Ads by Google Ads by Google

Fagogo: O le Sone Vevela

Vaega: 5

 

Fa’atalofa atu i lou alafa’i mai i le manuia i le alofa ma le agalelei o le Atua, lea ua o tatou molimau fa’atasi ai le matagofie o Ana galuega mamana mo o tatou tagata. Taeao manuia, taeao toto’a, fa’afetaia ai pea le alofa o le Atua e le mavae mo i tatou i aso uma o lo tatou ola. Ona o tatou fa’apea ifo lea, “Le Ali’i e, o Oe o lo matou maluapapa ma lo matou malosi’aga, fa’afetai mo mea silisili e te faia pea mo o matou tagata, ia fo’i atu lava le vi’iga ma le fa’amanu i Lau Afio, Amene.”

 

Ae alo maia, o le vaega lona lima lenei o la tatou tala, o le Sone Vevela. Na muta mai la tatou tala ina ua o’o le maimoaga a Tiali ma lana uo tama’ita’i i totonu o le ana ua fa’aigoaina o le Kitum. O se va’aiga e maofa ai le loto lea ua iloa nei e Tiali, ona o totonu o le ana lenei, e le gata ina avea ma fale e malu ai so’o se meaola, ae ua tutupu ai i totonu le anoano o la’au lauusiusi. O autafa o le ana lea e i ai papa ma’a, ma e foliga ua liua ma avea o se fa’ata manino. O le ogatotonu o le ana, o lo’o tafe ai se vaitafe manino ma le matagofie.

 

Ua ki pea le moliuila a Tiali ma fa’asolosolo le la va’ai i totonu o le ana, na o la iloa ai le tele o ivi o manu ua mamate o lo’o tautau mai i luga o papa, o lo’o i ai fo’i ivi o isi manu o lo’o i ai. O lona uiga ua avea lenei ana ma nofoaga o manu. O aupoga leveleve, o lo’o tautau solo mai i luga o isi itu o la’au, o aupoga leveleve nei o lo’o avea isi iniseti la’iti ma a latou mea’ai.

 

Na o’o nei le savaliga a Tiali ma lana uo i le itu e mafola atoa ma e silia ma le selau iata lona lautele, e sili atu ona lautele nai lo le malae o lo’o fai ai ta’aloga lakapi, ma sa o la va’aia ai se lua loloto i le ogatotonu galemu o le mafola lea.

 

Ua fa’asolo pea le savaliga a Tiali ma lana uo tama’ita’i i totonu o le ana, ma o la iloa ai o lo’o i ai se poutu, o lo’o lalagoina le ana atoa, ma o lalo ifo o lenei pou o lo’o i ai le taulaga pe’a, ae maise o le  tele o elefane, o lo’o i ai i lea nofoaga. O pe’a nei e avea iniseti ma a latou mea’ai, ma o faua ma pua’iga a pe’a, lea o lo’o tele nei i le itu lea o le ana. Pe na tu’u ea e Tiali lona lima i totonu o faua o pe’a.?

 

E tele tausaga talu ona le toe va’aia le uo tama’ita’i a Tiali lea na o la o i totonu o le ana o Kitum, ae maise o le mauga o Elekone, (Mount Elgon). Ae te’i ane ua toe va’aia le tama’ita’i lenei i totonu o se pa pia i le a’ai o Mombasa, lea sa avea ai o ia o se tama’ita’i teu fale.

 

O le ali’i fomai mai Kenya lea sa ia su’esu’eina le mataupu i a Tiali, sa fai sana malologa i totonu o le pa pia lenei, ma na fetaui ai ma le tama’ita’i lenei. O se la talanoaga na fai ma le tama’ita’i, ae na ta’ua ai le igoa o Tiali Moneti. Na fa’ate’ia le ali’i fomai ina ua fa’apea ane le tama’ita’i, na te iloa lelei lava le mataupu lea e uiga i a Tiali Moneti ona o lana uo.

 

Na tau le talitonu le ali’i foma’i, ae ina ua fa’amatalatala ane i ai e le tama’ita’i le la mafutaga ae maise o le la tafaoga ma Tiali Moneti lea na alu i luga o le Mauga o Elekone ae maise o le Ana o Kitum, sa talitonu ai loa le ali’i foma’i. Talu mai le feiloa’iga lea ma le ali’i foma’i na nimo ai loa le tama’ita’i, ua le toe va’aia ona foliga i totonu o Mombasa, ae a tonu ua oti ona o le fa’ama’i o le AIDS.

 

E faia pea

 

Fa’aliliu: Akense Ilalio Zec