Ads by Google Ads by Google

Fagogo: O le Sone Vevela

Vaega: 58

 

Fa’atalofa atu i lou alafa’i mai i fanuga lelei i lenei taeao fou, i le alofa ma le agalelei o le Atua Soifua, e ao ai ona o tatou si’i le vi’iga ma fa’afo’i le fa’amanu i Lana Afio, ona o mea silisili na te faia pea mo o tatou tagata. Ae alo maia, o le a toe fa’aauau atu la tatou tala fa’asolo, “O le Sone Vevela” e pei onai ai nei.

 

O le a toe fo’i la tatou tala i le tama’ita’i foma’i o Mayinga lea ua i totonu nei o le falema’i o Ngaliema i Kinshasa. Ua tu’u nei Mayinga i totonu o se potu fa’apitoa, afai e ulufale i ai se ali’i po’o se tama’ita’i foma’i, e muamua lava tapena uma ona lavalava fa’apea ma ona totigilima, ona fa’atoa alu ai lea i totonu o le potu.

 

Na va’ava’aia e se tama’ita’i foma’i mai Aferika i Saute e igoa ia Margaretha Isaacson ia Mayinga a’o i ai i totonu o le potu fa’apitoa lenei. I le taimi muamua na tausia ai e le tama’ita’i foma’i o Isaacson i a Mayinga sa fa’aaoga le mea manava e manava ai, peita’i, na toe suia ona ua fai mai a ia, e faigata ona manava ai, ona o le vevela tele.

 

Na fa’apea mafaufauga o Margaretha, e le taumate o le a le a’afia o ia ae na ia toe manatu i lana fanau ma fa’apea ai ua matutua uma tamaiti, ae o lenei tama’ita’i ua feagai ma ma’i faigata, talofa e, ua pei lava o le isi ana tama teine. O lea na ia tu’u ‘ese ai loa le mea manava, ae ua a’apa atu ma tausi Mayinga i ona lima e aunoa ma se mea na sefe mai ai.

 

Na faia e Margaretha togafitiga uma, ina ia fa’aolaina ai Mayinga, ae na talanoa ane i a Richard Preston, e fa’apea, “E le fa’apea le fa’ama’i o le AIDS, o le fa’ama’i o le AIDS e le taitai tutusa ma le virusi lenei.” Na toe fa’amatala ane e le tama’ita’i foma’i o Margaretha e fa’apea, sa ia taumafai e tu’u atu poloka ‘aisa i a Mayinga e fa’amalulu ai, e le gata i lea a’o tui e puipuia mai ai.

 

Ae ina ua faia ia togafitiga e Margaretha mo Mayinga, na fa’apea ane i ai Mayinga, “Ua ou iloa ua ou tigaina ma ua lata ona ou oti.” Na liliu ane nei le tama’ita’i foma’i o Margaretha ma fa’ape ane ia Mayinga, “E leai, ‘aua e te tautala fa’apena, e te le oti.”

 

Ua amata ona sau le toto mai le isu ma le gutu o Mayinga, e tafetafe lemu mai lava i fafo, ae ua le mafai ona taofiofia, e le to’a fo’i, o le ituaiga piliki lea, se i vagana ua pe le fatu, ona fa’atoa uma lea. Na tu’u nei e le tama’ita’i foma’i o Margaretha ia paina toto e tolu mo Mayinga e sui ai le toto lea e tafe mai i lona gutu ma lona isu, ae sa le i manuia ia togafitiga. E le i umi, ae fa’alogoina loa e Mayinga ua amata ona ta ta fa’agesegese mai lona fatu, ma na ia iloa ai loa, ua o’o mai lona taimi.

 

Na lagona le fefe ma le mata’u o Mayinga, ae ina ua uma lava le ta ta o lona fatu, na maliu ai loa i totonu o le potu o le falema’i lea na taofia ai, ma sa i ai lava le tama’ita’i o Margaretha i le taimi atoa na ma’i ai Mayinga. Na va’aia le maligi ifo o ona loimata, ina ua va’ai atu i lenei tama’ita’i la’ititi ae ua ave’ese, ona o le virusi mata’utia o le Ebola.

 

Ua lepa le toto o Mayinga i totonu o le potu na ma’i ai ae sa le i fa’afiti ai le tama’ita’i foma’i o Margaretha sa ia fa’amama totonu o le potu ma tapena kapoti, ma le moega na taoto ai Mayinga.

 

E faia pea …

 

Fa’aliliu: Akenese Ilalio Zec