Ads by Google Ads by Google

Fagogo: O le Sone Vevela

Vaega: 51

 

Fa’atalofa atu i lou alafa’i mai i le manuia i lenei taeao fou i le alofa ma le agalelei o le Atua Soifua, e ala lea i Lana tausiga alofa mo i tatou, lea o lo’o tatou maua ai pea le ola i aso uma lava. E ao ai ona o tatou fa’apea ifo, “Lo matou Tama e, oi le lagi, ia paia lou Suafa, ia o’o mai lou malo ia faia Lou finagalo i le lalolagi e pei ona faia i le lagi, Amene.” Ia manuia le alo faiva o le atunu’u i galuega o le a feagai ai i le aso.

 

Na muta mai la tatou tala ina ua maua nei e le vaega o le C.D.C i  Atlanta le virusi lea na maua i le tino o le Tama’ita’i Sa. O lea la ua amata ona faia su’esu’ega a ali’i ma tama’ita’i foma’i i Amerika, po’o le a auga o lea fa’ama’i, ae po’o a fo’i a’afiaga o le tagata e o’o i ai pe afai e maua i le virusi. Manatua fo’i, e le i o’o lava i Amerika le virusi lenei, ma o le ala fo’i lea sa naunau ai ali’i foma’i i le C.D.C ina ia maua mai se toto e fai ai a latou su’esu’ega.

 

I totonu o le nofoaga po’o le lotoa a le C.D.C, o lo’o i ai se ali’i foma’i su’esu’e e igoa ia Fredrick A. Murphy, o le ali’i foma’i sa galue e su’esu’e le virusi o le Malburg. O ia fo’i sa pu’eina ‘ata o le virusi lenei, ma e o’o mai i le taimi nei o lo’o fa’aalia ana ‘ata i totonu o le fale mata’aga i Amerika. Na taumafai le ali’i foma’i e pu’e ni ata o le toto lea na avane i le C.D.C mai Aferika mo a latou su’esu’ega.

 

O le Aso 10 o le masina o Oketopa, le aso tonu lea na saofa’i ai le tama’ita’i tausi ma’i o Mayinga i le falema’i i Kinshasa- o le aso fo’i lea na tu’u ai i luga e le ali’i foma’i o Murphy le sela (cell) i luga o le fa’ata fa’apitoa ma taumafai e pu’e ai ata pe iloa o lo’o i ai ni virusi i totonu. Ina ua faia su’esu’ega ia a le ali’i foma’i o Murphy, sa le i talitonu le ali’i foma’i i le mea ua ia va’ai nei i ai. O le toto lea na avane mo a latou su’esu’ega mai le falema’i i Porton Down, ua matua’i fa’atumulia i le virusi. O le toto ua mago e foliga mai o se maea po’o se manoa ua fili fa’atasi. Ua tau le manava le ali’i foma’i o Murphy i lea taimi, ua matua’i fa’ate’ia lava ma ua le mautonu.

 

E tasi lava lona manatu, o le virusi o le Malburg. Ua ‘ese fa’alogona o le ali’i foma’i o Murphy i lea taimi, o lona uiga o le potu tui toto lea sa faia ai ana su’esu’ega ua matua’i vevela lava, ma ua i ai nei i totonu le virusi lenei. Na savali fa’anatinati nei le ali’i foma’i i totonu o le potu tui toto, ma ua a’apa atu nei i le fagu Clorox ma fufulu ai uma le potu.

 

Ina ua ma’ea lea, na savali loa ma su’e le tama’ita’i foma’i o Patricia Webb, ma logo loa e uiga i le virusi ua ia va’aia. Na vala’au nei le tama’ita’i foma’i i lona to’alua, lea o lo’o ta’ita’ia le vaega su’esu’e a le C.D.C, ina ia vave ona alu ane ona o lea ua maua e Murphy le virusi i totonu o le toto lea na avane mo a latou su’esu’ega.

 

Na amata nei ona faia su’esu’ega, ma na o latou iloa ai, e foliga mai o ni anufe, a le o lena fo’i o ni tama’i gata e foliga mai o lo’o pipi’i fa’atasi, ma tula’i mai ai le mata’itusi o le Y. I le aso na soso’o ai na faia ai loa su’esu’ega a le tama’ita’i foma’i o Patricia Webb e uiga i le virusi, ma na iloa ai e le tutusa ma le virusi o le Malburg, ma e le tutusa fo’i ma isi ituaiga virusi.

 

Ua o latou mautinoa ai loa, o se virusi fou le virusi lea, ina ua maua e le C.D.C le virusi lea, o lona uiga ua mafai e i latou ona fa’aigoa le virusi lea, ma na manatu ai loa le ali’i foma’i o Carl Johnson e fa’aigoa i a Ebola. Ua leva ona tu’ua e Carl Johnson lana galuega i totonu o le C.D.C, ma o le taimi tusi ai le tusi lenei, o le taimi lea o lo’o alaala i lona aiga i Montana.

 

E Faia Pea …

 

Fa’aliliu: Akenese Ilalio Zec