Fagogo: O le Sone Vevela

Vaega: 87

 

Fa’atalofa atu i le alafa’i mai o le atunu’u i le manuia i lenei taeao fou, malo lava le soifua e ao ai ona o tatou fa’afo’i pea le vi’iga ma le fa’afetai i le Atua Soifua, ona o Lana tausiga alofa mo i tatou lea o lo’o tatou maua ai pea le ola i aso uma. Ae alo maia, o le a toe fa’aauau atu la tatou tala mo lenei aso. Ae ia manuia faiva ma tiute o le a feagai ai i lenei aso.

 

Ua i ai le isi mataupu ogaoga ua tula’i mai, ma o lea ua fetufa’ai ai nei ta’ita’i o le nofoaga lenei a le Ami a le Malo Tele, o le mataupu lea e uiga i le C.D.C. i Atlanta Georgia. Ona o le C.D.C o le isi lea vaega o lo’o i lalo o le fa’amalumaluga a le Feterale. O le vaega lenei latou te su’esu’e ma puipuia fa’ama’i pepesi i le lalolagi. O le mea ua tupu nei, o le isi lenei matagaluega a le Feteral ua uma ona fa’amaonia e ala i se poloa’iga mai le Konekeresi, ma o le latou matafaioi, o le su’esu’e, taofiofia, ma togafitia fa’ama’i ‘ese’ese e ona a’afia ai le ola ma le soifua o le tagata. E tele la le aia a le C.D.C i le tulaga lea ua tula’i mai i totonu o le nofoaga lea i Reston na i lo le Ami a le Malo Tele.

 

O le Ami e leai se malosi’aga e pei ona i ai le C.D.C e mafai ai ona tali atu i fa’ama’i pepesi i totonu o laufanua o le Iunaite Setete, ae o lo’o i ai le agava’a ona o lo’o i ai ali’i ma tama’ita’i popoto o lo’o i totonu o le nofaga lenei a le Ami, USAMRIID.

 

Ua amata ona alu a’e i luga leo o ta’ita’i o le nofoaga lenei a le Ami, ona ua fa’alogo mai, ua talanoa atu General Russell i le itu lea. Na i’u ina fa’ata’ita’i ma folasia itu uma e tatau ai ona fa’ailoa i le C.D.C le tulaga lea ua aliali mai i le nofoaga o lo’o i ai manuki i Reston.

 

Na i’u ina malolo uma manatu ae ua fai le tonu e pei ona mana’o i ai Commander Philip Russell ina ia logo vave le C.D.C i Atlanta, ae maise o le ali’i pule o le nofoaga o Dr. Fredrick A. Murphy. Manatua fo’i, i le amataga mai o la tatou tala o le ali’i foma’i lenei sa ia su’esu’eina ma maua le virusi o le Ebola lea ua pule nei i totonu o le nofoaga lenei a le C.D.C.

 

Na toe fa’asolo nei le va’ai a Commander Russell ia i latou o lo’o au ai i le fonotaga lenei, ma a’apa ane loa i lana telefomi ma vala’au loa le nofoaga o le C.D.C i Atlanta Georgia. E taunu’u ane le vala’au a Commander Russell, ae alu atu le tali mai le C.D.C, ua alu le ali’i foma’i o Murphy i le fale. Na toe sa’ili  nei e Commander Russell le numera o le fale o le ali’i foma’i o Murphy ma ua talatalanoa nei i luga o le telefoni.

 

E taunu’u ane le telefoni a Commander Russell i le fale o le ali’i foma’i o Murphy, o lo’o fai le talatalanoaga a le ali’i foma’i ma lona to’alua. “Fred, o Phil Russell…..manuia mea uma, a’o a mai oe…Fred, ua matou maua le virusi e tai foliga o le Ebola i fafo o Uosinitone……ioe. O fafo o Uosinitone.”

 

Ai e fa’alogo atu Commander Russell ua amata ona ‘ava’avau mai le ali’i foma’i i luga o le telefoni, o lea na ia tau tu’utu’u ‘ese ai ma lona taliga.  Na fa’apea mai Murpy i luga o le telefoni, po’o le mea o ulaula ni  a latou mariuana, ae alu atu le tali a Commander Russell, “E leai, e le o ulaina ni a matou mariuana.Ua o matou mauaina le virusi e tai foliga o le Ebola….ua matou va’ai i ai…ioe, o lo’o i ai ata.”

 

Na toe fa’alogo atu Commander Russell, ua tau to’a mai Murphy, ma na fesili ane po’o ai na pu’eina ata, na tali Commander Russell, “O Thomas Geisbert, ma o lea matou te tilotilo nei i ai.”

 

E faia pea ...

 

Fa’aliliu: Akenese Ilalio Zec

Comment Here