Ads by Google Ads by Google

Fagogo: O le Sone Vevela

Vaega: 74

 

Fa’afeiloa’i atu i le atunu’u i lenei taeao toto’a, aua o lea ua o tatou va’aia sulu o le la o lenei aso fou i le alofa ma le agalelei o le Atua Soifua, e ao ai ona o tatou fa’apea ifo, “Lo matou Tama e, oi le lagi, ia Paia Lou Suafa, ia o’o mai lou Malo, ia faia Lou finagalo i le lalolagi e pei ona faiai le lagi, Amene.”

 

Afai sa e faitau i le amataga o la tatou tala, sa ta’ua ai le igoa o le ulugali’i lenei o Jerry ma Nancy Jaax. O se ulugali’i e maualuluga o la tulaga i totonu o le Vaega ‘Au a le Ami a le Malo Tele. E to’alua le la fanau, ua sefululua (12), nei tausaga o Jamie, ae sefulufa (14) tausaga o Jason. I le amataga mai o la tatou tala sa laiti le fanau a lenei ulugali’i, e lima tausaga o Jamie o le teine, ae fitu tausaga o Jason. O Jerry ma Nancy Jaax e galulue fa’atasi i totonu o le USAMRIID, o le vaega lea o lo’o latou su’esu’e so’o se manu ae e le i fa’aaoga e fai ai su’esu’ega i virusi ‘ese’ese. Ae ua maualuga le tulaga ua i ai nei  Nancy Jaxx, i totonu o le vaega su’esu’e a le Ami i Fort Detrick.

 

Ina ua ma’ea le feilo’aiga a Jerry, Nancy ma le la fanau ma le tama o Nancy, na toe malaga nei i le isi itu o Kansas e igoa o Wichita e asi le tina o Jerry, o Ada. Fai mai le fa’amatalaga, o lenei tina e nofo to’atasi na o ia, e tau lata ane i le mea o lo’o i ai le tama o Nancy.

 

Ina ua taunu’u le malaga a Jerry ma Nancy Jaax i le fale o Ada, sa o latou feiloa’i fiafia ma talatalanoa e uiga i galuega o lo’o feagai ma Jerry ma Nancy i totonu o le Ami. Fai mai na alu alu lava le talanoaga fiafia a le aiga atoa, ae na ta’u loa le igoa o John, le uso o Jerry lea na tagata valeina, ua te’i lava ua tu ta’i tasitasi a’e i luga le tagata ia ma alu i lona potu.

 

Ina ua maua e Jerry ma Nancy le tala e uiga i le tagata valeina o John Jaax, fai mai na toetiti lava a fa’aletonu ai Jerry, ua le toe fia faigaluega, ua le toe fia faia lava se isi mea, e foliga mai ua fia alu atu ai ma ia.

 

Ae sa fautua pea Nancy, ona o lona alofa i lona to’alua ae maise ai o tulaga ua va’ai atu nei i ai. Ina ua ta’u le igoa o John e lo latou tina o Ada, fai mai ua le mafai ona taofiofi loimata o le lo’omatua, ma i’u ai ina tu a’e i luga ma savali i totonu o lona potu moe.

 

Ina ua ma’ea le feiloaiga ma le ‘aiga fiafia o le Aso Fa’afetai, sa toe fa’amavae loa ae toe fo’i ane i le fale o le tama o Nancy, ona ua i ai lo la manatu e ave le tama o Nancy i se falema’i e fai ai ona togafitiga. Ua maua le falema’i i totonu o Kansas e ave i ai le toeaina, ma ua ma’ea fo’i ona faia fuafuaga uma mo togafitiga o le tama o Nancy, o Curtis Dunn.

 

Ua toe fo’i nei le malaga a Jerry ma Nancy ma le la fanau i Maryland, ina ua ma’ea le Aso Fa’afetai lea na o la asiasi atu ai i o la matua i Wichita Kansas. E ui fo’i ina ua feagai nei le tama o Nancy ma ma’i faigata, ae sa loto tele lava Nancy ma lona naunauta’iga, ia maua se togafitiga mo lona tama.

 

Ua toe taliu nei le malaga i Maryland, ona o iina o lo’o nonofo ai nei Jerry ma Nancy Jaax ma le la fanau, ona o galuega o lo’o feagai ma le ulugali’i. O le taimi lea, ua galue Nancy i totonu o le potu vevela lea o lo’o i ai virusi ‘ese’ese ma ua si’itia nei le tulaga o Nancy Jaxx i le Lieutenant Colonel i totonu o le Ami a le Malo Tele.

 

E faia pea …

 

Fa’aliliu: Akenese Ilalio Zec