Vaega: 69

Taeao manuia, i le alafa’i mai o le atunu’u i fanuga lelei o lenei aso fou, o se aso fo’i e fa’aopoopo i lo outou soifua fa’apea ma si o’u nei ola vaivai. E ao ai ona o tatou momoli la’au i Foga’a, ma sunu’i lapalapa o malo i le Atua Soifua i aso uma o lo tatou ola. Ia manuia faiva ma tiute o lenei aso.

Na muta mai la tatou tala ina ua faia e le ali’i foma’ manu o Dan Dalgard ia su’esu’ega e uiga i manuki, ma na iloa ai, e foliga mai o le ma’i fiva ua maua ai, ona o le vevela o manava o manuki fa’apea ma mata ua mu mu atoa. O manuki ia na va’aia e Dan Dalgard, na mamate i le taeao na soso’o ai. Na alu atu le asiasiga a le ali’i o Bill Volt, ma na maua atu ai, ua mamate manuki nei.

Na toe vala’au loa le ali’i i a Dan Dalgard ina ia alu ane se i va’ai i le mea ua tupu i manuki nei. Aua, ina ua maua e Bill manuki nei ua mamate, na avane loa ma tu’u i luga o le laulau ma fai ai ana su’esu’ega. Na iloa ai e Bill Volt, e ‘ese le mea ua ia va’ai nei i ai, o le ala lea na toe va’ala’u ai i a Dan Dalgard e toe alu ane e va’ai manuki.

Ina ua taunu’u Dan Dalgard i le nofoaga o lo’o tausi ai manuki, na o la faia ai loa ma le ali’i o Bill Volt ia su’esu’ega i manuki ia ua mamate, ma na iloa ai e Dan e foliga mai ua mamate manuki ona o le malosi o le vevela o le fale, ona o lo’o leaga pea le ea malulu o le fale atoa.

Na toe iloa e le ali’i foma’i manu o Dan Dalgard o manuki e lua lea na fai i ai a la su’esu’ega ma le ali’i pule o le kamupani, o lo’o i ai le toto i totonu o la ma ma. O le a le mea ua tupu i manuki nei, o le fesili lea a Dan Dalgard ma e ofo ai lona loto i lenei mea ua tupu.

O le aso lava lea na toe taunu’u ane ai fo’i le isi ‘oka o manuki mai Filipaina. Na tu’u nei e le ali’i o Bill Volt manuki nei i le pa H, e tasi le pa e va ai ma le pa F, lea na i ai manuki ua mamate. Na i ai le popolega i le foma’i o Dan Dalgard, ona ua fai mai a ia, e foliga mai o le fa’ama’i e masani ona maua ai manuki, peita’i, afai ae maua i lenei fa’ama’i, o lona uiga e leai se manuki e ola.

Na toe fo’i nei le ali’i o Dan i lona fale, peita’i, ua le mafai ona ave’ese lona mafaufau ma manuki nei, ma o le ala lea na ia fai ane ai i lona to’alua, o le a toe alu e va’ai po’o fa’apefea mai manuki. Na alu nei Dan ma ua paka lana ta’avale i luma o le fale o lo’o i ai manuki. Ina ua tatala e le ali’i foma’i manu le fale, na ia fa’alogoina le ea vevela o lo’o sau mai totonu o le fale.

Ua ia fa’alogoina le fetagisi o manuki i lea taimi, ae na fa’ate’ia ina ua ia iloa atu ua mamate fo’i isi manuki i totonu o le pa. Na ave nei e le ali’i foma’i le manuki e tasi ma fa’ata’atia i luga o le laulau ma tago loa ua tipi le manava o le manuki ma tilotilo i totonu.

Ua amata ona fa’amaumau e Dan Dalgard e ala i ana tusitusiga mea uma na tutupu ae maise o lana su’esu’ega na fai i le manuki. Na iloa ai, o lo’o piliki i totonu le manuki, ua fefete le ‘ate, ua uliuli atoa le toto. O le mea ua tupu, ua le a’ai manuki ae ua na o le fa’atalitali i le taimi e mamate ai.

Ua fai ma galuega masani a le ali’i foma’i o Dan le alu e asi manuki, ma na maua atu fo’i e le ali’i isi manuki ua mamate. Na toe fai ai fo’i isi ana su’esu’ega ona o lona fia iloa pe o le a le mafua’ga ua mamate ai fa’apea manuki.

E faia pea…

Fa’aliliu: Akenese Ilalio Zec