Fagogo: O le Sone Vevela

Vaega: 37

 

Taeao manuia i le alofa o le Atua, e i ai pea le fa’amoemoe o lo’o aoina le masina i le soifua lau lelei o le atunu’u i lenei taeao fou. E ao ai ona o tatou fa’apea ifo, “Ieova o Au e, ina e fetalai maia, ona o matou malolo ai lea, silasila alofa mai mo i matou i lenei aso, ina ia i’u manuia a matou fuafuaga ma fa’amoemoega, a’o le vi’iga matou te fa’afo’i atu i Lau Afio, Amene.” Alo maia o le a toe fa’aauau atu la tatou tala. ia manuia le alo faiva o le atunu’u i tiute o le a feagai ai i lenei aso.

 

Na fa’apea ane nei Johnson i a Nancy, “Tatala le pa.” Ma ua fa’apena ona fai. Na toe su’esu’e e Nancy le manuki, ae ua leai lava, ua mate. Na fa’atonu mai nei e Johnson e au mai i fafo le manuki mai totonu o le pa. Na a’apa atu nei Nancy ma toso mai i fafo le manuki, ae na fesoasoani ane i ai Johnson ona e tele le manuki toe mamafa.

 

Na sa’esa’e nei e Johnson ma Nancy le manuki ma ave i le isi potu lea e fai ai ta’otoga o manu ma tu’u loa i luga o le laulau. Ua toe fa’amuolu fo’i isi totigilima, ua tolu ai nei totigilima ua fa’aaoga e Johnson ma Nancy. Ua fai nei le taotoga o le manuki, na a’apa ane nei Johnson ma ua tipi le itu i luma o le manuki, ae o lo’o fesoasoani i ai Nancy. O totonu o le potu lenei, e le fa’aaogaina ai ni mea ma’ai, ona afai e fa’aaoga, e le tau mate e o’o ina lavea ai se tasi, ona sao loa lea i totonu  le virusi o le Ebola ma a’afia ai.

 

I le taimi atoa a’o faia su’esu’ega a le ali’i foma’i o Johnson, o lo’o mata’i pea e Nancy le mata’utia o le a’afiaga o le manuki i le virusi o le Ebola. O le mea muamua lava na iloa e Nancy, e foliga mai ua leai ni totoga o le manuki, ua liu toto atoa, ua leai fo’i se ga’au, ua leai se ate o le manuki ua solo atoa i le toto. O le totoga sa fo’i o le manuki o lo’o tafe mai ai le toto, ma o le toto lenei, o le toto o le Ebola.

 

Na ia manatu ifo e sili pe a faifai lemu le alu a ona lima, atonu ua vave tele le feoa’i solo o ona lima. Na galulue fa’atasi nei Johnson ma Nancy, o le itu o lo’o i ai Nancy, o lo’o ia taumafai e ave’ese mai ma ma, o le manuki, o maso, ma le isi itu o le ga’au o le manuki. Ae i le taimi atoa lea, o loo ia manatua pea, e tatau ona fa’aitete, e tatau ona faifai malie, e tatau fo’i ona ia mata’ina lelei mea uma. Na savali ane nei ua fufulu ‘ese le toto o le manuki, a’o le toto lea, ua mautinoa e Nancy o le toto o le virusi o le Ebola.

 

Fai mai le fa’amatalaga o le virusi, po’o le VIRUS, e foliga e pei o se tama’i fuala’au ma o lo’o i ai i totonu polotini (protein) ma (membraines) o pa’u manifinifi o le tino. O nisi virusi e i fafo atu o musele o le tino, o virusi la nei ua mamate. O isi virusi o lo’o ta’atitia i le toto po’o fatu tale, e i ai le manatu ua mamate, ae peita’i, o lo’o fa’atalitalii se mea e ola ai. Afai o le a o’o ane le sela (cell) ma fetaui ma le virusi, afai ae tutusa le feso’ota’iga lea, ona pipi’i loa lea o le virusi (virus) i le sela, cell. E fafaga e sela (cells) o le tino le virusi, ona fa’aofi lea i totonu o le tino atoa o le tagata po’o le meaola.

 

O le virusi e nofo pe pipi’i fo’i i se isi mea ina ia ola ai pea. E le mafai ona ola na o ia, pe ola to’atasi fo’i, ma e nofo i totonu o le sela, (cell) ma fa’aaoga le malosi’aga o sela e ola ai. O mea uma o lo’o i ai le ola i lalo o le la, e i ai sela (cells). O le virusi e nofo i totonu o le sela (cell) ma fafaga ai lava se ia o’o ina ua le mafai e  sela ona tauave, ona pa loa lea ma fa’aleaga, ona ta’ape ai loa lea o le virusi i le tino o le tagata.

 

E le gata i lea, e ofaga fo’i le virusi i pa o lo’o puipui ai sela o le tino o le tagata, ma e foliga mai o se paipa ua mama, e mama pea ma mama pea se ia o’o ina ua le mafai e sela o le tino ona tau ave le malosi o le virusi, ona fa’aleagaina loa lea. O le fa’agasologa lea o le ma’i o le AIDS.

 

E faia pea …

 

Fa’aliliu: Akenese Ilalio Zec

 

Comment Here