Fagogo: O le Sone Vevela

Vaega: 73

 

Taeao manuia i le alafa’i mai o le atunu’u i fanuga lelei i lenei aso, e ao ai ona o tatou fa’apea ifo, “Le Ali’i e, ia ia te Oe pea le vi’iga, o le fa’ane’etaga ma le famanu e le aunoa, Amene.” Ia manuia le alo atu o le atunu’u i feau ma galuega o le a feagai ai i lenei aso. Ae alo maia, o le a toe fa’aauau atu la tatou tala fa’asolo e pei ona masani ai.

 

Ua faia pea su’esu’ega a le ali’i foa’i o Peter Jahrling ma le ali’i o Thomas Geisbert i sela po’o (cells) o lo’o i totonu o nifo tetele o manuki. Na tilotilo le ali’i o Peter i totonu o le nifo o le manuki, ma sa ia fa’aaoga ai mea va’ai fa’apitoa, ma na iloa ai, ua matua’i fa’aleagaina lava sela, e foliga mai ua fufula ma ua pa pa mai fafo.

 

Fai mai a a’afia ni sela (cells) i le virusi, e i ai le manogi e le manuia i le sogisogi, ae o lea ua iloa nei e ali’i su’esu’e o lea ua a’afia sela o manuki i le virusi, ae e leai se manogi o i ai. O le isi lea tulaga na maofa ai foma’i. O le tele o su’esu’ega nei sa fa’atinoina e Thomas e pei la ona ia ave’ese mai le sela mai nifo tetele o le manuki ma tu’u i totonu o se fagu fa’apitoa, ina ia mafai e le meava’ai su’esu’e ona iloa atu. 

 

O le isi mea sa ia faia, o le ave’ese mai lea o isi sela (cells) ma tu’u i totonu o le isi fagu e teu ai, ma e sau se taimi ona va’ai lea pe i ai se mea e ono tupu ai. O le taimi lea, ua amata ona pogipogi, ma ua tatau fo’i ona fa’ama’ea uma ana galuega. Ua mafaufau nei le alii’i o Thomas Geisbert, i le latou su’ega manu, po’o le tuligamanu i le fa’ai’uga o le vaiaso, lea na o latou o ai ma ana uo.

 

Ua alu nei Thomas i lona fale e tapena lana ‘ato aua e o fa’atasi ma isi ana uo e fanafana manu i lea lava aso. Sa i ai lona manatu o le a fa’aaoga lana ta’avale o le Ford Bronco, peita’i, ua leaga ua le toe ola. Na fa’atalitali nei Thomas e alu ane le isi ana uo e piki ia, ona alu ai loa lea o le latou fanafanaga manu i le aso lava lea. Afai ae amata ona i ai se fa’ama’i i totonu o le tagata soifua, e fa’agasolosolo lava mai le tolu i le sefuluvalu aso, a’o le taimi lea, ua amata ona a’afia ia alatoto o le tagata i le fa’ama’i. Ona soso’o loa lea ma le tiga o le ulu.

 

Aso Fa’afetai, Novema 20-25. Mo le aiga o Jerry ma Nancy Jaax, o se aso Fa’afetai le fa’anoanoa mo i la’ua ma le la fanau, ona fa’atoa tuana’i le tagata valeina o le uso o Jerry, lea na toetiti a fa’aletonu ai Jerry. Ona fai mai e ‘ese le fealofani o lenei au uso. E leai se mea e ono ita ai le tasi i le isi, mai lava i le laiti, ma o lea ua tagata matutua ma ua fai fo’i aiga, e le mafai ona mavae le alofa o le tasi i le isi.

 

Ae ina ua tupu le fa’alavelave i le uso o Jerry e igoa i a John, sa fai ai lava le tala a Jerry i lona to’alua o Nancy, ua sili ai pe ana oti atu ai ma ia. Ae sa taumafai pea Nancy ina ia fa’afilemu ma fa’ato’ato’a mea uma. O le Aso Fa’afetai la lea ua tapena ai nei le malaga a Jerry ma Nancy ma le la fanau, e o i Kansas e fai Aso Fa’afetai ma le tama o Nancy, ae maise o le tina o Jerry, aua e felata’i le mea e nonofo ai.

 

O le tama o Nancy o Curtis Dunn o lo’o tauivi ma le ma’i o le kanesa ma ua toe lava o ivi le tino o lenei tama, fai mai, na le malie Nancy i lona tama, ona sa i ai le manatu o le toeaina o Curtis, o le a fa’atau le fa’atoaga ae au mai le tupe e alu ai i Mexico e fai ai ana talavai, ma tau sa’ili ai pe i ai se mea e mafai ai ona toe ave’ese le kanesa mai i lona tino. E ui lava i lea itu, ae sa lagona le alofa o Nancy i si ona tama, ona ua toe manatu vave le fafine, i mafatiga ma tiga na feagai ma i latou i le taimi na maliu ai lona tina. Ua feiloa’i fiafia nei Nancy ma lona tama, ma ua talatalanoa e uiga i togafitiga e tatau ona fai mo le gasegase o Curtis.

 

E faia pea …

 

Fa’aliliu: Akenese Ilalio Zec

Comment Here