na fesili ane nei Dalgard, “O le a le Ebola?”, O le mea ua tupu, e le i fa’alogo lava Dan Dalgard i lea virusi o le Ebola. Na fa’amalamalama ane nei e C.J Peters ia Dalgard, “O le fa’ama’i na a’afia ma feoti ai tagata i Zaire ma Sudan, i le sefulu i le sefululua tausaga talu ai.”

 

Ua amata ona fafa le isi fa’afetai i luga o le isi fa’afetai, ona o lea ua ta’u ane nei e C.J. Peters, e le o le virusi o le Malburg. Na toe fesili nei Dan Dalgard, “O a la fa’ailoga va’aia, a’o a fo’i a’afiaga o le tagata pe afai ua maua i le Ebola?” Na tali C.J. Peters, “O le Ebola, e tutusa lava ma le Malburg, o a’afiaga lava e tasi pe a maua ai le tagata, e fa’aaoga le toto ma vaega manifinifi o sela (cells) o le tagata ma manu. O auga ma foliga va’aia o le fa’ama’i e tutusa lelei lava ma le Malburg.

 

Na iloa nei e Dan Dalgard o lona uiga e sili atu ona mata’utia le virusi lenei na i lo le Malburg, ona o lea ua fa’ailoa ane ia te ia e C.J. Peters o tagata na maliliu ai pe tusa i le 50 i le 90 pasene.

 

“C.J. Peters, e mafai lava ona tu’u mai se taimi, se i ou fa’afeso’ota’ia le aufaigaluega o lo’o galulue i totonu o le fale o lo’o i ai manuki, ona ou toe logo vave atu lea o oe i se taimi.” Na tali C.J. Peters, “Ua lelei.”  Ae na toe sau ai i tua ma le talosaga a C.J. Peters, e fa’apea, “Dan, e mafai ona ma o atu ma se sui o le USAMRIID tatou te galulue fa’atasi i totonu o le nofoaga o lo’o i ai manuki?” Na tali Dalgard,“Ua lelei, te le le avanoa.”

 

E faia pea…

 

Fa’aliliu: Akenese Ilalio Zec