Fagogo: O le Sone Vevela

Vaega: 55

 

Fa’amalo le soifua, malo fo’i le onosa’i i faiva ma tiute o lo’o feagai ai ma le mamalu o le atunu’u. E ao ai ona o tatou fa’apea ifo i o tatou loto, “Le Atua e, o le vi’iga e fa’afo’i atu i Lau Afio, ona o mea silisili e faia pea mo o matou tagata, a’o ai ea i matou ua e saga alofa mai pea i ai, ae o le vi’iga matou te fa’afo’i atu ia te Oe Tama, fa’afetai, fa’afetai, fa’afetai tele, Amene.”

 

Ua o’o nei la tatou tala i le ali’i foma’i o Joel Breman lea na o ma le isi vaega o foma’i i le nu’u o Bumba, ona o le fia iloa po’o le a le mea ua tupu i le nu’u lea. Manatua fo’i, o le nu’u lea ua le toe o’o i ai se feso’ota’iga, ma e foliga mai ua le toe i ai i le fa’afanua o le lalolagi. Ae fa’asolo pea lau faitau e tusa ai ma la tatou tala po’o fea o le a o’o i ai le ali’i foma’i o Joel Breman. 

 

Manatua, o le tala lenei o lo’o fa’amatala ane e le ali’i foma’i o Karl Johnson i le tusi tala o Richard Preston, e uiga i le mea na tupu i totonu o Zaire i le latou malaga na alu i ai i le sa’ilia o le virusi o le Ebola.

 

Ina ua alu le va’alele e aga’i atu i Bumba, na usi lelei le maimoa a le ali’i foma’i o Breman i fafo, ma na ia iloa atu ai le lau usiusi o le vao matua, o lo’o ola i auvae mauga. Na matamata lava le ali’i foma’i, te’i lava ua oso a’e lona fefe ma lona popole, ona e sefe atu le i ai pea i luga o le ea, na i lo le tu lau ’ele’ele o le va’alele. Na te’i lava ua fa’apea ifo isi ona mafaufauga, “O lea ua ou alu i Bumba ou te oti ai.”

 

O le ali’i foma’i o Joel Breman, sa fa’atoa ma’ea lava lana galuega i totonu o Michigan, ae fa’ate’ia ina ua vala’au ane e sauni e alu i Aferika fa’atasi ma le vaega su’esu’e lenei. Ua mafaufau nei i si ona to’alua ma si ana fanau e to’alua lea o lo’o  i Michigan, ma ua o’o ai ona mafaufauga, o le a le toe va’ai i ai.

 

E le i lava mea faigaluega na alu ane ma ia, ua na o si ana tama’i ato pa’u la’ititi lava, o lo’o i ai lana mea fulunifo, o nai ona lavalava, ae e leai ni mea faigaluega e tele na o ane ma latou i Bumba. Ua amata ona fa’aifoifo i lalo le va’alele, ma na iloa atu ai e le ali’i foma’i le nu’u o Bumba lea o lo’o fa’asolosolo ona atufalega i le isi itu o le vaitafe o Congo, po’o le Congo River.

 

Na sese’e le va’alele i le isi itu o le nu’u lenei ma na va’aia ai le fefe ma le matata’u o pailate ma i latou o lo’o galulue i totonu o le va’alele, e foliga mai ua le fia manava i le ea o Bumba, ae ua fa’atopetope nei ona au mai i fafo ato a ali’i foma’i, ma taumafai loa ina ia toe o ‘ese vave mai Bumba. Ua na o le tutu nei o ali’i foma’i ma tilotilo atu i le lele ‘ese o le va’alele.

 

I totonu o le a’ai, na o latou feiloa’i ai ma le ali’i Kovana o Bumba Zone. Sa ia fa’ailoa ane i ali’i foma’i e fa’apea, ua matua’i pagatia lava Bumba, ua le toe maua se masima, ua le toe maua fo’i se suka, ma ua le maua fo’i se pia.

 

Sa i ai se ali’i foma’i mai Belgiam na te iloa le mea e tatau ona fai i mea fa’apea, na a’apa ane ne i le ato ma tu’u i luga o le laulau, ma ua tatala le sipa o le ato, ae fa’ato’ulu mai i fafo tupe. “Lau afioga i le Kovana, atonu ua lava ia mea e fa’afaigoie ai le mataupu.” Na fa’ate’ia le ali’i foma’i o Breman, ma fesili loa po’o le a le mea ua na faia, ae sau le tali a le ali’i lea, o auala ia e fai ai mea fa’apea i totonu o Bumba. Ia soia ia, e fa’apea fo’i le faiga o nai a tatou fo’i mea, o si au mea sia Chief, a le o le na, e a, e lava pe leai, a leai, o le a toe velo atu le isi vaega.

 

E faia pea …

 

Fa’aliliu: Akenese Ilalio Zec

Comment Here