Fagogo: O le Sone Vevela

Vaega: 46

 

“Vivi’i atu ia outou i le Ali’i, aua e lelei o ia, e fa’avavau lava Lona alofa.” O lea la tatou tatalo i lenei taeao, ona ua o tatou va’aia ataata o ta’uleleia i le alafa’i mai i le manuia i lenei taeao fou. Malo le soifua, malo fo’i le onosa’i i feau ma galuega o lo’o feagai ai i lenei aso. Ae alo maia, o le a toe fa’aauau atu la tatou tala fa’asolo ua fa’aigoaina, “O le Sone vevela.”

 

O lo’o i ai pea la tatou tala i totonu o Aferika le nofoaga ua avea ma ofaga o so’o se ituaiga virusi mata’utia i le lalolagi atoa. O se nofoaga fo’i e le fia alu i ai se tasi, a’o tagata lava ia o Aferika, ua masani i latou i le nonofo ai pea ona o lo latou fa’asinomaga lea fa’ale tagata soifua.

 

O lea la o lo’o fa’amatala mai e le ali’i tusi tala o Richard Preston mea moni lava na tutupu i totonu o Aferika, ae maise ai o le fa’amatalatalaina mai o le mata’utia o virusi ua a’afia ai tagata soifua.

 

O lea tatou te i ai pea i le sa’iliga togafitiga a le ali’i faia’oga lea ua alu nei i le falema’i o Tama’ita’i Sa, ona o le fia maua o se fesoasoani ona ua ‘ese le fa’alogona ua i ai lona tino, ina ua uma ona a’ai i le tino o le manu o le anetelope.

 

O le a fa’aauau pea la tatou tala. Fai mai, i le amataga o aso ta’itasi o le galuega a Taupo Sa e fai i totonu o le falema’i o Yambuku, e fa’ata’atia ‘ese lava tui e lima i luga o le laulau, ma o tui nei e fa’aaoga mo tagata uma e o ane i le falema’i i lea aso. O tui fo’i nei e lima (5) e fa’aaoga e tui ai le selau o tagata i totonu o le falema’i, fa’apea ma tagata e mo’omia le fesoasoani i le aso e tasi.

 

 A uma le aso, ona ave lea o tui nei ua fa’amama ‘ese le toto e ala lea i le fa’aaogaina o le suavai vevela. Ae e i ai taimi atonu a uma ona fai le tui o le tagata, soso’o ane ai ma le isi tagata, ona alu ai lava lea fa’apea, ua le fufulua ma fa’amama le tui. O lona uiga ua fifiloi fa’atasi le toto o le isi tagata ma le toto o le isi. Ona o le virusi o le Ebola Zaire e fiafia tele e nofo i le toto o le tagata, atonu o le amataga lea o lenei fa’ama’i ma a’afia ai le tele o tagata.

 

I nai aso talu ona o’o atu le fai’aoga e fai lona tui i le falema’i lea, na a’afia ai loa i le virusi o le Ebola Zaire. Atonu sa i ai se tasi ua a’afia i le virusi na fa’aaoga fa’atasi ma le alii faia’oga le tui e tasi, atonu fo’i sa i ai se tasi ua a’afia i le virusi ae ua alu ane i TaupoSa e fai lona tui puipuia e aunoa ma sona iloa. E le o iloa lea tulaga, ae ua amata ona sosolo ma pepesi le fa’ama’i i totonu o le nu’u ma le a’ai atoa o Zaire.

 

Ua amata ona a’afia ma pepesi tagata o nu’u e limasefulu o lo’o si’omia le nofoaga lenei o Taupo Sa. O tagata muamua lava o i latou ia na fa’aaoga i ai tui ma ua sosolo atu i totonu o aiga, ua maliliu ai le to’atele o tagata, ae maise lava o le itupa o tama’ita’i aua o tina e tapenaina tino o tagata ua maliliu.

 

Ua sosolo nei i totonu o le falema’i o Yambuku ma ua a’afia ai ta’ita’i foma’i ua feoti ai le to’atele o tama’ita’i e galulue i totonu o le falema’i lenei, ma ua maua ai loa ma Tama’ita’i Sa o le ituaiga o le Belgian. O le Tama’ita’i Sa na muamua maua i le virusi, o le Tama’ita’i Sa sa taumafai e fa’afanau se tina ua maua i le Ebola. Fai mai, o le pepe fo’i sa i totonu o le manava o lenei tina, ua a’afia fo’i i le Ebola. O ina na mafua ai ona maua le Tama’ita’i Sa i le virusi o le Ebola Zaire.

 

E faia pea …

 

Fa’aliliu: Akenese Ilalio Zec

Comment Here