Ads by Google Ads by Google

Fagogo: O le Sone Vevela

Vaega: 43

 

Fa’atalofa atu i le maleifua mai o le atunu’u i fanuga lelei o lenei aso fou, malo le soifua, malo fo’i le onosa’i i faiva ma tiute o lo’o feagai ai i lenei aso, e ao ai ona o tatou fa’apea ifo, “Lo’u agaga e, ia e fa’amanu atu i a Ieova, o mea uma fo’i o i totonu ia te a’u, ia fa’amanu atu i lona Suafa Paia.”

 

Ia manuia lenei aso, ae alo maia o le a toe fa’aauau atu la tatou tala fa’asolo e pei ona i ai nei. O le a toe fo’i la tatou tala i Aferika ma le a’afiaga sa i ai tagata i le virusi o le Ebola, o le tausaga lava lea 1976, lea na amata ai ona a’afia tagata i le Ebola.

 

I le Aso 6, o Iulai 1976 pe tusa i le limaselau maila i le itu i Sisifo o le Mauga o Elekone (mount Elgon), i Matu i Sasa’e o Sudan, i le ogatotonu o le toga vaomatua o Aferika, na a’afia ai se tama i le virusi (virus).  O lea tama e pei ona iloa ai o ia e i latou o lo’o faia sa’ili’iliga i le virusi o le Ebola, e igoa i a Yu.G. Fai mai le tala na va’aia lenei tama i taimi na a’afia ai, ua leai se itu o lona tino e le o sau ai le toto. Ua le mafai ona taofiofia ma na maliu ai lava. E le i mautinoa fo’i la, po’o le a le ituaiga virusi lea na a’afia ai lenei tama i lea taimi, ona o lo’o faia pea su’esu’ega a foma’i e uiga i le virusi.

 

O Yu. G, o se tagata fa’atau oloa i toto o se fale faigaluega e gaosia ai vavae (cotton), i le a’ai e igoa i a Nzara. O le a’ai lenei, ua amata ona fa’atumulia i tagata ona ua va’aia fo’i le tele o pisinisi ma kamupani ua atia’e ai. O tagata o lo’o nonofo i le itu i Sasa’e o Sudan e fa’aigoaina o Zande, ma o se ituaiga e to’atele ona tagata. O le nu’u atoa lenei, fai mai e ‘ese le matagofie, o la’au tetele e si’omia ai le a’ai atoa, so’o se ituaiga la’au e ola lau usiusi i totonu o lau’ele’ele o le a’ai lenei. A e ui atu i le itu i Sasa’e e aga’i atu i Zaire, ona e va’aia ai lea o atumauga matagofie o lo’o si’omia ai le a’ai lenei.

 

 O tagata o le ituaiga o Zande fai mai e matitiva ma lima vaivai, ae sa galulue malosi ina ia fa’atoa ‘ele’ele ae maise o le vao matua e ola ai.

 

O le tama o Yu. G. e maualuga lona tulaga i totonu o le fale faigaluega lea e teu ai vave e auina atu e tagata e fa’atau ai. Fai mai le tala, o totonu o lenei fale faigaluega ua tuai lava, ma ua fai ma ofaga o pe’a (Bats). Afai ua a’afia pe’a i le virusi o le Ebola, o lona uiga, e leai se tasi o ona iloaina, ma e leai fo’i se tasi na mafai ona fa’amaonia.

 

Fai mai o le fale faigaluega lenei, e tele isi ituaiga iniseti ua nonofo ai, ona o se nofoaga ua tuai, e le i toe fa’afouina, ma ua avea ma ofaga o so’o se meaola. Ua i ai le manatu, atonu na a’afia Yu.G. i se toto o se manu, o pe’a po’o isumu, ae le o lena fo’i, atonu na a’afia lenei tama i se isi mea. 
E le i alu Yu.G. i le falema’i, na oti lava i lona aiga, ae fai mai, na avea le tu’ugamau o lenei tama, e asiasi atu i ai ia foma’i fa’apitoa mai Europa ma Amerika e fai ai a latou su’esu’ega, lea na mulimuli ane iloa le mafua’aga, o le virusi o le Ebola Sudan na maliu ai. ( Manatua fo’i, e to’atolu le au uso, e pei ona fa’aigoaina ai e foma’i fa’apitoa, o le virusi o le Malburg, o le virusi o le Ebola Zaire ma le virusi o le Ebola Sudan, a’o le virusi ua silisili ona mata’utia o le virusi o le Ebola Zaire).

 

E faia pea…

 

Fa’aliliu: Akenese Ilalio Zec