Fagogo: O le Sone Vevela

Vaega: 8

 

Taeao manuia i le alafa’i mai o le atunu’u i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola vaivai. E ao ai ona o tatou fa’apea ifo, “Le Ali’i e, e le lava upu o le gagana e sula ai Lou alofa ma Lou agalelei mo i matou, ae tau ina o matou o atu i Ou luma ma le loto fa’amaualalo i lenei aso, foa’i mai le filemu, le onosa’i ma le fa’apalepale, ae tumau atu pea le vi’iga i Lau Afio e fa’avavau, fa’avavau lava, Amene.”

 

Ae alo maia, o le a toe fa’aauau atu la tatou tala fa’asolo, ia manuia feau ma galuega o le a feagai ai ma le atunu’u i lenei aso. Na muta mai la tatou tala ina ua alu to’atasi nei Tiali Moneti, (Charlie Monet) e sa’ili se togafitiga e mapu ai mai i ona tiga. O lea la ua alu nei i le va’alele e aga’i atu i le falema’i o Nairobi mo ona togafitiga.

 

Ua alu le va’alele, ma ua ui atu i le itu o lo’o i ai le tele o fa’atoaga matagofie, ua latalata i Nairobi. Ua va’aia fo’i le tele o fale o lo’o i totonu o nei nofoaga, ma ua amata ona lilo atu fale o lo’o ato i atigi apa ma lautolo.  Ua kolosi e le va’alele le itu i Saute o le vanu e igoa o Rift. Ua tilotilo nei le au pasese i fafo o le fa’amalama i le nofoaga na fananau ma ola mai ai i latou. Na o latou va’aia le tele o fale, fa’apea ma fa’atoaga ae maise o auala sopo na mafua ona olaola pea, ona o le tele o povi tata’a o lo’o i le toga vaomatua o le vanu o Rift.

 

Ua tau le va’alele i ao puaoa ma ua amata ai ona lagona e Tiali Moneti le tiga, ua lagona lona fia fa’asuati. O nofoa o le va’alele e va apiapi ma ua tau le mafai ona maua se avanoa e mafai lava ona iloa mea uma o lo’o tutupu i totonu o le va’alele. Ua tau le mafai ona maua se ea i totonu, ua amata ai nei ona fa’asuati Tiali, ona ua utiuti le ea i totonu o le va’alele.

 

 Ua u’u nei e Tiali le pepa i luma o ona foliga ma ua tale nei ua alu uma lona fatu tale i totonu o le taga pepa. Ua amata ona tumu le taga pepa, ma ua tilotilo solo nei pe i ai nisi o iloa ane lenei mea ua tupu ia te ia. Ua pipi’i fatu tale lanu mumu i lona laugutu, fa’atasi ai ma isi fatu tale lanu uliuli, e foliga mai sa ia lamuina se penu kofe.

 

O ona mata e foliga i mata o se tagata ua oti, ua leai se fa’alogona e iloa ai o lo’o ia iloaina le mea lea e tupu. O le lanu mumu ua fa’ateteleina, ma ua a’afia ai ona foliga. O lona muaulu ua suia i le lanu uliuli ma le lanu moana. O so’otaga o maso o ona foliga ua amata ona liua, ma ona foliga ua amata ona tautau i lalo. Ua fa’aauau pea ona fa’asuati ma e foliga mai ua le maua se mapu lona tale ma ua le mafai ai ona ia toe taofia le sau i fafo o ona fatu tale. Ua iloa lava e Tiali ua tigaina, ae sa ia taumafai pea e taofiofi, ona o lona fia o’o i le falema’i o Nairobi, atonu e maua ai se fesoasoani mo ia.

 

Ua amata ona lagona le matamuli, ona o le va’ai atu o Tiali ua tilotilo ane uma le pasese i a te ia, ae ui lava i lea, ua le mafai lava ona fai se isi mea. O lo’o fesilisili pea lona loto, po’o le a lenei mea ua tupu i a te ia, e fou i lana fa’alogo, ma e le masani ai fo’i ona ma’i fa’apea.

 

O le tele o aso, a pisi i lana galuega, ona lagona lea o le vaivai o le tino, peita’i, e le fa’apea sona tigaina, a’o lenei tulaga ua o’o i ai ia, ua le mautonu ai lona loto ma lona mafaufau. O le a fo’i le fiafia sa i ai i lana galuega na galue ai i totonu o le fa’atoaga tolo e gaosia ai le suka, ua leai lava.  O le a fo’i lona fiafia e nofonofo ma fa’alogologo i le pao o masini, ua matua’i leai lava.

 

Ua le mautonu lona mafaufau, ua sola fo’i manatu i lea taimi, pau le tulaga ua o’o ifo i a te ia, ua fia maua se  mapusaga, ua lagona lona fia ola pea. O lo’o alu pea le va’alele i lea taimi, ae ua le mafai ona taofiofi le fa’asuati o Tiali. Ua tau manatunatu nei, po’o fea na a’afia mai ai ia i lenei ma’I faigata ua maua ai. Ua lagona le popole o lona loto I lea taimi.

 

Pau le mea ua feagai nei ma ia, o le fia vave maua lea o sona mapusaga mai tiga ua o’o nei i ai. Ae sa toe fa’apea ifo i lona loto, atonu lava e manuia lana si’igama’i lea ua alu nei i Nairobi. Atonu fo’i, o lo’o i ai ali’i ma tama’ita’i foma’i, latou te iloa le tulaga ua o’o i ai ia i lea taimi. Ua fa’alogoina lava lona tigaina tele i lea taimi a’o alu pea le va’alele e aga’i atu I le Falema’i o Nairobi, mo ona togafitiga.

 

E faia pea

 

Fa’aliliu: Akenese Ilalio Zec

 

Comment Here