Fagogo: O le Sone Vevela

Vaega: 39

 

Fa’atalofa atu i lou alafa’i mai i le manuia i lenei taeao fou, malo le soifua, malo fo’i le onosa’i i faiva ma tiute o lo’o feagai ai. E ao ai ona o tatou si’i le vi’iga ma le fa’afetai i lo tatou Tapa’au i le lagi, ona o Lana tausiga fa’aauau pea mo i tatou i aso uma o lo tatou ola. Ae o le a toe fa’aauau atu la tatou tala fa’asolo mo lenei aso.

 

Na muta la tatou tala ina ua iloa e Nancy ua i ai le fa’aletonu i lona totigilima e pei ona fa’asino ane e Johnson ia te ia. Ae manatua fo’i, o Nancy sa lavea lona lima, ina ua tapena le mea’ai a lana fanau, ma o lea e le i pe lelei le lavea, ae ua fa’apipi’i i le mea fa’apipi’i, ae sa i ai le manatu o Nancy, o le a le mafai ona a’afia i le toto. Peita’i, o lea ua iloa atu nei e Johnson le mea ua tupu i a Nancy.

 

Ua va’aia nei e Nancy le popole o Johnson, ae sa taumafai lava le ali’i foma’i ia fa’ato’ato’a le la galuega. Na ona iloa lava e Johnson ua fa’aletonu le suti o Nancy, fai ane loa i ai, e tatau ona alu ‘ese fa’avave mai totonu o le potu.

 

Na liliu nei Nancy ma savali fa’atopetope ‘ese, ua le mautonu lona mafaufau i lea taimi. Na i ai lona manatu e fa’apea, talosia ia ‘aua ne i a’afia le lavea o lona lima, ona afai o le tulaga lea ua o’o i ai, o lona uiga, ua leai se aoga o mea uma. Ua mafaufau nei i si ana fanau ae maise o si ona to’alua o Jerry, ua lagona le fefe ma le atuatuvale o lona loto. Ae sa taumafai pea ina ia tu’u ‘ese lona fefe, ae ia tu’u atoa lona loto ma lona mafaufau i le mea e ao ona fai i le taimi lea. Na ona i fafo lava o Nancy mai le potu lea, savali sa’o loa i le vaita’ele, ma ua taumafai nei ina ia fufulu ‘ese uma le toto o lo’o pipi’i i lona lima. Sa ia fa’alogoina i lea taimi e foliga mai o se mea o lo’o ga’oi’oi i totonu o lona suti lanu moana ma ua atili ai ona le mautonu lona mafaufau i lea taimi.

 

O le vai lea e sau mai le paipa o le faleta’ele o vaila’au uma lava, ma o vaila’au ua uma ona saunia e ali’i foma’i fa’apitoa e fa’aleoleo mo se fa’alavelave e tupu fa’afuase’i i se tasi a’o i ai i totonu o le potu numera 4 lea o lo’o i ai le virusi o le Ebola.

 

I totonu o le fale, o lo’o i ai se potu ua fa’aigoaina o le Slammer, ma o le potu e ave i ai e ali’i foma’i se tasi o le au faigaluega po’o fitafita fo’i, ua a’afia i se virusi. Afai ua a’afia le tagata i le virusi mata’utia ma ua le mafai ona togafitia ona ave loa lea i le isi fale maliu ua fa’aigoaina o le Submarine. Na mafua ona fa’aigoa e Fitafita le falemaliu lea i le Submarine, ona o faitoto’a e puiapuia ai lea potu, o lo’o fausia i ‘apa memea ma e foliga uma lava i le faitoto’a o lo’o i luga o va’a ia ua fa’aigoa o le Submarine, po’o Va’a Tofu.

 

 O fa’alogona popole ma le atuatuvale ua o’o nei i ai Nancy ua ia toe manatua nei, e le i alu i le faletupe e ave’ese mai se tupe e fai ai le totogi o le teine faigaluega. E leai fo’i se mea e fai ai se mea’ai a lana fanau, o le a fa’afefea nei pe afai o le a ave ia i le Slammer e tu’u ai. O le a liliu nei fo’i Johnson e fa’atumu pepa e fa’ailoa ai o se fa’alavelave fa’afuase’i ua tupu nei ia te ia. Ua le masino le mau mafaufauga ua o’o nei i a Nancy, ae sa tumau pea lona loto tele, ma lona manatu, atonu lava o le a i ai lava sina avanoa mo ia e toe mafuta ai ma si ana fanau, ae maise o si ona to’alua o Jerry Jaxx.

 

E faia pea…

 

Fa’aliliu: Akenese Ilalio Zec

 

Comment Here