Vaega: 82

Tatou fa’afetaia pea le alofa ma le agalelei o lo tatou Tapa’au oi le lagi, ona o Lana tausiga alofa mo i tatou, ua o tatou aulia mai ai i le manuia lenei taeao fou. E ao ai ona o tatou fa’apea ifo, “Le Atua e, e paia, e paia lava Oe le Atua o ‘Au, Amene.” Ae alo maia mo le fa’aauauina o la tatou tala fa’asolo, ia manuia faiva ma tiute o le a feagai ai ma le atunu’u i lenei aso.

Ua ma’ea nei ona titilo le ali’i foma’i o Peter Jahrling i le toto o Musoke lea na maua i le virusi o le Malburg, ae na fa’asaoina mai, fa’apea ma le toto o le ali’i o Boniface lea na maua i le virui o le Ebola Sudan ae na maliu ai. Ua toe nei o le toto o Mayinga le tama’ita’i tausima’i lea na maua i le virusi o le Ebola Zaire ma na maliu ai.

“Oi ta fefe, oi au e, o le Ebola Zaire, o lea lava e mumu malosi mai le toto o Mayinga.” Na toe tilotilo le ali’i foma’i, ma toe fa’atulaga lelei lana mea va’ai, ona e le talitonu lona loto i le mea ua ia va’ai nei i ai. Ae na tilotilo atu le ali’i foma’i, e moni lava, o lo’o susulu ma mumu malosi mai  le toto o Mayinga.

Ua tu nei le ali’i foma’i, ua le masino le mau mafaufauga ua o’o ifo i lona loto, o lona uiga e le o le Malburg lea na maua ai manuki, ae o le Ebola. Ua nofo ifo nei i luga o le nofoa le ali’i foma’i o Peter Jahrling, ua gatete ona tino, o lona manava ua pei ua leai se mea o i ai, ua ta ta vale lona fatu i lea taimi, ua lagona le fefe ma le atuatuvale. Ae ui lava i ia fa’alogona uma, ae sa taumafai pea le ali’i foma’i ia fa’ato’ato’a lona loto ma lona mafaufau, ona e na o ia o lo’o i totonu o le potu  AA-4, o se potu e matua’i mata’utia lava ona o le potu lea, o lo’o teu ai so’o se ituaiga virusi.

Na toe taumafai tasi lava le ali’i foma’i o Peter Jahrling e toe fa’atino tasi lana su’esu’ega, aua ua i ai lona manatu atonu ua tu’u se se e tagata ia toto nei. Po’o le a le faigata, o le a fo’i le umi, ae na toe taumafai tasi lava le ali’i foma’i, ina ia mautinoa ma fa’amaonia, e moni o le Ebola Zaire lea na mamate ai manuki ae le o le Malburg.

Ua fa’apea lava ona fai, na toe fa’atino lelei lava e le ali’i foma’i lana su’esu’ega, ae na ia va’aia lava le mumu ma le susulu malosi mai o le toto o le tama’ita’i foma’i o Mayinga. Ua mautinoa ai nei ma fa’amaonia, e moni lava o le Ebola lea na a’afia ma mamate ai manuki. Na toe mafaufau nei le ali’i foma’i, o le Ebola mai Zaire, po’o se tasi o ona uso, e le i alu ‘ese lava pe va’aia le virusi o le Ebola i fafo atu o Aferika, ae o le a le mea lea ua o’o mai ai i Uosinitone?, ae pe fa’apefea fo’i ona o’o mai i Uosinitone.

I totonu o le potu lea, o lo’o i ai se telefoni e fa’apitoa lava mo fa’alavelave fa’afuase’i. Na manatu nei le ali’i foma’i, e tatau ona ia logoina i lea lava taimi le ali’i o Colonel C. J. Peters, ma na o’omi loa le numera. “C. J.! o Peter Jahrling, e sa’o, o le Ebola.”

Na fai si umi o fa’atali Peter i se tala e fai ane e Colonel Peters, “E le iloa pe sese lau va’ai.” E le i fa’atali le ali’i foma’i, na ia toe tali atu, e leai, ua uma ona ia faia fa’alua su’esu’ega, o le mea lava e tasi, o le toto o Mayinga, ma o le Ebola.

Na toe tali ane le ali’i o Peters, ua lelei, ae o le a alu ane e va’ai i ai. E le i umi ae taunu’u ane Colonel Peters, ua uma fo’i ona fai lona suti lanu moana lea e fa’aaoga pe a o i totonu o le potu AA-4.

E faia pea…

Fa’aliliu: Akenese Ilalio Zec