Fagogo: O le Sone Vevela

Vaega: 78

 

Fa’atalofa atu i lou alafa’i mai i fanuga lelei i lenei taeao fou i le tausiga alofa a lo tatou Tama oi le lagi, e i ai pea le fa’amoemoe maualuga o lo’o fa’apena ona o tatou maua fa’atasi le manuia ma le soifua laulelei i lenei aso. ia manuia faiva ma tiute o le a feagai ai i lenei aso.

 

Na muta a latatou tala, ina ua fai le fonotaga a C.J. Peters, o Peter Jahrling ma Tom Geisbert e uiga i ata ia na pu’e e Tom. Ua uma fo’i ona fai le fa’atonuga ia toe faia nisi su’esu’ega, ina ia mautinoa ai. A ma’ea ia su’esu’ega, ona iloa ai loa lea o le tulaga e tatau ona fa’atino e le Vaega a le Ami a le Malo Tele, i totonu o le nofoaga o i Fort Detrick.

 

Ina ua alu ‘ese mai le ali’i o Colonel Peters mai le ofisa sa faia ai le latou fonotaga, ua liliu ane nei Jahrling ma Geisbert ma ua fai loa le la talatalanoaga i lea taimi. O le mea ua tupu, e le i fa’ailoa e i la’ua nei i a Colonel Peters, na fai a la su’esu’ga ae e le i ofuina o la ofu ma totigilima e tatau ona fai, ma o se mataupu ua sili ona ogaoga i  totonu o le nofoaga su’esu’e a le Ami.

 

Ua toe faitau nei e i la’ua aso ua mavae talu ona mae’a a la su’esu’ega ma o la iloa ai, ua sefulu aso talu ona ma’ea le faia o a la su’esu’ega i manuki nei, ma o le aso e soso’o ai, e sefulutasi i ai aso. Ua o la mafaufau nei i o la aiga, ae maise ai afai ae iloa e Colonel Peters, o lona uiga o le a ave i la’ua e tu’u i totonu o le Slammer, po’o le potu fa’apitoa mo i latou na galulue i totonu o le potu 4, lea e i ai virusi mata’utia pe afai o le a a’afia.

 

O le Slammer e pei ona fa’aigoa ai e tagata o le Malo, fai mai e le mafai ona so’ona alu i ai se tasi, se i vagana foma’i fa’apitoa ma e le mafai ona toe faia se feso’ota’iga ma aiga. E fa’aitete gata lava, ona o tulaga ina ia puipui malu le soifua o i latou o lo’o galulue i totonu o le fale su’esu’e lenei a le Ami a le Malo Tele. Ua toe talatalanoa nei Peter ma Tom i uiga va’aia o le virusi o le Malburg, ona afai o le virusi lenei ua maua ai manuki, o lona uiga, ua matua’i fa’aletonu lava le tulaga ua o’o i ai i la’ua.

 

Na toe talatalanoa nei e uiga i si ali’i foma’i manu o Dan Dalgard, o ia lea o lo’o galue i totonu o le Kamupani a le Hazelton Washington, lea na avane ai manuki nei. O Dan sa ia faia ta’otoga o manuki, e ala lea i le tipiina o manava o manuki, o le tino atoa o manuki, ua lagona ai le popole, ona afai o lea, o lona uiga, o le a a’afia i latou uma.

 

Ua toe manatu le ali’i foma’i o Peter Jahrling e leai se mea o tupu i a Dan Dalgard, o lona uiga la, e leai fo’i se mea e tupu ia i la’ua ma Tom Geisbert. Ua tu’u fesili nei le mafaufau o le ali’i foma’i o Peter, po’o fea e sau ai, po’o se virusi fou ea pe leai, ae afai ae loka i la’ua i totonu o le Slammer po’o le falema’i e le mafai ona toe asiasi i o la aiga, o lona uiga, o le a le ma’ea le la su’esu’ega ma Tom Geisbert. O nei mea uma ua tutupu mai, na a’e ai loa so la manatu e sili pe a tapuni loa o la gutu, ia ‘aua lava nei tautala pe fa’ailoa i se tasi.

 

Ua fai nei le la tonu, o le a tui o la toto ma fai i ai su’esu’ega pe mata ua a’afia i la’ua i le virusi pe leai.  O le isi itu na o la manatu i ai, e le tatau ona su’eina o la toto i totonu o le nofoaga lenei a le Ami, aua afai ae maua, o lona uiga, o le a ave sa’o lava i la’ua i totonu o le Slammer. O lea na o ai loa ua sa’ili le foma’i tua, ua tui ai o la toto mo su’esu’ega, e aunoa ma se tasi na iloaina. Na folafola e le ali’i foma’i tua i a Jahrling ma Geisbert, o le a le ta’uaina lava i se tasi. Ina ua ma’ea ona fai tui o i la’ua nei, na ave ai loa e le ali’i foma’i o Peter Jahrling o la toto ma Tom Geisbert i le nofoaga a le Ami i Fort Detrick e fai ai ana su’esu’ega.

 

E faia pea …

 

Fa’aliliu: Akenese Ilalio Zec

Comment Here