Fagogo: O le Sone Vevela

Vaega: 53

 

Fa’atalofa atu i le mamalu o le atunu’u i lenei taeao fou, e i ai pea le fa’amoemoe, o lo’o aoina le masina i le soifua laulelei o le atunu’u. E ao ai ona o tatou fa’apea ifo, “Le Ali’i e, o Oe o le Mataisau o mea uma lava, fa’afetai i lou alofa, o Lau pule lea.” Ia manuia le alo faiva o le atunu’u i tiute ma galuega o le a feagai ai i lenei aso.

 

Na muta mai la tatou tala ina ua maua nei le avanoa e feiloa’i ai le tusi tala i a Richard Preston ma le ali’i foma’i o Karl Johnson, ua uma ona talanoa i luga o le telefoni, a’o lea ua va’ai le tasi i le isi, ma ua fa’amatala nei e le ali’i foma’i mea uma na tutupu i totonu o Zaire i Aferika e uiga i le virusi mata’utia lea ua maliliu ai le to’atele o tagata.

 

Ina ua maua le tonu, o lea na alu ai loa le ali’i tusi tala o Richard Preston i Montana e feiloa’i ma le ali’i foma’i o Karl Johnson ma la talanoa ai e uiga i le virusi o le Ebola ae maise o le malaga lea na alu i Zaire.

 

“O le a le mea na tupu i Zaire?” o le fesili lea a le ali’i tusi tala o Preston i le ali’i foma’i o Johnson.

 

“Ina ua matou taunu’u i Zaire, ua foliga mai o se nofoaga o tagata ua leaga ulu, e leai se tala na maua mai i Bumba, leai se feso’ota’iga i luga o leitio, ma na ou iloa ai, ua o’o i se tulaga pagatia tagata o lo’o nonofo i Bumba.  Na ou iloa ai fo’i, ua matou fa’afesaga’i nei ma se virusi fou. Matou te le iloa fo’i pe sosolo le virusi e ala i peau o le ea, e pei o le fa’ama’i o le flu. Ae afai na mafai ona sosolo le virusi lenei e ala i le ea, o lona uiga, ua leai se lalolagi, ua maliliu uma tagata o le lalolagi.”

 

“E fa’apefea ona tupu lea mea?” O le fesili lea a le tusitala o Preston.

 

“E le taumate o le a to’aitiiti tagata e feola ma o le a faigata tele, ona taofiofia, ana fa’apea fo’i e a’afia tagata ona e fa’aaoga e le virusi le ea, o lona uiga e leai se nofoaga e sao mai ai, o le a sosolo i le lalolagi atoa ma e leai se tasi e toe ola mai.”

 

Ua fa’aauau pea le talanoaga a le tusi tala o Preston ma le ali’i foma’i o Johnson ma na toe fesili Preston i a Johnson, “O e popole e i’u ina tele se a’afiaga o le a tula’i mai ona o le virusi lenei?” Fai mai le fa’amatalaga a le ali’i tusi tala o Preston, na matua’i pupula to’a ane nei le ali’i foma’i ia te ia. Ae na ia toe fa’apea ane i le ali’i foma’i, “O le uiga o la’u tala, o se virusi o le a maliliu uma ai tagata?”

 

Na toe tali le ali’i foma’i, “E i ai lo’u manatu, e mafai ona tupu. Ae peita’i, e le i tupu mai, ma ou te le o popole. Ae ua na o se virusi o le a fa’aitiitia ai le pasene o tagata feola, pe tusa i le tolusefulu pasene, pe o le iva sefulu pasene.”

 

“Iva pasene mai le sefulu pasene o tagata ola, o le a maliliu, ae e te le o popole i ai?” o le tala lea a le ali’i tusi tala na fai ane i le ali’i foma’i. Fai mai le fa’amatalaga a Perston, na ia va’aia i lea taimi le fa’asologa o mafaufauga o le ali’i foma’i ma na ia fa’apea ane ia te ia, “O le virusi e i ai fo’i lona aoga i se ituaiga e fa’aitiitia ai.”

 

Na toe fesili Preston i le ali’i foma’i, “A e va’ai i se virusi, e matagofie i lau va’ai?” Na tali le ali’i foma’i, “Ioe, o se va’aiga matagofie tele, e pei o se taimane.”

 

E faia pea …

 

Fa’aliliu: Akenese Ilalio Zec

 

Comment Here