Ads by Google Ads by Google

Fagogo: O le Sone Vevela

Vaega: 7

 

Fa’afeiloa’i atu i le mamalu o le atunu’u i lenei taeao fou, taeao toto’a, taeao manino, i le alofa ma le agalelei o le Atua Soifua. E i ai pea le fa’amoemoe, o lo’o fa’apena ona maua e le atunu’u le filemu ma le manuia mai i lo tatou Atua e ala i Ana fa’amanuiaga mo i tatou i aso uma lava.

 

Ae alo maia, o le veaga lona fitu lenei o la tatou tala fa’asolo, ae ia manuia galuega ma tiute o le a feagai ai i lenei aso. Na muta mai la tatou tala ina ua amata ona maua Tiali i le fa’ama’i, o le tiga o le ulu, o le tiga o polo o ona mata, o lona tua ae maise o le fiva ua a’afia ai nei.

 

Ua matua’i suia lava Tiali i se suiga leaga ma le mata’utia, o mea na fiafia i ai ua matua’i le toe fia auai lava. O ona uiga tausa’afia ma le galue malosi sa va’aia e tagata faigaluega, ua le toe maua. Ua amata ona itaita gofie, o le va’aiga fo’i i ona foliga, ua matua’i suia lava i se va’aiga fa’amomoi loto, ma ua tau fa’amata’u fo’i i si tina o lo’o tausia ia. O le isi itu mata’utia ua a’afia ai nei Tiali, ua na le iloa po’o fea le mea lea e i ai nei, ua galogalo mea uma i lona mafaufau.

 

Ina ua le toe va’aia Tiali i lana galuega, ma ua le toe va’aia fo’i e isi tagata faigaluega, sa lagona le popole, ma o le ala lea sa o latou o ai loa i le fale o Tiali, ona o lo latou fia iloa po’o a mai. Ina ua ulufale tagata faigaluega i totonu o le fale o Tiali, sa o latou va’aia ai le tigaina o Tiali ma ua fai ai nei le tonu e sili pe a ave Tiali i le falema’i.

 

Ona o le tigaina tele o Tiali, o le ala lea sa le mafaia ai ona ia ave le ta’avale, ma na ofo ane se isi o ana tagata faigaluega na te uliina le ta’avale ma ua ave loa Tiali i le falema’i tua o lo’o i totonu o le nu’u o Kisumu i talane o le vai tuloto o Vitolia po’o le Lake Victoria.

 

Ua a’e nei se manatu i le ali’i foma’i e sili pe a alu Tiali i le falema’i tele e igoa ia Nairobi Hospital, ma o se falema’i ua sili ona lelei ana togafitiga o tagata mama’i i le itu i matu o Aferika. O feso’ota’iga e ala i telefoni e fai lava si faigata i lea itu o le atunu’u, ma ua iloa fo’i e le ali’i foma’i o lo’o mafai lava e Tiali ona savali, e mafai fo’i ona alu i luga o le va’alele na o ia, ma o lo’o lava fo’i le seleni e totogi ai lona pasese.

 

Ua iloa fo’i ma mautinoa e Tiali e tatau lava ona alu i le falema’i o Nairobi mo ona togafitiga ina ia maua ai sona mapusaga. Ua va’alau nei le ta’avale la’upasese ma ua alu ai nei Tiali i le malae va’alele, ma ua ti’eti’e nei i le va’alele o le Kenya Airways mo lana malaga i le falema’i o Nairobi.

 

E mafai fo’i la ona a’afia ai malo ‘ese’ese o le lalolagi i le aso e tasi, e i ai, Paris, Tokyo, New York, Los Angeles, ma so’o se itu o le lalolagi e alu i ai va’alele, ona o tagata o le a maua i le fa’ama’i o le a malaga i luga o va’alele ma a’afia ai le tele o isi tagata.

 

Ua ofi atu nei i totonu o le li’o lenei ona o Tiali ma le ma’i lea ua a’afia ai nei, ma o le a avea ma fa’afitauli tele i le soifuaga o tagata soifua. O le va’alele ua malaga ai nei Tiali i Nairobi, o se va’alele e to’a tolu sefululima tagata e mafai ona malaga ai. Ua fa’aola le afi o le va’alele ma ua lele loa e aga’i atu i le falema’i o Nairobi. Na ui atu i luga o le Vaituloto o Vitoria, (Lake Victoria), o se vai e lanu moana atoa ma o lo’o i ai se nofoaga fa’apitoa i le isi itu o le vaituloto, e fa’aaoga e tagata faifaiva, o lo’o nonofo latalate ane i le vaituloto o Vitolia.

 

E faia pea

 

Fa’aliliu: Akenese Ilalio Zec