Ads by Google Ads by Google

Fagogo: O le Sone Vevela

Vaega: 40

 

Fa’atalofa atui lou alafa’i mai i fanuga lelei i lenei taeao fou, i le alofa ma le agalelei o lo tatou Tapa’au i le lagi. E ao ai ona o tatou sunu’i lapalapa o malo ma fa’afo’i le vi’iga i Lana Afio ona o lona alofa mai pea mo i tatou i aso uma o lo tatou ola. Ae alo maia, o le a toe fa’aauau atu la tatou tala fa’asolo mo lenei aso.

 

O se tulaga ogaoga ua o’o nei i ai le tina o Nancy, ona ua i ai le manatu ua a’afia o ia i le virusi o le Ebola. Na fa’atopetope nei ona ta’ele ma taumafai e fa’amama ‘ese uma le toto o lo’o i ona lima, ma ua ave ‘ese fa’anatinati nei le suti lanu moana ma pau ifo loa i luga o le foloa.

 

Ina ua ave’ese mai lona lima taumatau mai le suti lanu moana, na ia iloa ai o le lima o le suti ua su su atoa, ae o totonu fo’i o le totigilima ua su su fo’i. O lona uiga, o le totigilima o le suti lanu moana lea ua mafua ai mea uma, ona ua saofia i ai le toto ma le vai. Na toe va’ai lelei nei Nancy po’o le a le isi tulaga e ao ona fai, ona ua ia iloa nei o le suti lea sa ia ‘ofuina o le mafua’aga lea ua mafai ai ona soafia le toto o lo’o i ai le virusi e latalata ane i le Band-Aid lea e fai ai lona lima.

 

Na popole Nancy aua afai o le a a’afia le totigilima o lo’o pito i totonu, o lona uiga ua leai lava se isi mea e toe mafai. Na taumafai nei e tilotilo lelei pe i ai lava sina tama’i pu i le totigilima lea, ma o le ala lea na ia fa’aaluina ai le vai e sa’ili ai pe o le a le tulaga ua i ai i lea taimi. O le vai lea e fa’aalu mai le paipa tele, e alu sa’o lava i fa’atanoa ua matua’i fa’avevela lava, ina ia ‘aua ne i saofia i fafo ma a’afia ai le suavai.

 

Na ave’ese nei e Nancy le totigilima mulimuli lava lea e pito i totonu, a’o faia lea tulaga, ua amata ona tatalo Nancy, “Le Atua, alofa mai ia te a’u fa’amolemole, alofa mai le Atua fa’amolemole.” Na tu’u nei e Nancy lona lima taumatau i lalo o le vai i lona fia mautinoa pe o se toto mai le manuki, po’o lona lava toto lea e tafe mai ai.

 

E moni, o lona lava toto lea ua fifiloi fa’atasi ma le pauta e puipui mai ai mai le saofia i totonu o le toto o lo’o i ai le virusi o le Ebola. Na lagona le loto fa’afetai o Nancy i lea taimi. Na tu’u nei e Nancy le totigilima lea i lalo o le vai, o lona fia mautinoa pe ua liki pe ua pu fo’i le totigilima, aua afai ae pu ma sao mai i fafo le vai, o lona uiga, o le muta’aga lea o mea uma mo ia. Na mata’i nei e Nancy le totigilima lenei, ma na ia iloa ai e leai se liki ma e leai fo’i se pu o i ai. “Fa’afetai i le Atua, fa’afetai tele.” O le tatalo le leoa lea a Nancy i lea taimi.

 

Ae e le i umi, ae fa’alogoina loa e Nancy ua pepe ona vae, ma ua pau ifo nei i lalo ma fa’alagolago i le pa o le potu. E foliga mai o se tiga uiga’ese ua o’o nei i lona manava, ma ua tau le mafai ai ona savali. Na tau tu a’e nei i luga ona o le fia maua o se nofoaga e saofa’i ai. Na taumafai e ti’eti’e i luga o le nofoa, ae ua le mafai lava, ona ua pepe fa’asolo atoa lona tino. Na taumafai nei e fa’alagolago i le pa o le potu, ona ua le mafai ona toe minoi, ma o le tulaga lea na va’aia e le ali’i foma’i o Eugene Johnson ina ua ulufale i totonu o le potu i lona fia iloa po’o le a le tulaga ua o’o i ai Nancy Jaax.

 

E faia pea …

 

Fa’aliliu: Akenese Ilalio Zec