Vaega: 52

“Le Atua e, o le vi’iga ma le loto fa’afetai e fa’afo’i atu i Lau Afio, fa’afetai i lau tausiga alofa mo i matou i aso uma o lo matou ola, fa’afetai i Lau fo’ai paia ma Au fa’amanuiaga lea o lo’o matou o’ao’a ai pea i faleseu ma o matou sa’a ai i ma’a o malie, fa’afeta, fa’afetai, fa’afetai tele, Amene.”

Ia manuia le alo faiva o le atunu’u i feau ma galuega o lenei aso, ae alo maia, o le a toe fa’aauau atu la tatou tala fa’asolo, O le Sone Vevela. Ina ua ma’ea le galuega a le ali’i foma’i o Karl Johnson i totonu o le C.D.C, na faia loa sana malologa i lona aiga i Montana. Ae sa taumafai pea le tusi tala o Richard Preston, e fia maua se feso’ota’iga ma le ali’i foma’i, e uigai le virusi o le Ebola.

Fai mai Preston, e lua aso o ia taumafai ina ia maua se feso’ota’iga ma le ali’i foma’i o  Carl Johnson, ona o lona fia iloa le tulaga na o’o i ai, ina ua maua e le foma’i le virusi o le Ebola. Ae i le lua o aso talu ona fa’atali le ali’i tusi tala o Preston, na fa’ate’ia o ia ina ua maua mai le fax (tusi) mai le ali’i foma’i o Johnson ma fa’amatala ane loa ia Preston mea uma na tutupu a’o i ai o ia i totonu o le C.D.C. Fai mai le tala a le ali’i foma’i, e le o se fa’alogoga mata’utia na ia va’aia, ae na o fa’alogona fefe ma le popole ina ua va’ai sa’o i mata o le gata uiogo.

O lea la ua fa’amatala ane nei e Johnson i a Preston mea uma na tutupu, ma o lo’o fa’apea mai, ina ua mavae aso e lua talu ona faia a latou su’eus’ega, o ia ma nisi o ali’i foma’i na alu loa le latou malaga i Aferika, ona o lo latou naunau ia taofia le pepesi o le virusi i totonu o Zaire ma Sudan, a’o le taimi lea, o lo’o fa’aauau pea le sosolo o le virusi i totonu o Sudan.

Fai mai le fa’amatalaga a le ali’i foma’i o Karl Johnson i a Richard Preston, na muamua o i Geneva ina ia faia ai sa latou feso’ota’iga ma le Fa’alapotopotoga a le Soifua Maloloina i le Lalolagi, World Health Organization lea ua fa’apu’upu’uina i le WHO. Ae fai mai ina ua taunu’u atu, e le o lava se malamalama’aga a lea Fa’alapotopotoga i le a’afiaga o lo’o i ai le virusi ma le solo maliu o lo’o i ai nei nai tagata i totonu o Aferika. Na toe tapena nei le latou malaga ma ua fa’aopoopo nisi  o  atigipusa o lo’o i ai le tele o masini ma mea e fa’aaoga mo a latou su’esu’ega ma togafitiga mo e ua a’afia i le virusi ma ua o nei i le malae va’alele i Geneva mo le malaga atu i Aferika.

Peita’i, na i ai le ali’i foma’i e galue fa’atasi ma Johnson, ua fefe e alu i Aferika, fai mai le fa’amatalaga a Johnson i a Preston, o le ali’i foma’i lea sa tofi e galue i Sudan, peita’i, a’o le i alu ‘ese le va’alele mai Geneva, ua popole tele le ali’i foma’i ma ua musu ai e alu e fa’ataunu’u lana galuega.

A’o ai o le a le fefe, o ai fo’i o le a le popole, ona ua fai mai le ali’i foma’i o Johnson, ua ia va’ai uiga mata’utia o le virusi, ma atonu o le ala lea ua le mafai ai e le ali’i foma’i ona alu i Aferika. O le ali’i foma’i o Johnson, o ia sa fa’aigoaina le virusi lenei i le Ebola, ma o ia fo’i sa muamua ona maua le virusi lenei.

Fai mai le tala a le tusi tala o Richard Preston, ina ua talanoa ma le ali’i foma’i o Karl Johnson, na fai ane le ali’i foma’i ia te ia, e tatau lava ona maua se avanoa la te feiloa’i ai, ae le o le talanoa i luga o le telefoni, ona e tatau ona fa’amaonia ma fa’amanino tala e pei ona ia talanoa ane ai.

E faia pea …

Fa’aliliu: Akenese Ilalio Zec