Ads by Google Ads by Google

Fagogo: O le Sone Vevela

Vaega: 83

 

Fa’atalofa atu i le alafa’i mai o le atunu’u i fanuga lelei o lenei taeao fou, malo le soifua, e ao ai ona o tatou fa’apea ifo, “Le Atua e, lo matou Tama, e tumau atu lava ia te Oe le fa’amanu ma le fa’afetai i aso uma o lo matou ola, Amene.” Ia manuia le alo faiva o le atunu’u i feau ma galuega o le a feagai ai i lenei aso.

 

 Na muta mai la tatou tala ina ua mautinoa e le ali’i foma’i o Peter Jahrling o le Ebola Zaire lea na maliu ai Mayinga, lea na maua ai manuki. O lea la ua ia logoina ia C.J. Peters, e fa’ailoa i ai le fa’aiuga o ana su’esu’ega.

 

Ua tu mai i fafo ia Colonel Peters i le isi potu e mafiafia lava le fa’amalama, ma ua fa’asino nei e le ali’i foma’i o Peter Jahrling lana su’esu’ega ma ua taga’i toto’a i ai C.J. Peters. Na ona tilotilo ifo lava o C.J. Peters i su’esu’ega nei, ‘ava’avau ane loa ia Peter Jahrling ia alu ‘ese vave mai totonu o le potu. Ma ua o’o nei i le taimi ua tatau ai ona fa’ao’o le mataupu lenei i a i latou e maualuluga atu o latou tulaga i totonu o le nofoaga lenei a le USAMRIID i Fort Detrick.

 

Na alu ‘ese fa’avave nei Peter Jahrling ma ua sui nei ona ofu ma o fa’atasi ma Colonel Peters i le ofisa o Commander David Huxsoll. Ua saofafa’i nei i le potu e fai ai fonotaga a le au maualuluga ma fa’atali le alu ane a David Huxsoll lea o lo’o va’aia atoa le nofoaga lenei a le Ami a le Malo Tele i Fort Detrick.

 

O Commander David Huxsoll, o se tagata e atamai i tulaga tau i mea e a’afia ai le ola o le tagata, e pei o kasa o’ona, o fa’ama’i ‘ese’ese fa’apea ma virusi. Ina ua ma’ea le talanoaga a i latou nei e to’atolu, na manatu ai loa Commander David Huxsoll, ua tatau ona logo ia Major General Philip Russell, MD, o ia e pulea atoa le nofoaga lenei a le Vaega o le Au Su’esu’e a le Ami i totono o le Iunaite Setete, ma e au fo’i lana pule’aga i le nofoaga lenei o le USAMRIID.

 

A’o fa’atali le taunu’u ane o General Philip Russell na faia ai se talatalanoaga a le ali’i foma’i o Peter Jahrling ma Colonel C.J. Peters, po’o ai nisi e tatau ona o ane i le fonotaga lenei. Ua tau nei o la mafaufau i a Lieutenant Colonel Nancy Jaxx, aua o Nancy ua avea nei ma ta’ita’i i le vaega o foma’i e su’esu’eina auga ma a’afiaga o fa’ama’i i le tagata soifua, po’o le Pathologist.

 

Ua vala’au Colonel Husxoll i a Nancy ina ia alu ane fa’avave i le Ofisa o Commander Russell mo sa latou feiloa’iga ona o se fa’alavelave, ma ua fa’apea lava ona fai. Na fetaui lava le taunu’u ane o Colonel Nancy Jaxx ae amata loa ma le fono lea ua i ai uma ta’ita’i o le nofoaga a le USAMRIID a le Malo Tele.

 

Ua amata nei le fonotaga i totonu o le ofisa o Commander Phil Russell, o se afiafi pouliuli ma ua amata fo’i ona maua le filemu ona ua manava galuega a Fitafita fa’apea ma tagata o lo’o galulue i totonu o le nofoaga lenei a le Ami. Fai mai o le ofisa o Russell e fai si mamao te isi ma ofisa o isi tagata faigaluega, ma e fa’afeagai tonu lava ma le vaitafe o lo’o i talane o le nofoaga a le Ami.

 

O Commander Philip Russell, o se tasi o foma’i sa ia sa’ilia le virusi i totonu o Asia Tutotonu. Ua tu’u atu nei e C.J. Peters le faila o lo’o i ai ata ma su’esu’ega na fa’atautaia e Peter Jahrling ma Thomas Geisbert. Ua na o le pupula to’a o Commander Russell i ata nei “Oi, ta fefe, o ai na pu’eina ata nei.?” O le fesili lea a Russell, na tali Peter Jahrling, “O Tom Geisbert, e le taumate o le Ebola, aua o fa’aiuga o su’esu’ega o lo’o maua ai e moni o le Ebola.”

 

E faia pea …

 

Fa’aliliu: Akenese Ilalio Zec