Fagogo: O le Sone Vevela

Vaega: 50

 

“Le Atua e, o Oe o lo matou Maluapapa, o Oe, o lo  matou malosiaga, matou te fa’atuatua ia te Oe, aua ua na o Lau Afio matou te maua ai le fa’amalologa sili mai ma’i faigata o le soifuaga nei, ia vi’ia pea Oe matou Ali’i e fa’avavau.” Ia manuia le alo atu o le atunu’u i fiva ma tiute o le a feagai ai i lenei aso.

 

Alo maia, o le a toe fa’aauau atu la tatou tala mo lenei aso. Na muta mai la tatou tala, ina ua amata ona galulue fa’atasi le Malo o Zaire ma le Fa’alapotopotoga o le Soifua Maloloina i le Lalolagi ina ia puipuia ona tagata nu’u mai le fa’ama’i, lea na o’o ane ma Mayinga i le a’ai. O Zaire, ua fa’atupula’ia le to’atele o tagata o lo’o alaala ma nonofo ai, ma o le ala lea na lagona ai le popolega o le Fa’alapotopotoga o le Soifua Maloloina i le lalolagi, ona afai ae tula’i mai lenei fa’ama’i, o lona uiga o le a a’afia ai le lalolagi atoa.

 

A’o fa’agasolo togafitiga mo le Tama’ita’i Sa o M.E. lea ua maliu, na taumafai foma’i ina ia maua se toto mai le tino o M.E mo a latou su’esu’ega i se taimi o i luma. Na taumafai malosi ali’i foma’i, ina ia maua mai nisi o vaega o le tino o le Tama’ita’i Sa, ina ia mafai ai ona iloa po’o le a le mafua’aga o lenei fa’ama’i mata’utia.

 

Ina ua maua e ali’i foma’i fa’amaumauga mai le Tama’ita’i Sa, na ave loa lona toto i le fale o lo’o teu ai toto o tagata i Belgium fa’apea ma le English National Laboratory i Porton Down i Wiltshire. Na amata loa ona faia su’esu’ega a ali’i foma’i atamamai i le toto o le Tama’ita’i Sa lea ua o latou maua nei. O le taimi lea, i totonu o le Center for Disease Control i Atlanta Georgia, C.D.C, ua i ai le fa’alogona o ali’i foma’i ua le amanaia i latou, ona e leai ni paina toto o le Tama’ita’i Sa na avane latou te su’esu’eina. O le ala lea na alu ai le va’alau ma le fa’atauanau a le C.D.C i Aferika ma Europa ina ia maua mai se toto o le Tama’ita’i Sa mo a latou su’esu’ega.

 

O le C.D.C, o lo’o i ai ni ali’i ma tama’ta’i foma’i e galulue fa’apitoa i le su’esu’eina o virusi fou e ono alia’i mai. O lea vaega ua fa’aigoaina o le Pathogens Branch. I le tausaga 1976 ina ua ali a’e le virusi o le Ebola i totonu o Zaire, o le taimi lea, o lo’o va’aia e le ali’i foma’i o Karl M. Johnson le vaega lea a le C.D.C. E le i iloa e Johnson ma lana vaega le a’afiaga o tagata i le virusi i nofoaga o lo’o i talane o le vaitafe i Zaire. E le i iloa fo’i, o lo’o alu le solo maliu a tagata ona o le fiva, lea e i ai ona foliga va’aia, ae na pau le mea na iloa e i latou, o lo’o maliliu tagata i totonu o  Zaire ona o le malosi o le fiva.

 

Ae i le fa’alogologo atu i ai, o se tulaga mata’utia tele, o le ala lea na alu ai le vala’au a Johnson i lana uo o lo’o galue i totonu o le Porton Down, ma o lea na maua ai e Johnson le toto o le Tama’ita’i Sa. Na taunu’u ane le toto lenei o lo’o i totonu o se fagu ae o lo’o si’omia i ‘aisa e le liu suavai, ma ua ta’e fo’i le isi itu o le fagu ina ua taunu’u ane i C.D.C. i Atlanta. Ua saofia i fafo le toto i le atigipusa sa lafo ane ai. O le tama’ita’i foma’i o Patricia Webb le to’alua o le ali’i foma’i o Karl Johnson sa tatalaina le pusa ma sa ia iloa ai, ua pipi’i le toto i totonu o le atigipusa. O le toto, ua matua’i uliuli pato’i.

 

Na tu’u nei e le tama’ita’i foma’i o Patricia Webb le toto i totonu o sela po’o cells o manuki, e le i umi lava, ae va’aia loa ua mamate, ua pa pa mai i fafo sela o manuki. O lona uiga o le toto lea na avane mo a latou su’esu’ega, o lo’o i ai le virusi mata’utia, lea ua maliliu ai le to’atele o tagata i totonu o Zaire i Aferika.

 

E faia pea …

 

Fa’aliliu: Akenese Ilalio Zec

 

Comment Here