Fagogo: O le Sone Vevela

Vaega: 68

 

Fa’atalofa atu i le mamalu o le atunu’u, i lou alafa’i mai i le manuia i lenei taeao fou i le alofa ma le agalelei o lo tatou Matai oi le lagi. E ao ai ona o tatou fa’apea ifo, “Le Atua e, o Oe o lo matou malosi’aga ma lo matou maluapapa, fa’afetai, fa’afetai tele i lou alofa mo i matou i aso uma o lo matou ola, Amene.”

 

Na muta mai la tatou tala i le auina ane o manuki i totonu o le nofaga i Amerika lea e fa’apitoa lava e fai ai su’esu’ega a ali’i foma’i. O le ituaiga manuki lea na avane mai Filipaina, o le ituaiga fo’i lea e u’umi lava si’usi’u, ma e nonofo ma feoa’i fa’atasi. O le latou mea’ai e ola ai, o tama’i pa’a e maua i le sami ma isi la’au o le vao. Ina ua taunu’u ane i le nofoaga o o le Kamupani a Hazelton Washington i Reston, na tu’u loa i totonu o pa ma ua maka mai le mata’itusi o le A se ia o’o i le L.

 

E lua manuki e taunu’u ane i Amerika, ua mamate, ma e le o se mea fou lea mea, ona a manatu i le feoma’i solo o manuki ae maise fo’i o le taua’imisa, e ono o’o lava i lea tulaga. Ae ina ua mava’e vaiaso e tolu na va’aia ai e ali’i su’esu’e ua amata ona mamate manuki.  I le Aso muamua o le masina o Novema, na va’ai ai e le ali’i o Bill Volt lea e onaina le kamupani o le Hazelton Washington, ua le aoga le oka o manuki lea na avane mai Filipaina. Ona ua fa’asolosolo ona mamate manuki, ae ina ua atoa le masina talu ona taunu’u ane manuki i Reston, na iloa ai e le ali’i pule ua tatau ona vala’au Dan Dalgard e alu ane se i va’ai i manuki ua fa’asoloslo ina mamate uma.

 

E tusa ma le luasefulu iva manuki ua mamate mai le ‘oka e selau lea na avane mai Filipaina. (Atonu ai ua fa’apea le mafaufau o le ali’i pule, “Se ua ga o mea gau ma mea guki.”)

 

I le taimi na mamate ai manuki, o le taimi fo’i lea na leaga ai le ea malulu e fa’amalulu ai manuki i totonu o le fale ua ma’ea ona saunia e le kamupani e tu’u ai. Ua atili ona gau ai le pisinisi a si toeaina o Bill Volt. Na iloa e le ali’i, o le tele o manuki mamate o manuki ia o lo’o i totonu o le pa o lo’o pipi’i ai le mata’itusi o le F, ma e pito lava i tua o le fale.

 

Na vala’au loa le ali’i pule o Bill Volt i a Dan Dalgard, se i alu ane e va’ai, po’o le a le mea ua tupu i manuki. Na fai si umi o fa’atali le ali’i o Bill, ae na te le o iloa atu, o lo’o pisi le ali’i o Dan Dalgard i nisi ona tiute. Ae na taunu’u ane loa le ali’i o Dan, o loa ma Bill e fa’asino i ai le pa F, lea e tele ina mamate ai manuki.

 

O totonu o le pa F, o lo’o i ai manuki lea na avane mai le ‘oka i Filipaina, ua fa’asolosolo le siakiina o manuki e le ali’i o Dalgard, ma na ia iloa ai e i ai manuki o lo’o malolosi pea, e i ai fo’i manuki ua amata ona mama’i.

 

O le mea na mata’i e le ali’i foma’i o Dan, o mata o manuki, ma na iloa ai, ua matua’i mu mu lava, o nisi fo’i, ua na o le pupula mai, ae ua le minoi mea papa’e o mata. Na fai nei ofu ma totigilima o le foma’i manu ona o lona fia mautinoa pe sa’o le mea ua ia va’ai nei i ai. Na alu nei i totonu o le pa o lo’o ta’atia mai ai le manuki, ma taumafai e fa’amatala ona mata, peita’i na iloa ane, ua amata ona tautau mai i lalo pa’u o mata ae ua mu mu atoa.

 

Na mautinoa ai nei e le ali’i o Dan Dalgard, ua amata ona mama’i manuki ona ua le toe fiafia e ta’aalo, ua le fia a’ai i mea ‘ai na fafaga ai, ma ua na o le sioa lava ua le toe minoi. Na fa’apea mafaufauga o le ali’i foma’i manu o Dan Dalgard, e pei lava ua le fiafia manuki, ona ua le ola le ea malulu o le fale. A fiafia le tagata i le ea malulu, e fiafia fo’i le manuki latou e fa’amalulu lona pa’u, pe a vevela.

 

E faia pea ...

 

Fa’aliliu: Akenese Ilalio Zec

Comment Here