Fagogo: O le Sone Vevela

Vaega: 54

 

Taeao manuia i le mamalu o le atunu’u, e i ai pea le fa’amoemoe, o lo’o fa’apena ona maua e le atunu’u le soifua laulelei ona o le tausiga alofa a lo tatou Matai i le lagi. E ao ai ona o tatou fa’apea ifo, “Le Ali’i e, e silisili lava Oe i mea uma matou te manatu i ai, e leoleoina ai i matou i ala o le filemu, o le loto fa’amagalo, o le onosa’i ma le fa’apalepale ae fa’asilisili le alofa, ia vi’ia pea Oe Tama e fa’avavau, Amene.”

 

Na muta mai la tatou tala, i le feiloa’iga a le ali’i foma’i o Karl Johnson ma le tusi tala o Richard Preston, lea o lo’o ia tusia le tusi, lea fo’i ua ou taumafai e fa’aliliu i la tatou gagana. O lea la o lo’o fesili pea le ali’i tusi tala i le ali’i foma’i i sona fa’alogona ina ua va’ai tino i le virusi o le Ebola, lea sa ia ona fa’aigoaina.

 

Na fai si popole o le ali’i tusi tala, ina ua fa’alogologo atu e ‘ese mafaufauga ma manatu ua tali ane ai nei le ali’i foma’i ia te ia, peita’i, sa ia manatu fo’i i le tulaga fa’afoma’i ae maise fo’i o le tagata o lo’o su’esu’eina ituaiga virusi ‘ese’ese. Sa toe fa’amatala le ali’i foma’i o Johnson e fa’apea, “E ave’eseina le fefe, pe afai o le a va’aia le mata’utia ma le uiga tonu o le lalelei pe a e va’ai i le virusi o le Ebola i lalo o se mea va’ai, e pei ua e va’ai i se fale e tioata atoa, o se mea fo’i e matua’i mama lava.”

 

Ua le tautala le ali’i tusi tala o Richard Preston i lea taimi, ona o lona manatu fa’ale tagata tusitala, e le fia fa’alogo i ai se isi i fa’aupuga ia ua fai ane e le ali’i foma’i. Peita’i, sa ia manatu i lea taimi, o le matafaioi a lenei ali’i, o le foma’i i mea tau virusi, atonu o lona lea fa’alogona sa i ai i le taimi na ia va’ai ai i le virusi o le Ebola. ia soia ia, ana fa’apea o se tagata Samoa lea e fai ane i ai tala a le ali’i foma’i lenei, o lona uiga e le i uma mai, ae pa’u i lalo, ua tau ai le ‘ala i le ulu. Ae tatou onosa’i, o le tagata ma lana galuega e fiafia i ai, o le tagata fo’i ma ona manatu i mea o lo’o fiafia i ai.

 

 O le ali’i foma’i o Karl Johnson na avea ma ta’ita’i o le vaega o le au su’esu’e mai le Fa’alapotopotoga o le Soifua Maloloina i le Lalolagi, po’o le WHO, na malaga i Kinshasa e taumafai e taofi le virusi o le Ebola.

 

Sa i ai le isi ali’i foma’i e igoa ia Joel Breman, na faigaluega fa’atasi ma Karl Johnson i le C.D.C na o latou malaga fa’atasi i Zaire. O lenei ali’i foma’i sa o ma nisi o le vaega lava lea i le nu’u o Bumba. Manatua fo’i, o le nu’u lenei, ua le toe maua se tala po’o a mai tagata, ona ua motusia le feso’ota’iga i luga o leitio, ua le maua fo’i se tasi e toe malaga mai Bumba, e maua ai se fa’amatalaga i le tulaga o lo’o i ai le nu’u.

 

O lea na malaga ai loa le ali’i foma’i o Joel Breman ma na fa’aaoga ai le va’alele o le C-130 na fausia i Amerika, ae o lo’o fa’aaoga e le vaega a le Air Force i Zaire, ma o le va’alele lenei, o le va’alele a le ali’i Peresitene o  Mobutu. O totonu o le va’alele, e matua’i matagofie lava, e i ai uma mea e mo’omia, ma e fai mai le tala, o le va’alele e feavea’i ai le ali’i Peresitene ma lona aiga e aga’i atu ai i Switzerland mo a latou tafaoga.

 

Ae o lea ua fa’aaoga e le vaega su’esu’e lea ua malaga atu nei e tau sa’ili po’o fea ua o’o i ai le nu’u o Bumba.

 

E faia pea …

 

Fa’aliliu: Akenese Ilalio Zec

 

Comment Here